2 कुरि 1 - Kodaku

पवलुस राः जोहार

¹ इंञ पवलुस अपे सींड़कू लगड नआँ चिट्ठिंञ लिखो यडा, इंञ भगवान अनेज राः इक्छा ते मसीह ईसु रेनिय परेरितिय ठहरो केडिञाँ, इंञ सुदा अबू रेनिय गति भाई तीमुथियुस हो अपे जोहार मेनतेय कहनी वपे तना, कुरिन्थि सहर रे इदाना भगवान राः एटाः एटाआ कलीसिया रेनकू अवुर गोटा अखया छेतर रे दोहोन हेंकू पवितर होड़कू लगड नआँ लिंञ लिखो यडा।

² अबू रेनिय भगवान अपा अवुर परभु ईसु मसीह हनवरी किरपा अवुर सान्ति ञँमुः महल रे दोहोनू।

पवलुस भगवान धन्यावादिय ओवाया

³ अबू रेनिय परभु ईसु मसीह रेनिय भगवान अवुर अपा राः धन्यवाद होयाऊ। हेंय दयाअय अपा अवुर सगोर याःते सान्ति ए-मय भगवान हवे।

⁴ हेंय अबू राः जे-निरीता दुख तकलिप रे सान्तिय ओवा बुआ; ताकि अबू हो जे-निरीता दुख तकलिप रे इदान कुः हेंकू, भगवान ओवा बुआ हेना सान्ति ते सान्ति बू ओवाकू।

⁵ कहेकि अले जेतना मसीहा लगड दुख ले रिमियाडा, ओतनेच जादा सान्ति अले मसीहा वरी ञँमुआँ, अवुर नआँ टेबोः सही गिआ।

⁶ अगर अले दुख तकलिप ले रिमयड रेदो, नआँ अपे राः सान्ति अवुर अपे पाप वरी पे बंचोः लगड हवे; अगर अले सान्ति ले ञँमयड रेदो, नआँ अपे राः सान्ति लगड हवे; ने-ना राः चलते ते अपे धीरज राः साथ ते अले सहो यडा दुख तकलिप पे सहो यडा।

⁷ अले अपे राः बारे ते पूरा आसा इदाना; कहेकि अले पपाड़ी तना कि अले घयते दुख पे रिमियाडा, हेन घयते अपे हो अले सान्ति ञँमुः तना, हेना रेपे मेसाः तना।

⁸ एगा भाईकू, अले आसिया छेतर रे एतना दुख तकलिप तेले गुजरो एना, हेना अपे पपाड़िकोःपे मेनते ले चहोः तना, अले एतना समस्या रेले पड़ो एना कि ससाहो मुस्किल यनु, एतना कि अले जियोः राः कनर असरा मेने दोहो गना।

⁹ नआँ सही गिआ अले गोजुअले मेनते पक्‍का यन दोहो एनु, हेनाते अले अनाले थरे मेने ले भरोसा गडा, लेकिन गोजकोःकू जियोवय भगवान थरे भरोसाय लगड ले चेडकेना।

¹⁰ अले नआँ निमीन बडेः मिरतू वरी हें-नी बंचो केडलेआ, अवुर मड़ंग हन होय बंचो लेआ, अवुर मड़ंग हँडाः जिनगी रेहोय बंचो लेआ मेनते अले राः आसा इदाना।

¹¹ कहेकि अपे, बिनती राः दोवारा ते अले पे सहेतावा तना, फेर अखीर होड़कू अले लगड भगवान धन्यवाद कू ओवाया। हेंकू राः अखीर बिनती राः चलते ते भगवान अले बरदानिय ओवड लेआ मेनते भगवान धन्यवाद कू ओवाया।

पवलुस सेनुः लगाडिय पसींद तड हेनाय बदलो तेडा

¹² अले राः मन न घयते गोवाही एमियाडा, अवुर नआँ गोवाही रे अले फुलाया, हेना गोवाही नआँ हवे कि अले दुनिया रे अवुर खासकर अपे राः बीच रे दोहोन तोलोग, अले राः चाल बेहवार भगवान एमकेडा पवितरता ते अवुर सच्‍चाई ते दोहो एना, नआँ घयते दोहोनू दुनिया राः गियान ते कोवाआ, लेकिन भगवान राः किरपा ते होया केना।

¹³ अले, अपे पड़हो यडा अवुर पे मनो यडा, हेना छोड़ ते अवुर कनर एटाआ मेने ले लिखो यडा; लेकिन अपे अले राः बारे ते पूरा पूरा बेगर पे समझोआ, हेंडे रेहो ईञाः आसा इदाना कि अपे अले राः बारे ते पूरा पूरा पे समझोआ,

¹⁴ कि फेर अबू रेनिय परभु ईसु मेजुः रे अले जेयसे अपे ले फुलय वआ, हेन घयते अपे हो अले पे फुलाय वआ।

¹⁵ ने-ना भरोसा ते इंञ अपे थरे पहिल ते सेनुः मेनतेंञ पसींद तडा, ताकि अपे थरे बार एस मेजुः राः आसीर्वाद ञँमुऊ।

¹⁶ अवुर मकिदुनिया हनते चलोः तोलोगिंञ उसका गोःया पेआ मेनतेंञ पसींद तडा, हेना वरी फेर मकिदुनिया वरी अपे थरेंञ मेजुः मेनते, अवुर अपे अहूदिया हनते पे पड़गाही अटुंञ मेनतेंञ पसींद तडा।

¹⁷ हेनाते इंञ अपे हन सेनुः लगाडिंञ पसींद तड हेना, हलि हुला तेंञ बदलो तेडा किदो? किदो जेंञ पसींद तड हेना, दुनिया रेनकू राः सोंच बिचार घयते “हूँ” मेनते कहनी केते, “एरोआ” मेनतेंञ कहनिया किदो?

¹⁸ भगवान भरोसवय लायिक गिआयू, अवुर इंञ हो भरोसवंञ लायिक गिआञूँ, इंञ “हूँ हूँ” मेनते कहनी केते, “एरोआ” मेनते कहनियय होड़ न लगे।

¹⁹ कहेकि भगवान होपोन ईसु मसीह कबोह “हूँ” अवुर “एरोआ” मेनते बनार याःते एरोय टेबोः एना, हें-नी राः बारे ते अले, अपे थरे ले परचार तेडा, मतलोब तीमुथियुस अवुर सिलवानुस अवुर इंञ हेंय राः बारे ते अपे राः बीच रेले परचार तेडा, हेंय “हूँ हूँ” मेनतेय कहनिया, हेंय कहनी गोत्तेड दो भगवान पक्‍का केड घयतेआ।

²⁰ कहेकि भगवान एमकेडा सींड़ जबान मनासीह “हूँ हूँ” मेनते कहनियय अवुर पूरा करे वाला हो हवे, हेनाते अबू भगवान बू बडेयवा तोलोग आमेन मेनते बू कहनिया, हेना ईसु मसीह राः दोवारा तेबू कहनिया।

²¹ अले, अपे सुदा मसीह रे मजबूत बुअय भनगवान हवे, अवुर भनगवान अले अनेज राः काम लगाडिय अभिसेक केडलेआ।

²² अवुर हेंय अनेज राः पवितर आत्मा अबू राः कोठी कया रेय रखो केते अबू हें-नी रेनकू होड़कू हवे मेनते मियाँटंग चीन्हिय ओवड बुआ, अबुय जबान वडबुआ हेना ञँमुआँ मेनते, पवितर आत्मा बयाना राः रूप तेय ओवड बुआ।

²³ इंञ भगवान ईञाअय गोवाही चड़ाँ केय ते सही मेतेंञ कहनी यडा कि अपे दुख ओवापे लगड अवुर दंड ओवापे लगड ईञाः इक्छा मेने दोहो गना, हेनाते इंञ कुरिन्थि सहर रे मेनेंञ मेजगाना।

²⁴ अपे न याःतेपे बिसवासे, न याःतेपे से-ने मेनते, अपे थरे हुकूम चलोकू अले ना लगे, अले पपाड़िआ कि अपे बिसवास रे मजबूत तेपे दोहोना, लेकिन अले अनापे राः खुसी लगड अपे सुदा ले काम तना।