1 थिस्स 1 - Kodaku

पवलुस राः जोहार

¹ इंञ पवलुस अवुर सिलवानुस अवुर तीमुथियुस, अले हनवरी थिस्सलुनी सहर राः कलीसिया रेनकू अपे लगड नआँ चिट्ठी ले लिखो यडा, भगवान अपाबू अवुर परभु ईसु मसीह रे कुआ, भगवान राः किरपा अवुर सान्ति अपे ञँमुः महल रे दोहोनू।

थिस्सलुनी सहर रेनकू राः बिसवास

² अले बिनतीः तोलोग अपे उहयर पेआ ले अवुर अपे सींड़कू लगड भगवान हरदम धन्यवाद ले ओवाया।

³ अले भगवान अपाबू थरे बिनतीः तोलोग नआँ सींड़ काम राः बारे तेले उहयर पेआ। अवुर अपे ईसु मसीह थरे पे बिसवास यडा हेनाते ईसु मसीह लगड पे काम केडा, हेना अवुर एटाः बिसवासिकू सहेता ओवाकू लगड परेसानी दोहो एना, हेंडे रेहो हेंकू मयाय तेपे सहेता वडकुआ। अवुर अबू रेनिय परभु ईसु मसीह फे-रिय मेजुः हेना असरा रे अपे थीर इदान पेआ, हेना हो हरदम उहयर केते भगवान धन्यवाद ले ओवाया।

⁴ एगा भाईकू, भगवान अपेय चुनो केडपेआ, अवुर भगवान अपेय दुलर पेआ।

⁵ अले लाय तेडा हेना सत अँजोम केते अपे जेर गोत्तेडा पे। अले भगवान राः टेबोः सीरिफ अनाले राः टेबोः ते मेने, लेकिन भगवान राः आत्मा राः सक्‍ति ते अपे राः मँझर रेले टेबोः तेडा। अवुर अपे लगड अले, अपे राः मँझर रे काःतेले दोहो एना हेना होपे पपाड़िआ।

⁶ अपे अखीर परेसानी तोलोग हो, खुसी ते बढ़ियाँः खभेर पे अपनो तेडा। नआँ खुसी पवितर आत्मा एमेयाँ। अवुर अले परभु तयोम तेले सेनियाडा। हेन घयते अपे हो अले तयोम तेपे सेनियाडा।

⁷ ने-ना राः चलते ते अपे मकिदुनिया अवुर अखया रेनकू बिसवासिकू ञेंलके पेते अपे घयतेकू बनो सकोआ।

⁸ परभु राः खभेर अपे राः दोवारा ते सीरिफ मकिदुनिया सहर अवुर अखया प्रदेस रे भर बेगर मिरीजा, अले जहाँ जहाँ ले सेनुआँ, अपे भगवान थरे पे बिसवास यडा हेना राः बारे तेकू लाय वलेआ। अपे बिसवास यडा हेना खभेर सगोर जघा रे मिरीज यना। हेना अँजोम केते अले अपे राः बारे ते ललाय लगड कनर जरूरी कोवाआ।

⁹ अपे तीमिन बढ़ियाँ ते अले लाय तेडा हेना खभेर पे अपनो तेडा। अवुर काःते अपे मुरतिकू पे बगी वते, सिरीतय अवुर जीवातय भगवान हनते पे लहटो एना। अवुर काःते अपे भगवान पे सेवा यडा, हेना नेकू सींड़कू अले कू लाय वताना।

¹⁰ अवुर अपे सरग वरी मेजुअय भगवान कोड़ा होपोन ईसु मसीह पे तँगी यडा। नेय गोजतन वरी भगवान जियो केडिया, ने-नी मेजुः तना दंड वरिय बंचो बुआ।