1 पतरस 1 - Kodaku

¹ इंञ पतरस ईसु मसीह रेनिय परेरित हवे, नआँ चिट्ठी भगवान चुनो केडकुआ हेंकू लगाडिंञ लिखो यडा, जोकि पुन्तुस, गलातिया, कपदुकिया, आसिया अवुर बितूनिया ते छितरो केनते परदेसिकू घयतेकू दोहोन तना।

² अपे भगवान अपा अनेज राः हुकूम मनो लगड अवुर ईसु मसीह राः लोहू ते इरची पे लगड पवितर आत्मा राः दोवारा तेय चुनो केडपेआ, नआँ सगोर भगवान पहील तेय तय तडा। अपे अखीर ते किरपा अवुर सान्ति ञँमुः महल रे दोहोनू।

मेन टोविजुआ असरा

³ अबू रेनिय ईसु मसीह अपत भगवान धन्यवाद पे ओवायू, हें-नी अबू थरे अखीर ते दया केनते नवाँ जीवानिय ओवड बुआ, ने-ना ते अबू मेन टोवी जुआ आसा ञँमकेना। अवुर ईसु मसीह गोजतन वरिय जियो केना ते अबू नआँ ञँमकेना।

⁴ अवुर अबू रेनिय भगवान वरी सरग राः हँक ञँमुः लगड बू असरा केना। नआँ आसीस भगवान अनेज रेनकू होड़कू लगड सरग रेय दोहो केडा, नआँ हँक कबोह एरो हनी एना, न गुरलोआ न हेना राः सोभा हनिआँ।

⁵ भगवान अनेज राः सक्‍ति ते अपे बढ़ियाँ तेय रखो केडपेआ, कहेकि अपे भगवान थरे पे बिसवास केडा। हेंय अपे पाप राः सजा वरिय बंचो पेआ। अवुर सगोर चीज तेय बंचो पेआ। अवुर नआँ बात दुनिया खतामुः तोलोगिय देखारेआ।

⁶ हेनाते अपे अब खुसीः तनापे भले न अपे निहों कनर कनारा दुख बिपेत राः चलते ते दुख सहेक पड़ोऊ, हेंडे रेहो अपे खुसी तेपे दोहोनू;

⁷ नआँ दुख बिपेत अपे राः बिसवास सही गिआ किदो कोवानू, हेना परखो लगड मेजुआ, नासुआ सोना घली सेंगेल रे गलो केतेकू ञें-लेआ कि सही गिआ कि कोवानू। सोना वरी हो किमती गिआ, हेना अपे राः बिसवास भगवान ञें-लेआयू कि सही गिआ कि कोवानू। फेर ईसु मसीह मेजुः रे बड़ाई अवुर महिमा, अवुर मान मरजाद ञँमुआँ।

⁸ अपे हेंय बेगर पे ञेंलेया, हेंडे रेहो अपे हेंय पे परेमिया, अवुर अब अपे हेंय मेने पे ञेंलियाडिया, हेंडे रेहो पे बिसवास यडा, हेनाते अपे हेना रे एयसा खुसी अवुर पे बहालीः तना कि टेबो गेरे घली हो मेन टेबोगुआ।

⁹ अपे ईसु थरे पे बिसवासेआ ते अपे राः आत्मा भगवान उबर यडायू।

¹⁰ भगवान अपेय बंचो पेआ मेनाआ टेबोः राः बारे ते पहीलाःकू भविस्यवक्‍ताकू अखीर कू छपा तेडा, अवुर कू जाँच पता तेडा, अवुर न राः बारे ते हेंकू पनाहिल तेकू लाये दोहो एनु। ने-ना टेबोः अपे भगवान राः किरपा तेपे ञँमकेडा।

¹¹ हेंकू थरे मसीहा राः आत्मा दोहोन दोहो एनु, अवुर हेंकू मसीहा दूखिय सहोआ, अवुर तयोम ते मान मरजादिय ञाँमा मेनाआँकू लाय दोहो एनु, हेंकू भविस्यवक्‍ताकू आत्मा इसारा तेडा, हेना कू छपाय दोहो एनु कि नआँ करे अवुर तिमीस होयाआ मेनते।

¹² भगवान नेकू भविस्यवक्‍ताकू नअय लाय वडकुआ कि नेकू अकू लगड मेने, लेकिन अपे राः बनोः चलोः लगड ईसु दूखिय सहोआ, हेना राः बारे तेकू लाये दोहो एनु। नेकू भविस्यवक्‍ताकू जो कुछ कू लाय तेडा, हेना टेबोः अब बढ़ियाँः खभेर लायकू लाय केडा। नआँ बढ़ियाँः खभेर पवितर आत्मा राः दोवारा ते सरग वरी मेजकेना। नआँ सगोर टेबोः राः बारे ते सरगदूतकू हो पपाड़ी लगड कू चहोः तना।

पवितर जीवन जियोः राः बुलाहट

¹³ हेनाते अपे न याःतेपे करोवे, जेयसे बुताः लगड मयंग कू तोल बड़ियड़ केआ, हेन घयते अपे राः सोच बिचार अपे राः कब्जा रेपे रखोवे, अवुर सँवचेती तेपे दोहोनू, अवुर ईसु मसीह मिड़ाः मेजुः रेय किरपा वपेआ, हेना रे पूरा पूरा असरा कोःते पे तँगियू।

¹⁴ अपे टहल अँजोम कू चोंडिजकू घयतेपे बनोऊ, ईसु मसीह रेनकू अनायिन पे बनोः रे बढ़ियाँः खभेर मेने पे पपाड़ी दोहो एनु, अवुर हेना तोलोग अपे खराब इक्छा तेपे से-ने दोहो एनु। अब न घयते अलोपे से-ने।

¹⁵ बल्कि जेयसे अपे रराअय पवितर गिआ, हेन घयते अपे हो अपे राः सगोर चाल बेहवार रे पवितर पे बनोऊ।

¹⁶ कहेकि धरमग्रंथ रे लिखल इदाना, “अपे पवितर पे बनोऊ, कहेकि इंञ पवितर गिआञूँ।”

¹⁷ अपे भगवान थरे पे बिनतीः तोलोग “ओ अपा” मेनते कहनी केते हेंय थरे पे बिनतीआ, हेंय बेगर पछपात ते सगोरकू राः अपन काम राः अनुसार तेय न्यायेआ, हेनाते अपे नआँ रे परदेसिकू घयते इदान पेआ हेना समय डर-भय तेपे बितोवे।

¹⁸ कहेकि अपे पपाड़ी तनापे अपे राः खराब चाल बेवहार जोकि दादी पुरखाकू वरी मेजुः दोहो एनु, हेना वरी नासुआ सोना चाँदी राः दाम एमकेते अपे बेगारिय छडो पेआ।

¹⁹ लेकिन अपे निरदोस अवुर निस्कलंक भेंड़ी होपोन मतलोब मसीहा राः अखीर किमतिआ लोहू तेय छडो केडपेआ।

²⁰ भगवान दुनियाय बनो तेड वरी पहील ते परभु ईसु मसीह अपेय बंचो लगाडिय चुनो तडिया, लेकिन अब अन्तिम जुग रे अपे लगाडिय देखर केना।

²¹ हें-नी ईसु मसीह राः दोवारा ते अपे भगवान थरे पे बिसवास यडा, हें-नी ईसु मसीह गोजतन वरिय जियो तेडिया, अवुर महिमाय ओवाडिया, हेनाते अपे राः बिसवास अवुर असरा भगवान थरे दोहोनू।

²² अवुर ईसु राः टेबोः जोकि सही गिआ, हेना मनो केते अपे राः मन पवितर केना, अवुर अपे ईसु मसीह थरे कू बिसवासेः हेंकू लालच ते अलो, लेकिन पूरा मन तेपे परेम कू।

²³ कहेकि अपे नवाँ जनम पे ञँमकेडा, हेना इंग आप कींञ वरी ञँमुआँ हेना नासुआ जीवन घयते कोवाआ, लेकिन भगवान राः जिवाता अवुर हमेसा दोहोना बचन ते नवाँ जनम पे ञँमकेडा।

²⁴ कहेकि धरमग्रंथ रे न याःते लिखल इदाना, “हर एक होड़कू घाँस घयगी अकू, अवुर हेंकू राः सोबहा बहा घयगिआ। हेना गोज्जोमा अवुर बहत झड़ो जोमा।

²⁵ लेकिन परभु राः बचन जुग जुग मेनते थीर ते दोहोना।” अवुर ने-ना बढ़ियाँः खभेर अपेकू लाय वडपेआ।