1 कुरि 1 - Kodaku

पवलुस राः जोहार

¹ इंञ पवलुस अपे कुरिन्थि सहर रेनकू बिसवासिकू जोहार केपे ते नआँ चिट्ठिंञ लिखो यडा। भगवान इंञ अनेज राः इक्छा ते ईसु मसीह रेनिय परेरित बनोः लगाडिय राःकेडिञाँ, अवुर अबू गति बिसवासी सोस्थिनेस भाई हो अपे जोहार मेनतेय कहनी वपे तना।

² इंञ कुरिन्थि सहर रेनकू, भगवान राः कलीसिया कू लगड नआँ चिट्ठिंञ लिखो यडा। भगवान अपे मसीह ईसु सुदा जुमो केपे तेय पवितर केडपेआ, अवुर पवितर ते दोहोन लगाडिय राःकेड पेआ, नेन घयते हेंय अबू रेनिय परभु ईसु मसीह राः ञुमू ते सगोर जघा रे बिनतीः हेंकू बिसवासिकू सुदाय करो केडा, हेंय हेंकू रेनिय अवुर अबू रेनिय हो परभु हवे।

³ अबू रेनिय अपा भगवान अवुर परभु ईसु मसीह किरपा वपे अवुर सान्तिय ओवापे।

पवलुस कुरिन्थि कलीसिया लगड भगवान धन्यवादिय ओवाया

⁴ मसीह ईसु सुदा पे मेसा यनाते भगवान अपे थरेय किरपा केना, हेनाते इंञ अपे राः बारे ते भगवान हमेसा धन्यावादिंञ ओवाया।

⁵ अपे मसीहा सुदा पे मेसा यनाते, अपे थरे आत्मिक जीवन रे कनर टेबोः राः कमी कोवाआ, मतलोब हेंय राः आत्मा जे टेबोः चेडपेआ, हे-ना लाय लगड अपे सक्‍ति ञँमकेना, अवुर हेंय राः टेबोः समझोकू लगड बुद्ही ञँमकेना।

⁶ कहेकि मसीहा राः बारे तेले लाय वडपेः हेना अपे थरे सही गिआ मेनते पक्‍का यना।

⁷ अपे थरे कनर बरदान राः कमी कोवाआ, अवुर अपे अबू रेनिय परभु ईसु मसीह मेजुः राः तक तक रेपेआ।

⁸ भगवान अपे अखरी दिन मेनते, मजबूत होय मजबूत पेआ, ताकि अबू रेनिय परभु ईसु मसीह होड़कू राः न्याये लगाडिय मेजुआ हेना दिन रे अपे बे-कसूर होड़कू पे दोहोनू।

⁹ कहेकि भगवान सच्‍चा गिआयू, हें-नी अपे अनेज होपोन अबू रेनिय परभु ईसु मसीह राः संगति रेय राःकेड पेआ।

कलीसिया रे फूट

¹⁰ एगा भाईकू, ईसु मसीह अबू रेनिय परभु हवे, हेंय राः ञुमू ते इंञ अपे थरेंञ अरजीः तना, अपे सींड़कू मीनियेंटंगाँः टेबोःपे टेबोऊ; अवुर अलोपे फट फुटोऊ, बल्कि अपे एक मन ते अवुर एक गूट तेपे दोहोनू।

¹¹ कहेकि एगा भाईकू, इंञ खलोए ओड़ाः रेनकू लाय वडिञाँ, अपे कलाहुः तनापे।

¹² ईञाः कहेक मतलोब नआँ हवे कि कोई कहनियाँ, “इंञ पवलुस रेनिय हवे,” कोई कहनियाँ, “इंञ अपुल्लोस रेनिय हवे।” कोई कहनियाँ “इंञ केफा रेनिय हवे,” अवुर कोई कहनियाँ इंञ, “मसीह रेनिय हवे” मेनते।

¹³ अच्छा, ए-पे लाय वञूँ, मसीहा खुधे खुधा तेय हटींग यनाय किदो? बेगारू, अपे लगड कुरूस रे पवलुस रकब एना किदो? किदो अपे पवलुस राः ञुमू ते बतिस्मा पे तिला तेडा?

¹⁴ इंञ भगवान धन्यावादिंञ ओवाय तना, अपे मेंडे किरिसपुस अवुर गयुस छोड़ कनय बतिस्मा मेनेंञ एमगाडा।

¹⁵ कनय अलो न घयते कहनिय जहानू कि अपे ईञाःकू चेलाकू बनोः लगड इंञ ञुमू ते बतिस्मा पे तिला केडा मेनते।

¹⁶ हे, इंञ स्तिफनास अवुर हेंय ओड़ाः रेनकू हो बतिस्मांञ ओवडकू दोहो एनु, नेकू छोड़ अवुर कनय बतिस्मांञ ओवाडा मेनते इंञ मेनेंञ उहयर यडा।

¹⁷ कहेकि मसीहा इंञ बतिस्मा एम लगड बेगारू, बल्कि बढ़ियाःँ खभेर लाय लगाडिय कुलकेडिञाँ, इंञ बढ़ियाँ खभेर लाय तोलोग होड़कू राः गियान राः टेबोः मेनेंञ उपयोग गडा, अगर इंञ नआँ घयतेंञ लाय यड रेदो, मसीहा कुरूस रेय गोजेन हेना होड़कू राः जीव रे एरो काम तेड मेनू।

मसीहा भगवान राः गियान अवुर सक्‍ति हवे

¹⁸ जे जे बिलोः राः होर कू सबकेडा, हेंकू लगड मसीहा कुरूस रेय गोजेन हेना खभेर, बे-अकील राः टेबोः घयगिआ। लेकिन अबू भगवान उबर यडबुआ, हेंकू लगड नआँ भगवान राः सक्‍ति हवे।

¹⁹ कहेकि धरमग्रंथ रे नआँ घयते लिखल इदाना, “इंञ गियानवनकू राः गियानिंञ नासेआ; अवुर हुसियारकू राः हुसियारिंञ बेकारा।”

²⁰ करे कुआ बुद्धमानकू? करे कुआ एहूदी नियम चेचेडकू? करे कुआ नआँ चँवदीस रेनकू अड़ा चवकीःकू, भगवान नआँ चँवदीस राः गियान बे-कमा बेगारिय बनोआँ किदो?

²¹ कहेकि भगवान अनेज राः बुद्ही ते एयसाय करो केडा कि होड़कू तेनेमेन बुद्धमानकू दोहोनू, लेकिन हेंकू अकू राः बुद्धमानी ते भगवान एरो कू चिन्हों सको एना। हेनाते भगवान, अले मसीहा राः बारे तेले लाय यडा, हेना बढ़ियाँः खभेर रे बिसवासेःकू उबर हेना बढ़ियाँ वडिया, भगवान मेने चिन्हों कू न चँवदीस रेनकू होड़कू, अले लाय यड हेना बढ़ियाँः खभेर, बे-अकील राः टेबोः घयतेकू अड़ींग वआ।

²² एहूदी कुदो नआँ बढ़ियाँः खभेर बे-अकील राः टेबोः हवे मेनते कू अड़ीगा, कहेकि नआँ खभेर सीरित गिआ मेनते अड़ींग लगड चिन्ह कू ञँम बेड़ाआ, अवुर उनानिकू दो गियान राः बारे ते अँजोम गिसन कुआ।

²³ लेकिन अले दो कुरूस रेकू रकब तेडिया मसीहा राः बारे तेले परचार यडा। नआँ बढ़ियाःँ खभेर अखीर एहूदिकू मेने कू बेस वआ, हेंकू मसीहा गोजुआ मेनते मेने कू सरी वआ। अवुर अनजातकू लगड नआँ बढ़ियाँः खभेर बे-अकील राः टेबोः घयगिआ।

²⁴ लेकिन भगवान राःकेड कुः हेंकू, चहे एहूदिकू चहे उनानिकू लगड मसीहा भगवान राः सक्‍ति अवुर गियान राः टेबोः हवे।

²⁵ मेने बिसवासेःकू मसीहा कुरूस रेय गोजेन हेना, भगवान बे-अकील तेय काम केडा मेनते कू पसींदेआ। लेकिन अपन आप बुद्धमान गिअंञ मेनते कू पसींदेआ, हेंकू वरी हो भगवान अखीर बुद्धमानी तेय काम केडा। अवुर मेने बिसवासेःकू भगवान अनेज होपोन गोजुः लगाडिय कुलतेडिय हेना, कमजोर होड़ काम केड घयतेकू पसींदेआ। लेकिन अपन आप बहगँड़ गिअंञ मेनतेय पसींदेआ, हेंकू वरी हो भगवान अखीर बल तेय काम केडा।

²⁶ एगा भाईकू, पसींदे पे, भगवान अपेय राःतेड पेआ, हेना तोलोग अपे राः ची दसा दोहो एना। अपे मेंडे केय झन होड़कू राः नँजेर रे बुद्धमान मेने कू दोहो गना, अवुर न बडे बडे होड़कू पे दोहो एना, अवुर न बडे ओड़ाः तेनकू दोहो एना।

²⁷ लेकिन भगवान दुनिया रेनकू बोया होड़कुय चुनो केडा, ताकि बुद्धमान गिअंञ मेनते पसींदेःकुय लजियो। अवुर भगवान दुनिया रेनकू कमजोर होड़कुय चुनो केडा, ताकि अपन आप बहगँड़ गिअंञ मेनते पसींदेःकुय लजियो।

²⁸ भगवान दुनिया रेनकू नीच होड़कू अवुर मेने कू बेस वकुआ हेंकू, अवुर खास कोवा कुआ हेंकुय चुनो केडा, ताकि अले खास होड़कू हवे मेनते फुलयकू राः फुलायिय बेकारू।

²⁹ ताकि भगवान राः मड़ंग रे कनय अलोकू फुलय सकोऊ।

³⁰ भनगवान अपे मसीह ईसु सुदाय मेसा केडपेआ, अवुर हें-नी अबू लगड भगवान राः गियान हवे, हें-नी अबू भगवान राः नँजेर रे धरमी अवुर पवितर होड़कुय बनो केडबुआ। अवुर हें-नी अबू पाप वरिय छडो केडबुआ।

³¹ हेनाते नआँ घयते धरमग्रंथ रे लिखल इदाना, “अगर कनय फुलय रेदो, परभु राः कामिय फुलयवा।”