Prɔvabs 9 - Krio Fɔs Oli Baybul

Fɔ Gɛt Sɛns Ɛn Fɔ Ful

¹ Sɛns tan lɛkɛ pɔsin we bil in os, dɔn i put sɛvin pila fɔ sɔpɔt am.

² I kil animal fɔ mek pati, dɔn i mek gud pɔnch wayn ɛn le tebul.

³ I sɛn in uman savant dɛn na dɛn impɔtant say dɛn na di siti fɔ go tɔk se,

⁴ ɛnibɔdi we nɔ machɔ ɛn we nɔ gɛt sɛns, lɛ i go di pati,

⁵ fɔ go it di it ɛn drink di pɔnch wayn we i dɔn miks.

⁶ Dɛn se if dɛn want fɔ ɛnjɔy dɛn layf, lɛ dɛn lɛf fɔ kip kɔmpin wit dɛn wan we nɔ gɛt sɛns; ɛn lɛ dɛn tink gud.

⁷ Udat kɔrɛkt pɔsin we nɔ de tek natin mek natin de fɛn kɔs fɔ insɛf. We yu kɔrɛkt bad pɔsin, na bad nem yu de fɛn fɔ yusɛf.

⁸ Nɔ kɔrɛkt pɔsin we nɔ de tek natin mek natin; if yu du dat i go et yu; bɔt if yu kɔrɛkt yu gɛt sɛns, i go rɛspɛkt yu.

⁹ If yu tich pɔsin we gɛt sɛns, i go gɛt mɔ sɛns; if yu tich pɔsin we de waka tret na PAPA GƆD in yay, i go no bɔt mɔ tin dɛm.

¹⁰ If yu want fɔ gɛt sɛns na layf, di fɔs tin we yu fɔ du na fɔ biliv PAPA GƆD ɛn fred am; if yu sabi PAPA GƆD, yu dɔn gɛt sɛns.

¹¹ If yu gɛt sɛns yu go liv lɔŋ na wɔl, ɛn yu go de te yu ol.

¹² Udat gɛt sɛns, gɛt sɛns fɔ insɛf; udat nɔ gri lan sɛns, nain nɔmɔ go sɔfa.

¹³ Ful na lɛk dɛn lawzi uman we nɔ gɛt wan shem.

¹⁴ I kin sidɔm nain domɔt, ɔ sidɔm na dɛn impɔtant ples na di siti,

¹⁵ de kɔl dɛn wan we de pas, we de go abawt dɛn biznɛs se,

¹⁶ “Una we nɔ machɔ ɛn we nɔ gɛt sɛns, una kam ya!

¹⁷ A no se una de ɛnjɔy fɔ it ɔda man it, tin we na tif tin kin swit.”

¹⁸ Bɔt di wan dɛn we de rɔnata am nɔ no se na trap we de kil dɛn de go, ɛn dat, dɛn wan we dɔn fɔdɔm nain trap, dɔn go ɔdɔun.