Prɔvabs 5 - Krio Fɔs Oli Baybul

Wɔnin Fɔ Pul Yay Pan Pipul Wɛf

¹ Mi pikin, pe atɛnshɔn ɛn lisin to di sɛns we a de tɔk fɔ lɛ yu go ɔndastand.

² Dis go mek yu no aw fɔ biev yusɛf, ɛn di wɔd dɛnsɛf we go kɔmɔt na yu mɔt go sho se yu gɛt sɛns.

³ Pipul wɛf we gɛt swit mɔt tan lɛkɛ ɔni; in kis swit lɛk fayn ɔyl,

⁴ bɔt wɛn i chenj pan yu, i go bita lɛk rut ɔ shap lɛk nɛf we dɛn jɛs shap.

⁵ If yu fala am, yu go go ɔdɔun; di rod we i de waka na day rod,

⁶ i nɔ de waka na rod we de gi layf; i jɛs de drif de go, ɛn nɔ no usay i de go sɛf.

⁷ Una dɛn bɔypikin dɛn, una lisin to mi, ɛn una nɔ fɔgɛt wetin a de tɔk.

⁸ Una nɔ go nia dis kayn uman ya! Ɛn nɔ go nia in os sɛf!

⁹ Ɔ nɔ so yu go lɔs yu rɛspɛkt, ɛn day fɔ natin usay dɛn nɔ de sho masi.

¹⁰ Ɛn wɛn dat apin, na trenja dɛn go tek ɔl yu prɔpati, ɛn ɔl wetin yu dɔn lebɔ fɔ go go to trenja;

¹¹ wɛn yu go si se yu dɔn dɔn, ɛn yu bɔdi nɔ ebul du natin igen,

¹² na da tɛm de yu go se if a bin no. Yu aks yusɛf se, “Wetin mek a nɔ de lan lɛsin? Wetin mek a nɔ bin de yɛri wɔd?

¹³ A nɔ bin de pe atɛnshɔn to wetin mi ticha dɛn bin de tɛl mi mayn, a nɔ bin de yɛri wɔd.

¹⁴ Naw luk di kaynaba shem ɛn disgres we dɔn mit mi, ɔlman de laf mi.”

¹⁵ Lan fɔ drink wata na yu yon bokit, lɛ i kɔmɔt na yu yon wɛl.

¹⁶ Yuwant fɔ de skata yu sid ɔlɔbɔt na trit?

¹⁷ Nɔ! Lɛ i bi fɔ yu wangren nɔmɔ, nɔto fɔ trenja.

¹⁸ Yu fɔ liv api wan wit yu wɛf, ɛnjɔy di uman we yu mared wɛn una yɔŋ.

¹⁹ I fayn lɛk tin fɔ it, ɛn in bɔbi de mek yu gladi ɔltɛm; wans yu tes in lɔv yu nɔ go wan lɛf am.

²⁰ Mi pikin, wetin fɔ mek yu put an pan uman we nɔto yu yon? Wetin mek yu fɔ lidɔm wit ɔda man wɛf?

²¹ PAPA GƆD de si ɔl wetin pɔsin de du, ɛn ɛnisay we i de go, i de wach am.

²² Di bad tin we pɔsin de du na trap, ɛn na da vɛri trap de de kech am.

²³ I de day bikɔs i nɔ ebul kɔntrol insɛf. Nain ful de kɛr am go nain grev.