Neum 1 - Krio Fɔs Oli Baybul

¹ Neum we kɔmɔt Ɛlkɔsh in vishɔn we i bin si ɛn tɔk bɔt Ninivɛ

PAPA GƆD Vɛks Bad Bad Wan Pan Ninivɛ

² PAPA GƆD want wi fɔ lɛk In nɔmɔ bikɔs i jɛlɔs bad; we i vɛks I kin pɔnish in ɛnimi dɛn. We i vɛks fɔ tru, i de dil wit ɔl udat ambɔg am.

³ PAPA GƆD na PAPA GƆD we pawaful i peshɛnt i kin mek shɔ se udat de du bad gɛt di pe we i de fɛt fɔ. Wi de si am insay di briz we de blo; di klawd dɛn na di dɔti we in fut de mek.

⁴ Na tɔk nɔmɔ i go tɔk pan di si ɛn i go dray. Ɔl di watasay dɛnsɛf go dray. Di fil dɛn na Beshan ɛn Mawnt Kamɛl wit di flawa dɛn na Libanɔn go wida.

⁵ Di mawnten dɛn go trimbul, dɔn di il dɛn go mɛlt bifo in yay; di ath ɔl go trimbul usay i de, ɛn di wɔl wit in pipul dɛnsɛf go trimbul.

⁶ Udat ebul tinap bifo PAPA GƆD we i vɛks? Udat ebul am we i dɔn vɛks? We i vɛks i de blez lɛk faya, ivin dɛn big ston kin tɔn grabul-grabul usay i de.

⁷ PAPA GƆD na gud PAPA GƆD, i de pul pɔsin kɔmɔt pan trɔbul; i nɔ de lɛf udat go to am fɔ ɛp am to insɛf.

⁸ Lɛk aw wata de kɛr pɔsin go, na so i de nyamanyama in ɛnimi; dɛn; dɛn nɔ go gɛt nɔwe fɔ ayd.

⁹ Wetin yu de plan fɔ PAPA GƆD? I go dɔn wit yu kpatakpata. Yu nɔ go de fɔ plan bad fɔ am tu tɛm.

¹⁰ Lɛk aw chukchuk we taŋul de bɔn na faya na so una dɛn drɔnkɔman dɛn gɛt fɔ tan.

¹¹ Na frɔm una sɔmbɔdi kɔmɔt we plan bad fɔ PAPA GƆD.

¹² Dis na wetin PAPA GƆD se, I se i lɛk sɛf di Asirian dɛn bɔku ɛn gɛt pawa lɛk wetin, i go pwɛl dɛn kpatakpata ɛn dɔnawe wit dɛn. I se i bin dɔn mek una sɔfa bɔt i nɔ go du am igen

¹³ I se in go pul dɛn kɔmɔt biɛn una ɛn dɛn nɔ go ebul una igen

¹⁴ Na dis PAPA GƆD se bɔt di Asirian dɛn: I se nɔbɔdi nɔ gɛt fɔ lɛf wit dɛn nem ɛn i pwɛl ɔl dɛn gɔd dɛn we dɛn bin dɔn mek, we de insay dɛn os dɛn we dɛn put dɛn. Infakt sɛf i se in de mek wan big bɛriŋrɔn fɔ dɛn as dɛn tu bad.

¹⁵ Lɔd o! Na wi tɛm dɔn kam so. Sɔmbɔdi de pantap di mawnten de ala se di Asirian dɛn yon dɔn dɔn, so una fɔ kɔntinyu wit una sɛlibreshɔn ɛn gi PAPA GƆD wetin una bin dɔn se una go gi am bikɔs i go nyamanyama di Asirian ɛn dɛn nɔ go ambɔg una igen