John 21 - Sei di Uka Ago Ruaka di Buka Bedakai

Iesu yaku usi dina vene 7 rofu ogau niyo

¹ Mina usi Iesu dudusa ini usi dina vene rofu Tiberias moka daidai tora adinari ogau niyo. Mina bi yomakai vata niyo:

² Minari bi Simon Peter, Thomas (ini roka ka bi Kakafasina), Nathanael (Cana Galilee amiye), Zebedee di mida ma ini usi dina vene remanu.

³ Simon Peter yaku niyo, “Na bi kimai regida.” Niyadi, “Una ka yasa baegifa.” Ye bosi bouti keu riyadi, idu mina urusari bi yokoi moina de reyadi.

⁴ Uriyaku gorogoro Iesu moka daidai tora seriri are reyo, idu ini usi dina vene bi de vei mama reyadi.

⁵ Mina dada nikaiteyo, “Nai mida mida, oyena be moiyadi ba ide?” Nikabai resi niyadi, “Ide.”

⁶ Ma niyo, “Reke moisi bouti di vana rama rofu younesi be moigedi.” Ye reke younegasa bi rutu rei baena anua reyadi, adina bi oyena tau gade moiyadi.

⁷ Mina dada usi dina amiye kaere Iesu uka maro bi Peter rofu niyo, “Mina bi Varika amiye!” Ye Simon Peter bi faisara dada, Varika amiye mini neidesi ini bou varuka ini gagabari misi bi moka daidai torari sokau reyo.

⁸ Idu usi dina vene bedakai reke oyena tau gade vata baeyo, mina moi rutu resi bouti keu riyadi, adina kono atafu maike de, 90 metre kana.

⁹ Ye rou rigasa bi minari ita guruma oyena fafau ma beredi be veyadi.

¹⁰ Ma Iesu yaku niyo, “Oyena be na mafa ruika moiyadi mini.”

¹¹ Mina dada Simon Peter bouti keu risi reke oyena tora vata baeyo mina konori moi rutu reyo; ini naba bi 153. Bi tau gade, idu reke uvesi de reyo.

¹² Iesu yaku niyo, “Baesi iri-iri refo.” Ini usi dina vene ka ini nikaitena “Ya bi kaere?” bi mokena de reyadi, adina diba niyadi be Varika amiye mini.

¹³ Ye boi nesi beredi moisi maro ma oyena ka makai reyo.

¹⁴ Mina bi uru regode Iesu ini usi dina vene rofu ogau niyo ini muyena gutuna rae rena fufutari.

Iesu ma Peter

¹⁵ Iruku iriyadi koina niyori, Iesu yaku Simon Peter nikaiteyo, “Simon, John di ubama, ya besa na rofu uka maisa mina vene kana ba ide?” Ma nikabai reyo, “Yo, Varika amiye, ya ya diba ya ura reida.” Ma Iesu niyo, “Nai mamoe mida mida vana re.”

¹⁶ Dudusa uru remanu ina rofu niyo, “Simon, John di ubama, na rofu uka maisa ba ide?” Ma niyo, “Yo, Varika amiye, ya ya diba ya ura reida.” Ma niyo, “Nai mamoe dogo re.”

¹⁷ Ma uru regode ere niyo, “Simon, John di ubama, na ura reisa ba ide?” Kamini Peter bi iriyeduka reyo, adina bi uru regode nikaiteyo, “Na ura reisa ba ide?” Ye nikabai reyo, “Varika amiye e, ya bi beika baika tau gade ya diba; ya ya diba ya ura reida!” Ma niyo, “Nai mamoe mida mida vana re.

¹⁸ Rama iniye ya nida, ya goduari bi ya kaya farasi resi goidu digi ura regamo bi digamo. Idu ugava nigasa vana roto rigiya, ma amiye be ya farasi resi bi goidu digi ura de regiyari, bi ya afei digedi.”

¹⁹ (Mina nigamo bi Peter ini gokai muyesi Sei di roka moi odoro rigo oteimagi.) Mina nisi ka niyo, “Na usi bae!”

Iesu ma ini usi dina vene be

²⁰ Peter kero resi usi dina amiye kaere Iesu yaku uka magamo, bi usi diyo mina veyo—mina bi amiye kaere Iesu fafau kokobari etebe rigasa iruku irisi nikaiteyo, “Varika amiye, kaere yaku ya siri rego?”

²¹ Ye Peter yaku mina vegasa bi Iesu nikaiteyo, “Varika amiye e, yomina amiye bi gokai?”

²² Kamini nikabai reyo, “Vegu amebigo mamo na baegida mina ura regida vonisi, bi ya rofu bi gokai? Na usi bae!”

²³ Ye usika ourena vene fogori sina yokoi vai resi niyadi mina usi dina amiye bi de muyego; idu Iesu bi diya muyego ina rofu de niyo, idu, “Vegu ameibobigo bogo na baegida mamo mina ura regida vonisi, bi ya rofu bi gokai?”

²⁴ Mina bi usi dina amiye kaere mina beika baika rofu niokusi mina bura reyaka. Ma una una diba ini niokuna ago bi rama.

Ago metona

²⁵ Ye Iesu yaku ka beika baika tau reyo. Ma yokoi yokoi bura reyagaduri, bi nai mokenari kono tora noibanu bi mina bura rena buka moi gira de reyagadu.