John 19 - Sei di Uka Ago Ruaka di Buka Bedakai

¹ Kamini Pilate Iesu afei boyo ma buburu vai reyadi.

² Ye iya rededi vene yabo imiye maena moi mekuna resi kini kana ada bou ini adari aesi varuka purple aku masi

³ ina rofu bosi niyadi, “Jew vene di kini o!” Resi ini neri famaradi.

⁴ Ma Pilate dudusa desi niyo, “Vefa kumo, na yaku ya rofu afei yaku deida, ye vegu no ini ideri yokoi de baku reyaka diba niyagane dada.”

⁵ Ma Iesu yaku degasa imiye maena kini kana ada bou ma varuka purple akuyo ma Pilate ina vene rofu niyo, “Amiye bi mini!”

⁶ Mina dada Sei ma amiye utari naivo vene di varika vene ma naivo naivo vene vegasa imuna niyadi, “Satauro ikoko re, satauro ikoko re!” Idu Pilate yaku niyo, “Ya kaya moisi satauro ikoko refa; na bi vegu no yokoi ini ideri baku de reyaka dada.”

⁷ Jew vene nikabai reyadi, “Una bi ago gira nufa ma mirona ago gira dada bi muyeyaine, ina kaya moi Sei di mida niyo dada.”

⁸ Kamini Pilate mina ago neidegasa besa ori resi

⁹ ma ini ourefeidena yava torari dairi bosi Iesu nikaiteyo, “Ya bi goidu gutuna baeyo?” Idu ago yokoi de niyo.

¹⁰ Dudusa niyo, “Na nikabai regiya ba? Ya diba de na bi ya erufugi o satauro ikoko regi di vava nufa ba?”

¹¹ Ye nikabai reyo, “Sei ya rofu vava de maro vonisi, ya bi vava na fafau bi de. Mina dada kaere yaku yi vanari na aeyo ini vegu no bi tora iniye.”

¹² Mina usi Pilate erufugi di ida maina reyo, idu Jew vene imuna niyadi, “Ya mina amiye erufugiya vonisi, ya bi Caesar di asini de! Kaere yaku nibigo bi kini, Caesar rofu ruda rego.”

¹³ Ye Pilate mina neidegasa Iesu afei desi kota rena amena sana fafau ameinu reyo. Mirona sana roka nidedi “Fore ida”. (Hebrew agori mina bi “Gabbatha”.)

¹⁴ Kamini bi Ferei ebu rena irakuna di dogo dogo rena meda, meda tobo niyori kana. Ma Jew vene rofu niyo, “Yi kini bi mini!”

¹⁵ Idu imuna niyadi, “Afei bosi satauro ikoko re!” Ye nikaiteyo, “Na bi yi kini satauro ikoko regida ba?” Ye Sei ma amiye utari naivo vene di varika vene nikabai reyadi, “Uni kini bi Caesar maka!”

¹⁶ Mina usi iya rededi vene di vanari aeyo satauro ikoko reyaganedi. Mina resi moiyadi

Iesu bi satauro ikoko reyadi

¹⁷ ma yakusi iniye ini satauro uakaisi gagani roka “Ada girika di sana” okiyo. (Hebrew agori bi roka nidedi “Golgotha”.)

¹⁸ Minari satauro ikoko reyadi; remanu ka makai reyadi, berou berouri ma Iesu utari.

¹⁹ Ma Pilate yaku ka bura reyo ma satauro yabo odorori aeyadi, bi yomakai bura reyo: “Iesu Nazareth amiye, Jew vene di kini.”

²⁰ Jew vene tau yaku mina bura veyadi, adina mina sanari satauro ikoko reyadi bi taoni atafuri; Hebrew, Latin ma Greek agori bura reyadi.

²¹ Kamini Jew vene di Sei ma amiye utari naivo vene di varika vene Pilate rofu niyadi, “Bura ga re ‘Jew vene di kini’, idu, ‘Mina amiye yaku niyo, Na bi Jew vene di kini.’ ”

²² Ma nikabai reyo, “Beika bura reyaka bi bura reyaka mini.”

²³ Iya rededi vene yaku satauro ikoko regasa ini varuka iniye yokoi yokoi tetevai regi moisi bado 4 ri aeyadi; ina ka ini ideri varuka moiyadi. Mina ideri varuka bi odorori egona rofu dabua yokoi maka dudu vadiyo,

²⁴ ye iniye iniye rofu niyadi, “Uvesi ga renadi, idu laki isira renadi kaere moigo.” Mina yaku Sei di ago moi rama aeyaine; mina niyo: “Ini fogori nai varuka tetevai resi nai varuka rofu laki isira reyadi.” Ye iya rededi vene yaku makai reyadi.

²⁵ Ma Iesu di nono ma ini rasini Mary, kaere bi Clopas di rema, ma Mary Magdalene bi satauro atafuri are reyadi.

²⁶ Ini nono ma ini usi dina amiye kaere uka maro atafuri are regamadi, ne rei vegasa niyo, “Nono, yi mida mini!”

²⁷ Resi ini usi dina amiye rofu niyo, “Yi nono mini!” Ma mina meda nemokori maka mina usi dina amiye yaku ini yavari afei boyo.

Iesu di muyena

²⁸ Gabi mamo tau vakoi rei vau reyadi diba niyo, ye Sei di ago moi rama aeyaine dada, “Na bi koru vaiyaka,” vo niyo.

²⁹ Waini ru siua vata baeyo bi minari amegamo; ye mina waini viniga dudu sipanisi vata baesi yabo roka hyssop tetekari tete risi ini venari moi odoro reyadi.

³⁰ Waini viniga moigasa niyo, “Kamini koina niyo!” Mina nisi kuri agu risi ini vima maro.

Iesu di aveta imiyadi

³¹ Jew vene Pilate usa niyadi, bi satauro ikoko reyadi vene ini yuka uroki resi ini roaita moi soka regedi, bi dogo rena di medari dada, ye roaita bi Sabati medari satauro odoro de fereyainedi; mina bi Sabati meda tora dada.

³² Mina dada iya rededi vene baesi Iesu sa satauro ikoko reyadi ouresi amiye ma amiye berou eta rofu di yuka uroki reyadi,

³³ idu Iesu rofu baesi veyadiri, bi sena muyeyo, bi ini yuka de uroki reyadi.

³⁴ Ye iya redo amiye yokoi yaku ini aveta ora dudu imiyo ma minari maka dava ma koru rausi reyadi.

³⁵ (Amiye kaere mina veyo, bi niogau reyo ma ini niogau rena ago bi rama; adina diba nido bi ago rama nido, ye ya ka mokena vari gira aeyaine dada.)

³⁶ Adina mina vata niyadi, Sei di ago moi rama aeyaine dada: “Ini nena yokoi de uroki regedi.”

³⁷ Ma dudusa Sei di agori nido: “Imiyadi amiye bi vegedi.”

Iesu guri aeyadi

³⁸ Kamini mina usi, Arimathea amiye yokoi roka Joseph yaku Pilate rofu Iesu di roaita moi digi usa niyo. (Ina bi Iesu di usi dina amiye yokoi, idu sui dudu, Jew vene ori reyo dada). Ma fereyo, mina dada baesi ini roaita moi diyo.

³⁹ Ma Nicodemus, kaere sena urusari Iesu baku reyo, ka bi myrrh ma aloe moi fui resi moi baeyo; ini toe bi 33 kilogramme kana.

⁴⁰ Mina dada ini roaita moisi muramura safisa varuka buni dudu kumu riyadi, Jew vene roaita guri aena toutou kana.

⁴¹ Ye mina satauro ikoko reyadi sana ideri bi muro yokoi; muro ideri bi kono guri ruaka, muyena roaita yokoi mina ideri aena kode.

⁴² Guri aeyadi sana atafuri, ma Jew vene di dogo rena di meda dada, ini roaita minari aeyadi.