KOLOSSI 1 - ÜJAO LAITEP (BSI)

Mongmei Langwin

¹ Paul, Kahwange mongpu kaiye Khrista Jesu lampu, hüyange teman jeiheinao Timothy mepu -

² Kolossia me ngohpu Khrista me üjaolan hüyange monghümpu jeiheinaolan tangte; Teman Üpa Kahwang mepu numan tangte shüpshe hüyange chingmei ngohtüoh.

Minyong Phawe Yoppu

³ Toman-e numan jingne jinte yoppe, teman Youngwanpa Jesu Khrista Üpa Kahwang te minyongpu phanang.

⁴ Hangjingne Khrista Jesu me numan ütinglakpu toman-e jaiyangki hüyange hanghepa kenpu üjaolan üshei jingne numan me ngoh,

⁵ hangjingne numan jingne wangdang me yowe angpu monghümlak ngoh. Tüomepu numan-e üshongpe jai, hüyange pungao ümei ütingpa ngao numan tangte pei.

⁶ Hüyange hangke pungao ümei kahtoknyu üshei me ülick licknang hüyange jaalunnang, hüke hanghepa nyih me numan-e Kahwang shüpshe jeng ütingme jai hüyange shing, tüopa nyih mepu numan yo me-o pungao ülick licknang.

⁷ Hangjingne toman shaoshanpa mongken shümpa Epaphras, ao toman jingne ütinglakpu phei Khrista shaoshanpa ne ngohnang, Imepu numan-e pungao ümei shing,

⁸ hüyange üne-o Iye Yaha me numan kenpu tomante shingne tam.

⁹ Tüokheima tüopa ngao jaipu nyih mepu toman-e numan jingne yelakpe yoppe tongnang. Yaha konngao hüyange teishingpu shingpu üshei me Iye mongpu kaiye numan maawe tamlak jingne,

¹⁰ Youngwanpa me wangngoipu üyin ne woilak jingne, Ime lanshe moiman-e tamme, toimei üshei me ülick lickke hüyange Kahwang shingpu me jaalunlak.

¹¹ Hüyange mongongpu phei laowe nün-okpu hüyange nün-okpu wong üshei jingne I müktishiwa üngan kih-e wong üsheiye wongnangne tamlak jingne;

¹² hüyange Üpa, aowe wangngai me üjaolan moth teitampalanne mengne teman wangngoine tam, numan-e I min yonglak jingne taowe yopnang.

¹³ Hangjingne Iye wangnyak üngan mepu teman yin hüyange yoiye kenpu Ha ahngching me teman yahye-e ang;

¹⁴ Ime teman yintamlak ngohnang, tüopa-a teman ünu winpu.

Shetahpupa Khrista Toishao

¹⁵ Khrista-a ye-nge okpu Kahwang moung, lingengaipu üshei me üwangpa ha;

¹⁶ hangjingne wangdang me hüyange kahtoknyu me toi üshei, ngepu hei ye-nge okpu hanghe ngoh, ahngpa shotjing jeyah, ahngchinglan jeyah; ükengnyulan jeyah, wongpheipu lan jeyah, üshei Ime ling; I kaiye hüyange I jingne, üshei lingengai yangki.

¹⁷ Hüyange I lampheli üshei shaome ngoh, hüyange Ime lampheli tükke ngohnang.

¹⁸ Hüyange püm, hüke bumeinok tangme üshanga I. Shemin lamphe me I ütahpa ne menglak jingne, I ükongwang hüyange lipu yo mepu üwangpa ha.

¹⁹ Hangjingne Ime Kahwang wangngoipu üshei moimanne linglak jingne,

²⁰ kahtoknyu me ngohpu jeyah, wangdang me ngohpu jeyah, üshei I me tangpem iy kaiye chingmei linge, Kahwangpawe yoi ha kaiye teimeine tam.

²¹ Hüyange numan hipak ja me toi ümeng me kenmongme wepa ne menge yanne ngoh,

²² tüoyangpoi sha-a numan üjao, üko üshang yenang, hüyange ümeng yenangpe I shaome omne tamlak, Iye yoi mei pümme lipu kaiye numan phei mongkenhahjieng yangki.

²³ Wangphang me ngohpu lingengaipu üshei tangme konnyüopu hanghepa pungao ümei numan-e jai, hüyange tao, Paul, hanghepa jing shaoshanpa ne meng, tüopa pungao ümei monghümpu mepu numan-e yepope ütinglakpu me yelakpe mongjüonge yongma-a, numan I sheshao me omne tamlak.

Bumeinokte Paul-e Shaoshanpu

²⁴ Sha-a numan jingne ü-shange pongpu me tao mongmei nang, hüyange Khrista shangpu hanghepa towe ngohnang, tüopa me ü meitam ü-mei me I püm, hüke bumeinok jingne taowe wangngoi tamnang;

²⁵ tüopa ngao ngaiye tamlak jingne numan jingne Kahwange üte phapu shaoshanpu toi kih-e, tao tüopa bumeinok shaoshanpa ne meng.

²⁶ Kahnyingwüngha jintokte jin hüyange wangpeng maawe lowe ngoh, hüpoi sha-a I üjaolante ütahte ngaiteki.

²⁷ Hüyange yinhulan yo me tüopa kahnyingwüngha müktishiwa toinyuwa hanghe, tüopa üjaolan te shingne tamlak Kahwange monghah-e ngoh; tüopa lowe angpu ngaowa numan me ngohpu Khrista, Ime müktishiwa monghümlak.

²⁸ Toman-e kahta lili Khrista me wangngoi lingtamlak jingne konngao üsheiye kahta lilite nyüowe hüyange kahta lilite henge toman-e Khrista pongne tamnang.

²⁹ Hüyange tüopa jingne aowe üte üngan kaiye toi lingnang Iye lingpuke taowe-o hokke toi lingnang.