Prok 1 - Novo Korar NT (BSI)

¹ Jezu Kristan prokasoilem tem hea pustokar boroil’lem asa: Rokddea-rokddem kitem-kitem ghòddchem asa, tem Apleam sevokank dakhounk, hi prokasnni Tannem Deva koddchi ghetli. Aplea dutak dhaddun Jezun ti prokasnni Aplea sevoka Juanvak kollit kelea.

² Apnnem dekhlam titlem-i, ho Juanv hanga sangta ani oxem Devachea utrak ani Jezu Kristan dil’lê govaikek sakxi dita.

³ Ieuncheô asat team ghòddnneancho kall lagim pavla. Hea pasot jim konn hem bhakit vachtat, ani jim konn tem aikotat ani tantum boroil’lem asa tem palltat, tim subhagi!

Sat Povitr-Sobhank Noman

⁴ Aziechea Prantantleam sat povitr-sobhank Juanv he sondex dhaddta. Zo asa, Zo aslo ani Zo ieuncho asa, To, Tachea xinvasona fuddem asat team sat atmeam borabôr, tumkam Aplo mogacho axirvad dium ani xantin bhorum.

⁵ Khatrecho Sakxi, mel’leam modlo punorjivont zal’lo Poilo, sonvsarantleam patxaiancho Patxai, To Jezu Krist. To amcho môg korta ani Aplea rogtan Tannem amkam amcheam patkantlim soddoileant,

⁶ ani Aplea Devachi ani Bapachi seva korunk Tannem amkam ladniki razvoddki keleant, Taka ki mhoima ani podvi sodam-sorvodam. Amen!

⁷ Ho polleiat kupam voir To ieta! Sogllim, Taka tôpla tim legun, Taka polletelim. Ani sonvsarantleô soglleô porza Tachem dukh korteleô! Oxench tem zat’lem! Amen!

⁸ “Hanv Orômb ani Xevôtt!” “Asa To, aslo To ani ieuncho asa To, Sorvpodvedar”, oxem mhonnta To Somi Dev.

Krista Vixim Dorxon

⁹ Jezuchea ekvottak ani rajeak lagun sosnnikaien koxtt ani dukhi bhògchim poddto tumcho, hanv bhageli, bhav Juanv. Devachem utor hanvem porgôttlem ani Jezu Kristak hanvem sakxi dili dekhun, Patmos nanvachea zunvear mhaka koidi korun dovorlolo.

¹⁰ To Somiacho Dis aslo. Tea disa Povitr Atmeacho bhar mhojer ailo, ani mhojê pattlean tuturechea avaza sarko êk motto tallo hanvem aikolo;

¹¹ to oxem mhonntalo: “Tum polletai tem sogllem eka pustokar boroi ani Efez, Smirna, Pergam’, Thiatira, Sardis, Filadelfia ani Laodixeia, heam sat-ui xarancheam povitr-sobhank tem dhaddun di.”

¹² Mhojêkodde uloito tallo, konnacho to polleunk hanv voll’lom tedna, bhangaracheô sat divliô hanvem dekhleô.

¹³ Ani team divleam modem Mon’xachea Puta sarko konn-eklo thõi aslo. To pãiam porian lamb ek vostr nheslolo, ani tachea horddeak êk bhangaracho pott’tto bandlolo aslo hanvem dekhlo.

¹⁴ Tachê tokleche kens dhove asle, lonvê sarke, hima bhaxen dhove-ful; ani tache dolle ujea porim zhogzhoktale;

¹⁵ agtteant nirbhêl kel’lê pitullê sarke tache pãi chokchoktale, ani ghosgoxit udkachea lotta sarko tachea talleacho avaz.

¹⁶ Aplea uzvea hatant to sat noketram dhorun aslo, tachea tonddantli donim-i vattamnim pazleli torsad bhair sortali, ani tachem mukhamoll donparchea zhogzhokit suria sarkem rosrostalem.

¹⁷ Hanvem Taka pollelo tedna, êk mel’lo monis koso Tacheam pãiam-xim hanv poddlom. Tannem Aplo uzvo hat mhojer ghalo ani mhonn’lem: “Bhienaka! Hanv To, Poilo ani Nimanno.

¹⁸ Hanv To, Jivo asa To! Hanv mel’lom, punn atam Hanv sorvkallak jivo asam! Mornnacheô ani Patallacheô chaviô Mhojê adhin asat.

¹⁹ Hea pasot, tum polletai titlem-i boroun dovor — zaum atam ghòddta tem, zaum fuddarak ieunchem asa tem.

²⁰ Mhojea hatant dhôrlelim sat noketram tunvem polleleãi ani toxench sat bhangaracheô divleô, tanchi gupit somzonni hi: sat noketram mhonn’lear sat povitr-sobhanche dut, ani sat divliô mhonngê sat povitr-sobha.”