Mt 1 - Novo Korar NT (BSI)

Jezu Kristachi Vonxavôll Hi

¹ Abrahamachea puta Davidachea puta, Krista Jezuche he vonxa-vollichi xivddi.

² Abraham’ Izakacho bapui; Izak Jakobacho bapui; Jakob Judasacho ani tacheam bhavancho bapui;

³ Judas Faresacho ani Zaracho bapui (tanchi avoi Tamar); Fares Ezronacho bapui; Ezron Araamacho;

⁴ Araam' Aminadabacho; Aminadab Naxonacho bapui; Naxon Salmonacho;

⁵ Salmon Boazacho bapui (tachi avoi Rahab); Boaz Obedacho bapui (tachi avoi Ruth); Obed Jes’secho bapui;

⁶ Jes’se David razacho bapui. David Solomanvacho bapui (tachi avoi Uriasachi potinn);

⁷ Solomanv Roboa-macho bapui; Roboam’ Abijacho; Abija Asacho;

⁸ Asa Josafatacho bapui; Josafat Joramacho; Joram’ Uzziahcho;

⁹ Uzzziah Jotamacho bapui; Jotam’ Ahazacho; Ahaz Hezekiahcho;

¹⁰ Hezekiah Manas’sesacho bapui; Manas’ses Amosacho; Amos Josiacho

¹¹ Josia Jekoniacho ani tacheam bhavancho bapui; he Babilioniechea pordesachea kallar zolmole.

¹² Babiloniechea pordesa uprant: Jekonia Salatielacho bapui; Salatiel Zerubabelacho;

¹³ Zerubabel Abiudacho; Abiud Eliaki-macho bapui; Eliakim’ Azoracho;

¹⁴ Azor Zadokacho; Zadok Akimacho bapui; Akim’ Eliudacho;

¹⁵ Eliud Eleiazaracho; Eleiazar Mat’thanacho bapui; Mat’than Jakobacho;

¹⁶ Jakob bapui Juzecho; ho Mariecho poti; hinnem Krist mhonntat tea Jezuk zolm dilo.

¹⁷ Mhonntôch soglleô pinddka mellun hixôb oso: Abrahama thaun Davida porian chouda pinddka; Davida thaun Babiloniechea pordesa porian chouda; ani Babiloniechea pordesa thaun Krista porian chouda.

Jezu Kristacho Zolm

¹⁸ Kristacho zolm oso zalo: Tachê avoi Mariek ani Juzek lognachem utor zal’lem ; punn tim ektthãi jieunchê adinch, Povitr Atmeachê podven ti gorbest asa mhonn gomun ailem.

¹⁹ Ticho poti Juze nitivont monis aslo ani tichem nanv ubounk taka khuxi nasli, dekhun tika guptim soddun diunk to ievjitalo.

²⁰ Oxem korunk tannem tharav ghetlo tedna, ovchituch taka sopnant Sorvesporacho êk dut dixtti poddlo. Devdutan sanglem: “Juze, Davidachea puta, Mariek tuji potinn korun gheunk bhie naka; kiteak tichea kusveant gôrb asa to Povitr Atmeachê podven sombhovla.

²¹ Ti eka putak zolm diteli ani tum Taka Jezu mhonn nanv ditoloi , kiteak Aplê porjek ticheam patkantli soddoitolo to Toch.”

^22-23 Sorvesporan provadea vorvim oxem sanglelem: “Polleiat, ek ankvar cheddum gorbest zatelem , ani tem eka putak zolm ditelem, ani taka Immanuel (mhonngê ‘Amchê sovem Dev’), oxem nanv ghaltelim.” Hem utor pallon ieunchê khatir hem sogllem ghòddlem.

²⁴ Nhidentlo utthun, Devdutachea hukume pormannem Juzen kelem, ani tika apli potinn korun ghetli;

²⁵ ani tinnem aplea Putak zolm dii-sôr tannem tichê lagim linga-ekvôtt korunk na . Ani Juzen taka Jezu mhonn nanv dilem.