Niveroù 1 - Bibl Koad 21: Ar Bibl e Brezhoneg evit ar Vretoned

Pennad 1 Niveradeg an Israeliz

¹ An AOTROU a gomzas da Voizez e gouelec'h Sinai, e teltenn an engalv, d'an deiz kentañ eus an eil miz, en eil bloaz goude ma oant aet kuit eus bro Ejipt, o lavarout:

² Gra an niveradeg eus holl vodadenn mibien Israel, hervez o ziegezhioù, hervez tiez o zadoù, hervez niver o anvioù, an holl baotred, dre roll dud,

³ adalek an oad a ugent vloaz hag ouzhpenn, an holl re eus Israel hag a c'hell mont d'ar brezel; o niveriñ a reot hervez o strolladoù, te hag Aaron.

⁴ Hag e vo ganeoc'h un den dre veuriad, pep hini o vezañ penn-bras eus ti e dadoù.

⁵ Setu anvioù an dud en em zalc'ho ganeoc'h: Evit Ruben, Elizur mab Shedeur,

⁶ evit Simeon, Shelumiel mab Zurishaddai,

⁷ evit Juda, Nahashon mab Amminadab,

⁸ evit Isakar, Netaneel mab Zuar,

⁹ evit Zabulon, Eliab mab Helon,

¹⁰ evit mibien Jozef, evit Efraim, Elishama mab Amihud, evit Manase, Gamaliel mab Pedazur,

¹¹ evit Benjamin, Abidan mab Gideoni,

¹² evit Dan, Ahiezer mab Amishaddai,

¹³ evit Aser, Pagiel mab Okran,

¹⁴ evit Gad, Eliasaf mab Deuel,

¹⁵ evit Neftali, Ahira mab Enan.

¹⁶ Setu aze ar re a voe galvet d'ar vodadenn, priñsed meuriadoù o zadoù, pennoù milieroù Israel.

¹⁷ Moizez hag Aaron a gemeras an dud-se, a voe galvet dre o anvioù,

¹⁸ hag e tastumjont an holl vodadenn d'an deiz kentañ eus an eil miz; hag e voent rollet hervez o ziegezhioù, dre diez o zadoù, o niveriñ dre benn o anvioù, adalek an oad a ugent vloaz hag ouzhpenn.

¹⁹ Evel m'en doa gourc'hemennet an AOTROU da Voizez, e niveras anezho e gouelec'h Sinai.

²⁰ Mibien Ruben kentañ-ganet Israel, hervez o rummadoù, hervez o ziegezhioù, hervez tiez o zadoù, hervez niver o anvioù, an holl baotred, dre roll dud, adalek an oad a ugent vloaz hag ouzhpenn, an holl re a c'helle mont d'ar brezel,

²¹ ar re niveret evel-se eus meuriad Ruben a voe c'hwec'h mil ha daou-ugent pemp kant.

²² Mibien Simeon a voe niveret, hervez o rummadoù, hervez o ziegezhioù, hervez tiez o zadoù, hervez niver o anvioù, an holl baotred, dre roll dud, adalek an oad a ugent vloaz hag ouzhpenn, an holl re a c'helle mont d'ar brezel,

²³ ar re niveret evel-se eus meuriad Simeon a voe nav mil hag hanter-kant tri c'hant.

²⁴ Mibien Gad, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

²⁵ ar re niveret evel-se eus meuriad Gad a voe pemp mil ha daou-ugent c'hwec'h kant hag hanter-kant.

²⁶ Mibien Juda, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

²⁷ ar re niveret evel-se eus meuriad Juda a voe pevarzek mil ha tri-ugent c'hwec'h kant.

²⁸ Mibien Isakar, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

²⁹ ar re niveret evel-se eus meuriad Isakar a voe pevar mil hag hanter-kant pevar c'hant.

³⁰ Mibien Zabulon, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

³¹ ar re niveret evel-se eus meuriad Zabulon a voe seizh mil hag hanter-kant pevar c'hant.

³² Diwar-benn mibien Jozef, mibien Efraim, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

³³ ar re niveret evel-se eus meuriad Efraim a voe daou-ugent mil pemp kant.

³⁴ Mibien Manase, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

³⁵ ar re niveret evel-se eus meuriad Manase a voe daou vil ha tregont daou c'hant.

³⁶ Mibien Benjamin, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

³⁷ ar re niveret evel-se eus meuriad Benjamin a voe pemp mil ha tregont pevar c'hant.

³⁸ Mibien Dan, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

³⁹ ar re niveret evel-se eus meuriad Dan a voe daou vil ha tri-ugent seizh kant.

⁴⁰ Mibien Aser, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

⁴¹ ar re niveret evel-se eus meuriad Aser a voe ur mil ha daou-ugent pemp kant.

⁴² Mibien Neftali, hervez o rummadoù, hervez o ziegezhioù, hervez tiez o zadoù, hervez niver o anvioù, adalek an oad a ugent vloaz hag ouzhpenn, an holl re a c'helle mont d'ar brezel,

⁴³ ar re niveret evel-se eus meuriad Neftali a voe tri mil hag hanter-kant pevar c'hant.

⁴⁴ Setu aze an niveradeg, penaos Moizez hag Aaron a niveras ar bobl gant an daouzek den, priñsed Israel, pep den evit ti e dad.

⁴⁵ Evel-se holl vibien Israel a voe niveret hervez tiez o zadoù, adalek an oad a ugent vloaz hag ouzhpenn, an holl re eus Israel hag a c'helle mont d'ar brezel;

⁴⁶ an holl re niveret a voe c'hwec'h kant tri mil pemp kant hag hanter-kant.

⁴⁷ Al Levited, hervez meuriad o zadoù, ne voent ket niveret ganto.

⁴⁸ An AOTROU a gomzas da Voizez o lavarout:

⁴⁹ Ne niveri ket meuriad Levi ha ne gonti ket anezho e-touez mibien Israel.

⁵⁰ Ro d'al Levited karg tabernakl an Testeni gant e holl draoù ha kement a zo dezhañ. Int eo a zougo an tabernakl hag e holl draoù, hag a raio ar servij anezhañ; hag e kampint en-dro d'an tabernakl.

⁵¹ Pa'z aio kuit an tabernakl, al Levited a zisavo anezhañ, ha pa gampo an tabernakl, al Levited a savo anezhañ. Mar tosta outañ un diavaeziad, e vo lakaet d'ar marv.

⁵² Mibien Israel a savo o zeltennoù, pep hini en e gamp ha pep hini e-kichen e vanniel, hervez e strollad.

⁵³ Al Levited a gampo en-dro da dabernakl an Testeni evit na vo ket fulor a-enep bodadenn mibien Israel, hag al Levited o devo an diwall eus tabernakl an Testeni.

⁵⁴ Mibien Israel a reas evel m'en doa gourc'hemennet an AOTROU da Voizez. Evel-se e rejont.