Yuda 1 - KNTP

¹ Yuda, kalume wa Yesu Kilishitu, mulongo wanji Yakoba. Kwi abo baitwa, batemwe ba mwi Lesa Taata, balaminwa Yesu Kilishitu.

² Lusa ne mutende, ne butemwe bimuvujile anweba.

Bafunjishi ba bubela

³ Anweba batemwe, nangwa natesheshekotu muchima kwimunembela na mambo a lupulukilo lwetu atweba bonse, nekimwene namba kyamfwainwa kwimunembela byambo bya kwimutundaika namba, mwibilwile na muchima yense abya byonse bya lwitabilo byo apaine Lesa ku bazhijikwa banji.

⁴ Mambo kobaji bantu bamo batwela mwi anweba bufyamfya, bonkaba bo banembejile jimo kala amba batongwelwa luno luzhachisho, babula kwakamwa Lesa, kasa baalula bupe bwa Lesa wetu ke mwakuubila bya bunya, ne kukana Mfumu wetu yenkawa umotu, aye Nkambo Yesu Kilishitu.

⁵ Pano nasaka kwimuvulula, nangwa mwibiyukila jimo byonse namba, aye Nkambo nangwa wibapulwishe bantu mu ntanda ya Ijipita, palutwe wibonawine bonse babujile kwitabila.

⁶ Ne bamalaika babujile kulama bukulumpe bwabo, kabiji bashiile bifulo byabo byo baikajilengapo bene, wibalama mu mfungwa ya myaka mu mfishi, na kupembelela kije kya aja juba jikatampe.

⁷ Pamo nobe Sodoma ne Gomola ne mizhi yajinga kubwipi, byo bepanyishetu bene ku bulalelale, pamotu ne bano, ne kulondela bisela bingi. Bebamwesha ke kya kumwenako byo bamona lukabisho lwa mujilo wa myaka.

⁸ Ne bano bantu ba biloto nabo kasa boba pamotu ne kubipisha mibiji yabo, ne kusuula ba luusa, ne kwibanena bya mwenga ba lukumo.

⁹ Pakuba aye Mikeela, malaika mwine mukatampe byo alwilenga ne Diabola ne kupachika na mambo a mubiji wa Mosesa, kechi wajinga na muchima wa kumushiina bya mwenga ne, pakuba aye wa ambile amba, “Nkambo akulengulule.”

¹⁰ Bino bano bebyambila mwenga bintu byonse byo babula kuyuka, kabiji ne abya byo bayukatu mu michima yabo abo bene, pamo nobe banyama babula maana, mu byonkabyo bintu mo baonaikila.

¹¹ Lesa ukebonauna kine! Mambo benda mu jishinda ja kwa Kaina, na mambo akutemwa mfweto baya mungi byonka byaubile Balamu. Basatuka byonka byasatukile Kola, Lesa ukebonauna byonka byo a onawine Kola.

¹² Bano bantu yo mikunko yafyamika mu bijiilo byenu bya butemwe byo baja nenu, bo basaka kwijiisha bene kwakubula bumvu, o makumbi abula mema, atwalwa na mwela, byo bichi bya kisalo byabula bipangwa, byaumishatu, byazhujika ne mizhazhi.

¹³ O manyaki akaji a kalunga auba ne kapofu ka bumvu bwabo, to tubangabanga tupitang'ana to balamina kufiita kwa mfishi ya myaka ne myaka.

¹⁴ Kabiji bo bano bo a awile Enoka, wa mukisemi kya butanu na bubiji kufuma kwi Adama amba, “Talai, Nkambo ukeya na biumbi ne biumbi bya bazhila banji

¹⁵ mu kwibachibila mambo bonse, ne kwibazhachisha babula kwakamwa Lesa bonse na mambo a mingilo yabo yonse ya kubula kwakamwa Lesa, yo baingila mu kubula kwakamwa Lesa, ne na byambo byonse byakosa byo bamwambila bandengamambo babula kwakamwa Lesa.”

¹⁶ Bano bo bantu banyinyita, ne kutamauka, kasa balondela monka mu bya lwiso lwabo, ne tunwa twabo kasa twamba byambo bikatampe bya kwitota, ne kwamba bya mulambisha ku bantu amba bamwenemo.

Lujimuno ne lufunjisho

¹⁷ Pakuba anweba batemwe, vulukai byambo byo ba ambile kala batumwa ba Nkambo yetu Yesu Kilishitu.

¹⁸ Byo bemwambijile amba, “Mu moba akapelaako kukekala ba mwenga, kasa balonda monka mu bya lwiso lwabo bya kubula kwakamwa Lesa.”

¹⁹ Bano bo boba baleeta bya lwabano, ba buntunshi, babuula Mupashi.

²⁰ Pakuba anweba batemwe, kasa mwikomesha anweba bene mu lwitabilo lwenu lwazhila. Ne kulomba na Mupashi Wazhila,

²¹ ne kwilama monka mu butemwe bwa Lesa, byo mubena kutengela lusa lwa Nkambo yetu Yesu Kilishitu bwa kwimupa bumi bwa myaka.

²² Kabiji kasa mwibobila lusa aba bazhinauka,

²³ ne bamo mwibapulushe, pa kwibasompola mu mujilo, kabiji bakwabo mwibobile lusa, bino kasa mujimuka. Kasa mushikwa kivwalo kyabo kyasombela na buntunshi.

Byambo byapelaako bya mapesho

²⁴ Pano kwi aye wakonsha kwimulama ne kwimukanya kwituntula, ne kwimwikazha monka mu kyenyi kya lukumo lwanji, kwa kubula bulema, monka mu lusekelo lukatampe.

²⁵ Kwi aye Lesa umotu yenka, Mupulushi wetu, monka mwi aye Yesu Kilishitu Nkambo yetu kwikale lukumo, ne buneme, ne ngovu, ne luusa, kunyuma ya myaka yonse ya kala, ne pano, ne ku myaka yonse ikeyako. Amena.