Mateo 1 - KNTP

Bashakulu ba Yesu Kilishitu

¹ Buku wa kisemi kya Yesu Kilishitu, mwana Davida, mwana Abulahama.

² Abulahama wasemene Izaka, Izaka naye wasemene Yakoba, Yakoba naye wasemene Yuda ne balongo banji,

³ Yuda naye wasemene Peleze ne Zela mwi Tamala, Peleze naye wasemene Hezona, Hezona naye wasemene Lama,

⁴ Lama naye wasemene Aminadaba, Aminadaba naye wasemene Nashona, Nashona naye wasemene Samona,

⁵ Samona naye wasemene Boaza mwi Lehaba, Boaza naye wasemene Obeda mwi Luta, Obeda naye wasemene Yese,

⁶ Yese naye wasemene Davida mfumu. Davida naye wasemene Solomone mu yewa wajinga mukazhanji Uliya.

⁷ Solomone naye wasemene Lehoboma, Lehoboma naye wasemene Abiya, Abiya naye wasemene Asa,

⁸ Asa naye wasemene Yehoshafwata, Yehoshafwata naye wasemene Yolama, Yolama naye wasemene Uziya,

⁹ Uziya naye wasemene Yotamo, Yotamo naye wasemene Ahaza, Ahaza naye wasemene Hezekiya,

¹⁰ Hezekiya naye wasemene Manase, Manase naye wasemene Amonyi, Amonyi naye wasemene Yosiya

¹¹ Yosiya naye wasemene Yekoniya ne balongo banji mu mwaka ye bebatwajile ku Babilona.

¹² Kabiji byo bebatwajile ku Babilona, Yekoniya naye wasemene Shalachele, Shalachele naye wasemene Zelubabele,

¹³ Zelubabele naye wasemene Abeuda, Abeuda naye wasemene Eliakima, Eliakima naye wasemene Azola,

¹⁴ Azola naye wasemene Zadoki, Zadoki naye wasemene Akima, Akima naye wasemene Eleuda,

¹⁵ Eleuda naye wasemene Eliaza, Eliaza naye wasemene Matana, Matana naye wasemene Yakoba,

¹⁶ Yakoba naye wasemene Yosefwa, mwata wanji Maliya, yenkaye wasemene Yesu, yebatela amba, Kilishitu.

¹⁷ Byonkabyo bisemi byonse kufuma kwi Abulahama ne kufika kwi Davida byafika ke bisemi jikumi na bina, kabiji kufuma kwi Davida ne kufika po bebatwajile ku Babilona, nabyo byafika ke bisemi jikumi na bina, kabiji kufumapo bebatwajile ku Babilona ne kufika kwi aye Kilishitu nabyo byafika ke bisemi jikumi na bina.

Kusemwa kwa Yesu Kilishitu

¹⁸ Kabiji kusemwa kwa Yesu Kilishitu kwajinga byonkabye. Inanji Maliya byo bamwipangwizhe kwi Yosefwa, kasa bakyangye kwilaajika, bamumwene kasa a imita jiimi ja ku Mupashi Wazhila.

¹⁹ Kabiji Yosefwa mwata wanji byo ajinga waoloka, kechi wasakile kumulengesha bumvu ku meso a bantu bonse ne, wafuukwile amba, akamukaine kumbaji.

²⁰ Kabiji byo a kilangulukilenga byo byo, ponkapo malaika wa Nkambo wamwekele mu kiloto amba, “Obewa Yosefwa, mwana Davida, kuchiina kumulaajika Maliya ke mukazhobe ne. Mambo awa ye a imita munda mwanji ye wa kwa Mupashi Wazhila.

²¹ Kabiji aye ukasema mwana wamulume, ne obewa ukamutumba jizhina janji amba Yesu, mambo aye yenka ukebapulusha bantu banji ku mambo abo.”

²² Kabiji bino byonse byamwekele amba kifike akya kya ambile Nkambo mu ngauzhi wanji amba,

²³ “Talai! Muzhike wakishinka wabula kusambakanapo na mwanamulume ukemita jiimi, ukasema mwana wamulume, kabiji bakamutumba jizhina janji amba Emanuele.” (Kulumbulula, ko kuuba amba, “Lesa tuji nanji.”)

²⁴ Kabiji pa kubuuka mutulo, Yosefwa waubile monka mo a mwambijile malaika wa Nkambo, ne aye wamulaajikile mukazhanji.

²⁵ Bino kechi wasambakene nanji ne poso byo asemene mwana. Kabiji Yosefwa wamutumbile jizhina amba Yesu.