2 Timoti 1 - KNTP

¹ Paulo, mutumwa wa Kilishitu Yesu, monka mwaswila muchima wa Lesa, mwayila mulaye wa bobwa bumi bwa mwi Kilishitu Yesu.

² Kwi Timoti, mwanami ye natemwa. Bupe ne lusa, ne mutende, bifuma kwi Lesa Taata ne Kilishitu Yesu Nkambo yetu, bikale ne obewa.

Lwimu ne lutundaiko

³ Namusanchila Lesa ye ng'ingijila na muchima watoka, byonka byaubilenga bashakulu bami. Byo mbena ku kuvuluka mu milombelo yami moba onse, bufuku ne mute.

⁴ Kasa nsakisha ku kumona pa kulanguluka mipolo yobe, namba ngyulwe na lusekelo.

⁵ Navuluka mambo a lwitabilo lwa kine luji mwi obewa, lonkalwa lwajinga patanshi mwi nkambo yobe Loisa, ne mwi inobe Yunisa. Kabiji nayukishatu namba, luji ne mwi obewa pamo.

⁶ Onkao mambo na kuvulula namba uteemeshe akya kya bupe bwa Lesa kiji mwi obewa mambo na kutentekele maboko ami.

⁷ Mambo Lesa kechi witupele mupashi wa moyo ne, poso wa bulume ne wa butemwe ne wa kwikanya.

⁸ Byonkabyo obewa kechi wikuubile bumvu kushimuna ko umushimuna Nkambo yetu ne, nangwa kungubila bumvu amiwa kaili wanji ne. Bino manama pamo ne amiwa mu Mambo Awama monka mwayila bulume bwa Lesa.

⁹ Yenkaye witupulusha, ne kwitwiita na lwito lwazhila, kechi mwayila mingilo yetu ne, poso mwayila kufuukula kwanji ne bupe bwanji, boetupele mwi Kilishitu Yesu, myaka ya kala keene kasa ikyangye kufika,

¹⁰ pakuba pano bwasolokela mu kumweka kwa Mupulushi wetu Kilishitu Yesu, yenka wavulang'enye lufu, ne kwibusolola patoka bumi ne bumbulwa kufwa mu Mambo Awama.

¹¹ O natongwejilwe amba, ngikale musapwishi, ne mutumwa, ne mufunjishi,

¹² na onka ano mambo o namanamina bino bintu. Bino kechi nji na bumvu ne, mambo namuyuka aye ye naitabila, kabiji nayukisha namba, aye wakonsha kulama kufika ku joja juba akya kyafikizhiwa kwi amiwa.

¹³ Kwachisha kuyewa musango wa byambo byalumbuluka, byo wa umvwine kwi amiwa monka mu lwitabilo ne mu butemwe buji mwi Kilishitu Yesu.

¹⁴ Akya kyawama kyo wapelwe, wikilame na Mupashi Wazhila waikala mwi atweba.

¹⁵ Obewa wayuka amba, bonse baji mu Asha bamvundamina kala, mwi abo muji ba Figelusa ne Helemojene.

¹⁶ Aye Nkambo ebobile lusa ba munzubo ya Onesifolusa, mambo aye wangikizhenga muchima javula, ne kumuubila bumvu munyololo wami ne.

¹⁷ Pakuba byo aishile ku Loma, wankebeshe bingi, kabiji wantaaine.

¹⁸ Aye Nkambo amupe kya kumona lusa mu aja juba! Kabiji ne obewa mwine wayukisha bulongo aya mingilo yavula yo ankwashishenga amiwa ku Efisesa.