YOANE 1 - Kakwa New Testament 1977

¹ I suluki yu ti Kulielo kata‚ Kulie ŋanilo lu gbo seku Ŋun kugele. Kulie ŋanilo a Ŋun.

² Lepe kazu gbo seku Ŋun i suluki yuna.

³ Kapa kilo giri agbeki ku lepe‚ ’bo le’de kapatio lo gbekilo ’bayi‚ laga aku gbeki ku lepe.

⁴ Ku lepe kata yu ru kata. Ru ŋanina nye naga a parara na ŋutulu.

⁵ Parara ŋanina kobu i mudeni‚ ’bo mude ŋanina aku nuga lepe tro.

⁶ Nyenaga le’de ŋutu kazu asunye ku Ŋun yu‚ kari ti lepe kine se naga Yoane.

⁷ Lepe pondra i trugo na kulia ti parara kine‚ ma ŋutulu giri rugi lepe ’busa.

⁸ ’Bo lepe agbo’da a parara ŋaninani, ’bo lepe pondra i trugo na kulia ti parara ŋani kine.

⁹ ’Bo parara naga mŋgba‚ naga na kobu ku ŋutulu girina ti nu ipondra i kani.

¹⁰ Lepe kazu gbo i kani, ’bo kana gbeki ku lepe, ’bo ŋutu ti ka kilo aku deni lepe.

¹¹ Lepe pondra kanye kani, ’bo ŋutu ti lepe kilo aku ru lepe.

¹² ’Bo ŋutulu giri lo rugo lepe kilo‚ lepe tikindra ko i yeŋundra a ŋazi ti Ŋun‚ ko laga lo rugo kari kanye kilo.

¹³ Ŋutulu ŋani kilo agbo’da yuŋele ku muguni‚ kugbo ku nyadru na ŋutuluni, ’bo Ŋun lo yuŋundro ko.

¹⁴ Nyenaga Kulielo ayeŋundra a mugu na ŋutu, druga saka kaya dridriŋini, ’bo lepe azore ku ’busa na’bu ku kulia ti to’diri itro. Yi abonga todruma na lepe naga na gbo’da be todruma na Ŋiro lo yuŋe gele lo Monyelo ina.

¹⁵ ’Bo Yoane a’dodru bo na kulia ti lepe kine, druga laiza adi, “Ilo de a ŋutu laga ma na tazi kulia ti lepe kinelo adi, ‘Ŋutu lo pondra kuwe bolo nye lo gbo kuwe koŋo ibgonaga lepe laga kazu a kayo ku na ina.’ ”

¹⁶ Yi giri arumbi koŋo na’bu koru ’do ’do ŋiyu i ’busa na’bu naga koruna kata yu.

¹⁷ ’Bo kazu kukuzuna atiki ku Mose, ’bo ’busa na’buna ku kulia ti to’diri kine ayeŋundra ku Yesu Kristo.

¹⁸ Ŋiyu ’bero le’de ŋutu lo medra Ŋun ’bayi. Ŋiro lo yuŋe gele laga ku Monye i gedyolo, nye lo kpeza lepe i denani.

¹⁹ Kine kulia de a bo na kulia na ’doru Yoane kine i luŋa laga ma Yahudi kilo sondri ka’i’ila kasi ŋuti ti Levi kilo ŋiyu Yerusalema yu i piza na lepe adi, “Do a na ya?” lu.

²⁰ Yoane druga trugo kulia kine, aku mumuza, atrukokindro ko adi‚ “Na ani gbo’da a Kristo.”

²¹ Ko druga piza lepe ’do adi, “Do kuru a ŋa ya? Do a Eliya?” Lepe adi, “Na ani gbo’da a lepe.” Ko adi, “Do a kakeyoni ilo ya?” Lepe druga teyitokindro ko adi‚ “ ’Bayi.”

²² Ko druga piza lepe adi, “Kuru do a ŋa ya? Ma yi ku trukokindro ŋutulu lo sunyundro yi kilo ’busa. Do kuru tazu kulia konu kine adinyo ya?”

²³ Yoane druga teyitokindro ko adi, “Na a roro lo ŋutu lo laiza i diŋo kata yulo adi, ‘Rineta kiko lo Matalo gbogbo,’ be naga ma kakeyoni Isaya tazinina.”

²⁴ Farisayo kilo lo sunyundro ko.

²⁵ Ko druga piza lepe adi, “Ku do ani gbo’da a Kristo‚ kuwa Eliya‚ kuwa kakeyoni ilo‚ do kuru tikindra baputizilo gbandra ya?”

²⁶ Yoane druga teyitokindro ko adi, “Na lo tikindra baputizilo ku pio, ’bo le’de ŋutu ilo alira kasu dridriŋini laga ta aku denilo.

²⁷ Lepe a ŋutu laga lo pondra kuwe boni‚ laga na ani romoki i lagu na pata na kamukata na lepenalo.”

²⁸ Kine kuliata de kondra ’beri Betania naga i lu lozo lo kare laga Yorodani nu, i piri na tikini Yoane baputizilo nu.

²⁹ Ku gbo’dini imalu de Yoane amedra Yesu i pondra kanyeni‚ druga kulia adi‚ “Meteta‚ Tore lo Kebilito lo Ŋun‚ lo yunadru toro na kalo!

³⁰ Ilo de a ŋutu laga ma na tazi kulia ti lepe kinelo adi, ‘Le’de ŋutu ipondra kuwe boni‚ lepe gbo kuwe koŋo igbonaga lepe kazu laga a kayo ku na ina.’

³¹ Na lepe kazu aku deni lepe‚ ’bo nyena pondri na ku tikindri baputizilo ku pio‚ ma lepe kpiyani ku Isiraeli kiloni ’busa.”

³² ’Bo Yoane a’dodru bo na kuliana adi‚ “Na amedra Yuka Nakiyena be a’buguti i kiyundra i ’diko yu‚ i gbi’diki ku lepe kini.

³³ Na lepe kazu aku deni lepe, ’bo Ŋun lo sunyundro na i tikindra na baputizilo ku piolo‚ nye lo takindra na adi‚ ‘Ŋutu laga mo do bongi Yuka Nakiyena i pondra ku gbi’diki ku lepe kinilo‚ lepe a ŋutu lo itikindra baputizilo ku Yuka Nakiyelo.’

³⁴ Na ku bongi nyena trugini na adi ilo de a Ŋiro lo Ŋun ilo.”

³⁵ Ku gbo’dini imalu de ’do ti Yoane alira kasi lotodiniki kanye ku’de mure kilo.

³⁶ Lepe druga metadru Yesu ti lepe lu i woro‚ druga kulia adi, “Meteta, Tore lo Kebilito lo Ŋun ilo!”

³⁷ Kugbo lotodiniki ŋani laga mure kilo laga ayinga Yoane i kuliani , ko druga kepodru Yesu.

³⁸ Yesu druga lopuke, ku lepe laga abonga ko i kebu nanyena, lepe druga piza ko adi‚ “Ta kilo ga’yu inyo ya?” Ko druga teyitokindro lepe adi‚ “Rabi, (trugo adi‚ Katogoloni,) do lo saka yeda ya?”

³⁹ Lepe druga teyitokindro ko adi, “Pondrita ku meteta.” Kuwade ko druga utu i medra na piri na sakani lepena. Ko druga saka kasi lepe i lu luŋa de, ti kolona gbo’di ayeŋundra a lu’balaŋa.

⁴⁰ Le’de ŋutu gele i dridriŋi na ŋutulu mure ŋani lo yinga Yoane druga kepodru Yesu kilo, a Anderia, luŋase lo Simona Peterolo.

⁴¹ A kayona lepe druga ga’yu luŋase lonye laga Simona, druga takindra lepe adi, “Yi arumbi Mesialo,” (trugo adi Kristo ilo).

⁴² Lepe druga zondra Simona ku Yesuni. Yesu druga gbuluzu lepe‚ druga takindra lepe adi, “Do a Simona‚ ŋiro lo Yoanelo. Do iluŋu a Kefa‚” (trugo adi‚ Petero).

⁴³ Ku gbo’dini imalu de Yesu druga nyadru utu Galili yu. Druga lepe rumbi Filipo, druga takindra lepe adi, “Keporo na.”

⁴⁴ Filipo ŋanilo a Betesaidatio i kezi nasi Anderia seku Peterona.

⁴⁵ Filipo druga rumbi Natanaeli, druga takindra lepe adi, “Yi arumbi ŋutu laga ma Mose wudri i kukuzuki katani ilo, ma kakeyo kilo wudri itrolo, lepe a Yesu lo Nazaretalo, ŋiro lo Yosefalo.”

⁴⁶ Natanaeli druga piza lepe adi, “Ŋo lo’bu roromoki lupundro Nazareta yu ya?” Filipo druga teyitokindro lepe adi, “Pondri ku mete.”

⁴⁷ Ku Yesu laga amedra Natanaeli i pondra kanyeni, lepe druga tazu kulia ti lepe kine adi, “Mete, Isiraelitio laga mŋgbalo, teili lo lepelo ’ba toŋulupa!”

⁴⁸ Natanaeli druga piza adi, “Do dendra na adidinyo ya?” Yesu druga teyitokindro lepe adi, “Ti Filipo inga aku lungu do‚ mo do si’dakini i koligi muko yuna‚ na ameri dona.”

⁴⁹ Natanaeli druga teyitokindro lepe adi, “Katogoloni, do a Ŋiro lo Ŋun ilo! Do a Mata lo Isiraeli ilo!”

⁵⁰ Yesu druga piza lepe adi, “Do arugo igbonaga na atakindra do adi na ameri do i koligi muko yuna ya? Do imemedra kulia naga a drumala alangu kine kulia de.”

⁵¹ Lepe druga takindra lepe adi, “Na takindra ta a ’diri, ta imemedra ’dikona i ŋazu na mugu ku malaika ti Ŋun kilo i kiyadru ki yu ku i kiyundra kani ku Ŋiro lo ŋutulo kini.”