LUKA 1 - Kakwa New Testament 1977

¹ Ŋutulu rodri a’deba kita na wuroni kuliata naga na kondra ’beri kaya dridriŋini kine‚

² be naga ŋutulu laga lo medra kulia kine ku konye kase kilo ku lo kondra kita ŋanina ma puputukindri yi ina.

³ Kuwade Teofilo‚ do laga lo sopo korulo‚ na arambu a na’bu‚ nyena wurokindri na do kuliata ŋani kine giri soso‚ igbonaga na akepodru bo ŋanina soso ŋiyu i lu so de ina.

⁴ Na nyadru adi dene kulia naga mo do togoloni kunu de adi ko a kulia naga mŋgba.

⁵ I luŋa laga ma Herode gbo’dini a mata lo Yudaya kazuna, le’de ka’i’ilani‚ kari ti lepe kine se naga Zakaria, lu i dridriŋi na tomore na Abiyana. Noka na lepena a ŋiro naga i kadi na Aronana‚ kari ti lepe kine se naga Elisabeta.

⁶ Ko mure katru a ŋutulu laga mŋgba ku Ŋun i koŋoni‚ ’bo ko asobu kukuzuki ku ŋeresi ti Matalo kine giri‚ ’ba kulia naga na sosoyi sosoyi.

⁷ Ko ’ba ŋiro‚ igbonaga Elisabeta ŋanina a undo ina‚ ’bo ko mure katru ayeŋundra gbo’di a modoŋa.

⁸ Nyenaga kugbo i baŋe na tomore na lepe na kondri lepe kita na ka’i’ilani ku Ŋun i koŋoni‚

⁹ beti ka’i’ila ma kondrina‚ kita na lepena a na lubini lepe i ’udya na libani i kadi na Matalona kata yu.

¹⁰ Ti mongoyo na ŋutuluna ina i magu kaŋo yu i luŋa lo ’urani libanilo.

¹¹ Druga malaikata lo Matalo lo puru ku lepe i go lo lutatelo i piri naga a ’uretana i laga yu.

¹² Ku Zakaria laga amedra lepe de‚ druga zazangu, druga kuze na ’deba lepe.

¹³ Malaikatalo druga takindra lepe adi‚ “Zakaria, ku kukuze‚ igbonaga magu nonuna ayiŋa ina. Noka nonuna Elisabeta iyuyuŋokindro do ŋiro lalale‚ ’bo do igbizo lepe a Yoane.

¹⁴ Do inyonyola koru‚ ’bo ŋutulu rodri igbogbo’da ku lominye ku yuŋe na lepena‚

¹⁵ igbonaga lepe igbo’da a druma ku Matalo i koŋoni ina. Lepe aka mozu suwe ti konye ti zabibu ku yawa naga potroru kineni. Lepe ilo izozore ku Yuka Nakiyena, ŋiyu ku ŋote i pele yu.

¹⁶ Lepe ilolopukoro ŋutu ti Isiraeli kilo rodri ku Mata‚ Ŋun lasikolo yu.

¹⁷ Lepe iworo ku Ŋun i koŋo yu ku teriŋi koru be na Eliyana‚ i lopugo na teiliko ti monyezi kilo ku ŋazi kasiko kilo yu‚ ŋutulu laga ’ba sobu na kulia kilo ma gbo’da ku yoyolozu na ŋutulu laga mŋgba kilo‚ ma ko kukuna a ŋutulu ti Matalo.”

¹⁸ Zakaria druga piza malaikatalo adi‚ “Na idendra kine kulia de adidinyo ya? Na gbo’di a tomodoŋa, ’bo noka niona gbo’di a ŋutu naga alenga itro.”

¹⁹ Malaikatalo druga teyitokindro lepe adi‚ “Na a Gabirieli, lo lira ku Ŋun i koŋolo. Na sunye i kulia ku do‚ i kipikindro na do ina kuu na’buna de.

²⁰ Mete‚ kutu nonuna i’di’diza, do iyiŋa tali‚ do ’baka kuliani yeŋadru tozo i luŋa lo yeŋundri kine kulia de lu‚ igbonaga do aku rugo kulia kuwe naga na ikondra ’beri kasiko i baŋe yu kine ina.”

²¹ Nyenaga ŋutulu kilo amomondru Zakaria‚ ’bo koŋa druga rambu ’beri koru ku ’dutoro na lepe naga i kadi na Ŋun ina kata yu ina.

²² Ku lepe laga alupundro kaŋoni‚ lepe gbo’di ani romoki kulia ku ko. Ko druga yo’yu adi dena lepe amedra ŋo laga a rube kadi kata yu‚ igbonaga lepe gbo’di kpekindra ŋutulu kilo kulia kine ku keni‚ ’bo gbo’di kutu na lepena a’diza kaŋo ina.

²³ Ku luŋa ti lepe laga lo kitaniki i kadi na Ŋun ina kata yu kilo laga alenga‚ lepe druga tutu kanye ’ba yu.

²⁴ I bo na kulu luŋa de noka na lepena Elisabeta druga riondru ’busa‚ druga mumugo mugu i ’ba yu yapazi mukana‚ ’bo lepe adi‚

²⁵ “Matalo kondra kuweni de i luŋa laga ma lepe boŋundri na ku ’busa na’bunalo, i ’dumadru na yukuwe niona kaŋo ku ŋutulu kilo i dridriŋini.”

²⁶ Nyenaga i yapa lo bukiyelo katani‚ Ŋun druga sonyodru malaikata laga Gabirieli i kezi na luŋu a Nazareta ina yu‚

²⁷ ku ne’de ’diye naga le’de ŋutu nye laga Yosefa ma ’do’ini ina yu. Yosefa ŋanilo a lo kadi na Dawidina, ’bo ’diye ŋanina nye naga Maria.

²⁸ Nyena pondri malaikatalo ku lepeni‚ druga romu ku lepe adi, “Do naga na ’doka ku ’busa na’buna‚ koŋona ya! Matalo ilo seku do kugele.”

²⁹ Kugbo Maria naga amedra lepe‚ teili lo lepelo druga ’du’duki ku rome lo lepe laga ilo de‚ ’bo lepe druga piza mugu adi ilo rome de a rome laga adinyo.

³⁰ Malaikatalo druga takindra lepe adi‚ “Maria‚ ku kukuze‚ igbonaga do ariondru ’busa na’bu ku Ŋun i koŋoni ina.

³¹ ’Bo mete‚ do iriondru ŋiro konu peleni‚ ’bo do iyuyuŋundro ŋiro lalale‚ ’bo kari kine igbio a Yesu.

³² Lepe igbo’da a druma‚ lepe iluŋu a Ŋiro lo Ŋun laga Ki koru ilo. Mata Ŋun ilo itikindra lepe i gbo’da a mata be na Dawidi‚ merenye lo lepelona.

³³ Lepe lo igbo’da a mata‚ i’deba tumata na ketimi na Yakobo ina a pii‚ ’bo tumata na lepena ’baka lengani.”

³⁴ Maria druga piza malaikatalo adi‚ “Kine kulia de iyeŋundra kuweni adidinyo‚ ku na ’ba lale ya?”

³⁵ Druga malaikatalo teyitokindro lepe adi‚ “Yuka Nakiyena na ipondra ku gbi’diki konu kini‚ ’bo teriŋi na Ŋun laga Ki koru ilona nyena imugo do. Kuwade ŋo laga a lokiye lo iyuŋu do lu iluŋu a Ŋiro lo Ŋun.

³⁶ ’Bo mete‚ sosu naga Elisabeta lepe ’do ariondru ŋiro lalale kanye tomodoŋani. Ilo de gbo’di a yapa lo lepe laga a togi bukiyelo, lepe na luŋu kazu adi a undona.

³⁷ ’Bo ku Ŋun yu le’de ŋo lo gbo’da a riŋi ’bayi.”

³⁸ Maria druga kulia adi‚ “Mete‚ na a upiye na Mata. Ti kulia kine gbo’dini kuweni be naga mo do kulianina.” Malaikatalo druga ŋiŋiyoro ku lepe i lagani kaŋo.

³⁹ I kulu luŋa de Maria druga ŋiŋiyoro druga pilara i utu wuleŋa gele i ka naga ku meria nu kata yu‚ i kezi ne’de na Yudayana kata yu‚

⁴⁰ druga lubo ku Zakaria kadi yu‚ druga roroma seku Elisabeta.

⁴¹ ’Bo kugbo Elisabeta naga ayinga rome lo Marialo, rimatalo druga lalatu ku lepe i pele yu. Elisabeta druga zozore ku Yuka Nakiyena.

⁴² Lepe druga kulia ku roro laga gboŋa adi‚ “Ti do purani pura i dridriŋi na wate kine‚ ’bo rimata laga konu pelenilo ti purani pura itro!

⁴³ ’Bo kine kulia de yeŋundra kuweni adidinyo, naga ma ŋote na Mata liolo pondri kuweni kine ya?

⁴⁴ Mete‚ na ku yingi roro laga mo do romani ku nalo‚ rimatalo druga lalatu ku nyola kuwe peleni.

⁴⁵ ’Bo koŋo na’buna ina a na ŋutu naga arugona, igbonaga kulia naga ma Matalo trukokindri lepe kine itotorumokindro ’beri ina.”

⁴⁶ ’Bo Maria druga kulia adi‚ “Na ina pudya Matalo‚

⁴⁷ ’Bo na gbo ku nyola koru ku Ŋun‚ Kariteni liolo‚

⁴⁸ igbonaga lepe amedra dreli na upiye nanyena ina. ’Bo mete‚ ŋiyoro tinade ŋutulu kilo giri ilungu na a na koŋo na’bu‚

⁴⁹ igbonaga Ŋun laga a riŋilo akonakindra na kulia naga a riŋiko koru ina‚ ’bo kari ti lepe kine a nakiye.

⁵⁰ Lepe gbo ku ediyo ku ŋutulu lo kuga nye kilo‚ mu yuŋeto.

⁵¹ Lepe akpeza teriŋi nanyena ku keni lonyelo, lepe ateriri ŋutulu lo woro ku sisinga na ’beri kilo kaŋo ku kulia ti ’dela na ramesi kasiko kine.

⁵² Lepe atemizundro riŋiko kilo ka kasiko i tumataki yu‚ ’bo lepe a’biludru ŋutulu laga ka kilo ki yu.

⁵³ Lepe atozodru ko laga ku mago kilo ku kapa lo’bu, ’bo lepe asonyodru korineko kilo kana.

⁵⁴ Lepe arambu kulia ti koŋo na’bu nanyena kine‚ nyena logini lepe kalokoni lonye laga Isiraeli,

⁵⁵ be naga ma lepe takindri merenye lika laga Abarahama, ku nyomo ti lepe kilo ’duu ina.”

⁵⁶ ’Bo Maria druga saka seku Elisabeta beti yapazi musala de‚ bulo ku yitozi bo kanye ’ba yu.

⁵⁷ Kuwade kugbo luŋa lo Elisabeta lo ta’dulo laga aromoki, lepe druga ta’duundra ŋiro lalale.

⁵⁸ Ŋutulu laga ku lepe i gurubeni kilo ku maratezi ti lepe kilo ku ayinga adi Matalo atikindra lepe koŋo na’bu, ko druga nyonyola koru ku lepe.

⁵⁹ ’Bo i bo na luŋa budro‚ ko druga utu i taadru na ŋirolo‚ druga ko kodro gbizo lepe a Zakaria ku kari ti monye kine.

⁶⁰ Ŋote druga teyitokindro ko adi, “Ka’bi ku gbigbio de‚ ti lepe gbioni a Yoane.”

⁶¹ Ko druga takindra lepe adi‚ “Le’de ŋutu ’bayi kasu kadini laga aluŋu ku kine kari de.”

⁶² Druga ko kodra monye lo lepelo ku keni i piza na lepe ŋona lepe nyadru ti ŋirolo gbioni a ŋa.

⁶³ Lepe druga magu ŋurupi naga a wure‚ druga wudyo adi‚ “Kari ti lepe kine se naga Yoane.” Ŋutulu giri druga rambu ’beri koru.

⁶⁴ Wuleŋa gele kutu na Zakariana druga ŋaŋa mugu‚ ’bo ŋede lo lepelo druga lalaka‚ lepe druga poki i kulia i pudya na Ŋun.

⁶⁵ ’Bo ŋutulu laga kasiko i gurubeni kilo giri druga poki i kuze. Kine kuliata de druga kuworo kaŋo yu i ka naga ku meria Yudaya yu nu.

⁶⁶ ’Bo ŋutulu laga lo yinga kulia ŋani kilo druga ’de’ya ko kase teilikoni, ’bo ko druga piza ’beri adi‚ “Kulia ti ilo ŋiro de kine igbo’da adidinyo ya?” Ti teriŋi na Matalona ina ku lepe kinina.

⁶⁷ Monye lo Yoanelo Zakaria druga zore ku Yuka Nakiyena, druga poki i trugo na kulia ti Ŋun kine adi‚

⁶⁸ “Ti Mata‚ Ŋun lo Isiraeli ilo purani pura‚ igbonaga lepe alogu ŋutulu kanye kilo i dakundra na ko ina.

⁶⁹ Lepe atoŋizu Kariteni laga a riŋi lo ritundro yi‚ lo lupundro ku kalokoni lonye laga Dawidi kadilo.

⁷⁰ Be naga ma lepe puputukindri kazu kakeyo kanye laga a lokiye ti ’bero kilona‚

⁷¹ adi ma yi ku rite ku mero kaya kilo yu. ku ŋutulu lo ŋmoza yi a loro kilo i kenisi yu itro.

⁷² Lepe atikindra yi koŋo na’bu be naga ma lepe sarakindri kazu merenyezi kaya kilona‚ igbonaga lepe arambu kulia ti tomore nanye nakiyena kine

⁷³ ku koyo naga me lepe sarakindri merenye lika laga a kayo Abarahama ina.

⁷⁴ Lepe kazu asadru adi nye inininu yi ku mero kaya kilo i kenisi yu‚ ma yi ku kugi nye ’ba kuze‚

⁷⁵ ku logbiye laga a lokiye ku laga mŋgba ku lepe i koŋoni mu luŋa laga ma yi sakani zoru kilo giri.

⁷⁶ ’Bo do laga a ŋiro ilo‚ do iluŋu a kakeyoni lo Ŋun laga Ki koru ilo‚ igbonaga do ilo iworo ku Matalo i koŋo yu i kukundra na kikoli ti lepe kilona‚

⁷⁷ Do itikindra ŋutulu kanye kilo i dendra adi ko iririte ku ’diya na torozi kasiko kine‚

⁷⁸ ku ediyo lo Ŋun lika laga a lo tumadalo, i luŋa laga ma wara na ka na ŋiyuni ki yu i yeŋundra kayani lu.

⁷⁹ Do itikindra ŋutulu lo saka i mude kata yu ku i piri naga ku tuwa i laga yu kilo parara‚ ’bo do i’dolakindra yi kuwe i kiko lo teili lo trotrolo katani itro.”

⁸⁰ Ŋirolo druga ’dudyo ku iŋgbo ku teriŋi na yuka‚ ’bo lepe druga saka i diŋo yu yeŋadru tozo i luŋa laga ma lepe ku kpekini Isiraeli kilo lu.