KONESI 1 - Kakwa New Testament 1977

¹ Teofilo‚ i buku naga a kayona katani‚ na awudyo kulia giri naga ma Yesu sulukindri kondra ku togo’yu kine,

² yeŋadru tozo i luŋa lo ’dukuzini lepe ki yulo, ti lepe atikindra lososonyo lo nyumu kilo kukuzu ku Yuka Nakiyena.

³ I bo na sasanya na lepena, lepe apuku kasikoni zoru ku kpiyesi naga mŋgba naga rodri kine. ’Bo lepe apuku kasikoni i luŋazi laga meria iŋmani kilo de katani i kekendra na kulia ti tumata na Ŋun ina.

⁴ I naga ma lepe sakani kasi ko ina‚ asarakindra ko adi ka’bi ko ku lulupodru kaŋo Yerusalema katani‚ ’bo ti ko mone sare lo Monyelo, lo ta lepe adi‚ “Ta ayinga sare ŋanilo kuweni,

⁵ igbonaga Yoane atikindra baputizilo ku pio‚ ’bo gbo’di nyoga ta itiki baputizilo ku Yuka Nakiyena.”

⁶ Nyenaga ku ko laga amomore kugele‚ ko druga piza Yesu adi‚ “Mata‚ do iteyitokindro Isiraeli kilo tumatana i ina baŋe de ya?”

⁷ Yesu druga teyitokindro ko adi‚ “Ani gbo’da a kulia kasu i dendra na baŋe kuwa kiŋa ŋani laga ma Monyelo gelundri ku teriŋi nanye lepe ina.

⁸ ’Bo ta irurumbi teriŋi kugbo Yuka Nakiyena naga apondra kasu kini. Ta igbogbo’da a ka’doto kuwe ti bo na kuliana Yerusalemani‚ ku Yudaya giri‚ ku Samaria, yeŋadru suu i ’dute na kana.”

⁹ Kugbo lepe laga akulia de, kasiko i boŋadru ki yu‚ lepe druga ’dukuzi ki yu, ’bo ’diko ne’de druga mugo lepe kasiko i konyeni.

¹⁰ I naga ma ko gbuludri i ’diko yu ku lepe itunina, ku’de ŋutulu mure druga lira kasiko i lagani ti asozu bongola nakpe‚

¹¹ druga piza ko adi, “Ŋutu ti Galili kilo, ta lira i boŋadru i ’diko yu de gbandra ya? Ilo Yesu lo ’dumazi kasuni i ’diko yu ilo de‚ ma lu ipopondra de be naga ma ta boŋadri lepe i utu naga i ’diko yu ina de.”

¹² Ko druga yitozi bo Yerusalema yu ŋiyu i mere lo luŋu a Oliva ilo ki yu‚ lo gbo’da nyoga ku Yerusalema beti woro naga a na luŋa lo sabatolona.

¹³ Ku ko laga alubo kadi yu‚ ko druga kiyadru i kadi naga kina kata yu‚ i piri na sakani koŋana‚ Petero seku Yoane‚ ku Yakobo‚ ku Anderia‚ ku Filipo‚ ku Toma‚ ku Baritolomayo, ku Matayo, ku Yakobo laga a ŋiro lo Alifayolo, ku Simona laga a Zelotetalo, ku Yuda laga a ŋiro lo Yakobolo.

¹⁴ Kilo de giri druga ’delakindra ’beri ku teili giri i magu na Ŋun, kasi wate ku’de, ku Maria naga a ŋote na Yesuna, ku luŋaseri ti lepe kilo.

¹⁵ I kulu luŋa de Petero aŋiye ki i dridriŋi na luŋaseri, laga kenesi kasiko a ŋutulu kama gele ku meria mure kilo, druga kulia adi,

¹⁶ “Luŋaseri, kulia na wuwuro kine ti torumoki ’beri naga ma Yuka Nakiyena tazi a kayo ku Dawidi i kutuni kine ku kulia ti Yuda laga a ka’dolani lo kuwe lo ŋutulu lo moga Yesu kilo.

¹⁷ ’Bo lepe kazu akena kaya katani itro, ’bo atiki dridriŋi na ina kita de itro.

¹⁸ ’Bo ilo ŋutu de agborundro ne’de ka ku rope lonye lo kulia narolo. Druga ’dooro i kuwe ki rupu, pele na lepena druga pupu’do‚ monye ti lepe kilo druga buburundra kaŋo lari.

¹⁹ Kulia ŋani kine adena i dridriŋi na ŋutulu laga lo saka Yerusalema yu kilo giri, kuwade ka ŋanina aluŋu ku kutu nasiko ina adi Akelidama‚ trugo adi‚ Ka na Rima.

²⁰ ’Bo awuro i buku na Sauma katani adi, ‘Ti ’ba lo lepelo kolokini kana a ruba, ka’bi le’de ŋutu ku sasaka katani.’ ’Bo, ‘Ti le’de ŋutu lubi i piri na kita na lepena.’

²¹ Kuwade ŋutulu lo gbo’da kasi yu mu luŋa i naga ma Mata Yesu worozini kasi yi kugele ina,

²² ŋiyu i luŋa lo baputizi lo tiki Yoane lu yeŋundra tozo i luŋa lo ’dumazini Yesu kayanilo, le’de ŋutu kasiko i dridrini ti gbo’dini kasi yi kugele a ka’dotoni lo bo na kulia ti ŋiye na lepena.”

²³ Ko druga nyumundro ŋutulu mure‚ Yosefa lo luŋu a Barisaba, kari ti lepe ti ’ba kine se naga Yusito, ku Matia.

²⁴ Ko druga magu Ŋun‚ adi‚ “Mata lo dendra teiliko ti ŋutulu girilo‚ trukoki yi i ŋutu laga kilo de i dridriŋini, ŋutu laga mo do gelundrilo a ŋa,

²⁵ lo ilubo i piri naga ma Yuda kolokindri i ina kita na lososonyo de, ma utini kaŋo i piri nanyena ina.”

²⁶ Ko druga gumba ko ku zege, zege kilo druga ’duki ku Matia ki. Lepe druga kena i dridriŋi na lososonyo laga mere gele koyita gele kilo.