EFESO 1 - Kakwa New Testament 1977

¹ Paulo laga a lososonyo lo Kristo Yesulo, be naga ma Ŋun nyadrini ina‚ aroma ku ŋutu ti Ŋun laga Efeso yu, laga ku teiliko ti to’diri ku Kristo katani kilo.

² ’Busa na’buna ku teili lo trotro lo ŋiyu ku Ŋun Monye likalo yu, ku Mata laga Yesu Kristo yu itrolo ti gbo’dini ku ta.

³ Ŋun laga a Monye lo Mata lika Yesu Kristolo ti purani pura. Lepe a’boriza yi ku Kristo katani ku koŋo na’bu na yukana giri naga i ’diko yu ina‚

⁴ be naga ma lepe nyumundri yi ku Kristo katani ti inga kana aku ’delaki ina, ma yi ku gbo’da a lokiye‚ ’ba merikozi ku lepe i koŋo yu.

⁵ Lepe agelundra yi ’bero i gbo’da a ŋazi kanye ku Yesu Kristo ku nyadruna. kine de a na’bu ku lepe i konyeni be naga ma lepe pedrini i kondrana‚

⁶ ma yi ku pudyini lepe ku ’busa na’bu na lepe naga a na’bu koru naga ma lepe ’dogi yi kana‚ ku Ŋutu laga lo nyanyara ilo katani ina.

⁷ Ku Kristo katani yi adake ku rima ti lepe naga a ’diyeta ti torozi kaya beti naga ma ’busa na’bu na lepena gbo’dini a druma koru ina.

⁸ Lepe atoyilakindra yi ’busa na’bu ŋanina.

⁹ Lepe atodinikindro yi kulia naga na mumuyi mumuyi naga a na’bu kanye konyeni naga ma lepe pedrini ’bero ku Kristo katani i kondra kine ku tobodona, ku rame lo’bulo itro.

¹⁰ Ilo lopete de kpeza adi ku luŋalo ayeŋundra soso lepe itomodya kapazi giri a ŋo logele ku Kristo katani‚ kapazi ti ’diko kilo ku ti ka kilo itro.

¹¹ Ku Kristo katani yi agela ’bero i gbo’da a ŋutu ti lepe‚ yi lo yendru Kristo a kayo kilo‚ ku lopete lo Ŋun lo kondra kuliata giri be naga ma nye nyadrini pedrinina,

¹² ma yi ku tikindra todruma na lepena i pura.

¹³ Ku lepe katani ta itro laga ayinga kulia ti to’diri naga a kuu na’bu na riteni tana kilo, ta arugo lepe‚ ’bo ta arapa ku Yuka Nakiye naga ma Ŋun sarakindri tana.

¹⁴ Yuka Nakiye ŋanina a rape nika na kulia na irio yi ku Ŋun yu kine, ti inga yi aku ’deba kulia ŋani kine a kaya, ma yi ku tikindra todruma na lepena i pura.

¹⁵ Ku kine kulia de, igbonaga na ayinga kulia ti rugo nasu ku Mata laga Yesu katanina, seku nyadru nasu na ŋutu ti Ŋun kilo girina ina,

¹⁶ na ani ko’yu tikindra na iyete ku ta ma na rambini ta i magu niona katani.

¹⁷ Na magu adi Ŋun lo Mata lika Yesu Kristo, laga a Monye todrumalo ti tikindri ta yuka na tobodo ku na kpiyani kuliatana ma ta dendrini lepe ’busa.

¹⁸ Na magu ’do adi konye kasu ti teiliko kilo ti ŋazi ŋazu i medra na parara ma ta ku dendri kulia naga ma lepe lungi ta i yendru kine, ku koŋo na’bu naga a na’bu koru naga ma lepe sarakindri ŋutu kanye kilona,

¹⁹ ku todruma na teriŋi na lepe na kita kaya katani ina, yi laga a karuko kilo‚ teriŋi ŋani naga ani romoki moro, be naga ma lepe kitani ku tobulo nanyena ina.

²⁰ Ŋun akita ku Kristo katani ku ina teriŋi de naga ma lepe toŋizi lepe i ŋutulu laga atatuwa kilo i dridriŋi yu‚ i togbi’dikindra na lepe i keni lonye lo lutatelo i ’diko yu ina.

²¹ ’Bo Kristo agbi’diki i ’dola na kuweto ti kapa kilo giri i koŋo yu ku todrumaki kine giri, teriŋito kine giri‚ ku tumataki kine giri‚ ku kari na ’di’dinya ’di’dinya kine giri, agbo’da i ina baŋe de katani ka’deloni, ’bo i baŋe naga na ipopondra nu kata yu itro.

²² Ŋun a’delakindra kapazi giri ku lepe i mukuzini, druga ’delakindra lepe i kapazi giri i koŋo yu ku kulia ti tomore na karuko kilo.

²³ Tomore ŋanina a mugu na lepe, naga atozore ku lepe laga lo tozorodru kuliata kine giri mu piritolo.