EBERE 1 - Kakwa New Testament 1977

¹ Kazu ’berona Ŋun atakindra merenyezi kaya kilo kulia i baŋesi naga rodri kine‚ ku kikoli laga rodri kilo itro ku kutuzi ti kakeyo kilo.

² ’Bo i kilo luŋazi de laga a ’dute na baŋena kilo, lepe atakindra yi kulia ku kiko lo Ŋiro laga ma lepe gelundri a kalumani lo kapazi giri kilolo, ’bo Ŋun agbekindra kapazi ŋani kilo giri ku lepe.

³ Lepe lo mo’yu ku mo’yu na Ŋun ina, lepe a gbetita naga zozo be na gbiyeri lo Ŋun ilo, lepe lo toliriza kapazi giri lo gbeki kilo ku kulia na ta nye naga ku teriŋi kine. Kugbo lepe laga alalaadru torozi kine kaŋo, lepe druga ku gbi’diki ka i keni lo lutate lo Ŋun laga ku todruma koru ki yulo.

⁴ Lepe ayeŋundra a druma arodru malaika kilo, be naga kari naga atiki lepe kine arodru kari kasiko kine ina.

⁵ Ŋun aku kulia ku le’de malaikata adi, “Do a Ŋiro lio, indikini na ayuŋundro do.” Kugbo, “Na igbo’da a monye lo lepe‚ ’bo lepe igbo’da a ŋiro lio.”

⁶ ’Bo kugbo lepe laga azondra Ŋiro lonye laga ayuŋe a kayolo i kani‚ lepe akulia adi‚ “Malaika ti Ŋun kilo giri ti teminine lepe.”

⁷ Ku kulia ti malaika kilo kine‚ lepe akulia adi‚ “Ŋun agbekindra malaika kanye kilo be kobuŋeto, ku kakita kanye kilo be ŋede lo kima.”

⁸ ’Bo ku kulia ti Ŋirolo kine‚ lepe akulia adi‚ “Do laga a Ŋun‚ tumata nonuna nyena isaka paratra paratra, do lo ’deba tumata nonuna ku logbiye lo’bulo.

⁹ Do anyadru logbiye lo’bulo, ’bo do aŋmoza kulia naga ani gbo’da a ti kukuzu kine a naro. Kuwade Ŋun laga a Ŋun lolulo agelundra do‚ atikindra do nyola koru arodru maratezi kolu kilo giri.”

¹⁰ ’Bo, “Do laga a Mata a’delakindra muko na kana i suluki yu, ’bo ’dikona a kita naga na konu do ku kenisi kolu kilona.

¹¹ Ko ikakaraki, ’bo do iyiyiŋiki‚ ko giri ilelenga be na lengini bongona,

¹² do itratragu ko be bongo na gugumana, ko iwuwusa be kapazi lo sosoyi. ’Bo laga do igboloŋara ku ina busi de‚ kiŋazi kolu kilo aka lengani.”

¹³ ’Bo lepe aku kulia ku le’de malaikata adi, “Gbi’dikini i keni lio lo lutateloni‚ yeŋadru tozo i ’delakindra na na mero kolu kilo a si’de na ’de’i do mukuzi kolu kilo.”

¹⁴ Malaika kilo ani gbo’da giri a yukala naga a kakita‚ naga na sosonyo i logu na ŋutulu laga a kaluma ti ritena kilo ya?