Titus 1 - KAKAƊU NA ƁƊAKKARKARA

Thlawardzi

¹ I na Bulus na mafar Hyel ka aposələr Yesu Kristi an akwa thlentə wasika ngəni. Hyel ku carɓəla ra kamnyar kəi dunautə hamta jirər mji tə tsa carɓəla ka da ndzi mjirni, ka dunautə səndər ɗa ata kəra jirkur natə kalkal ka mdər nu Hyel ndzi kəgari.

² Tsuwa jirkurər ngəni ni thlata ata kəra laku tə mburu akwa vəkər ka mpikə na akur wa, natə Hyel na ana thlandər wa hara alkawalari ala mburu təng waci waci.

³ Antə kulini akwa saka na kalkalari, tsa ncantə ni akwa ndərərni, natə I akwa ngkərari ni, natə mdə na ali abbər kəi kəsi ni, atar tsawur Hyel na Mdər mbantər mburu.

⁴ I akwa rəbutə wasika ngəni ala ga, Titus, ɓzərna na jiri, atar hamta jiri natə shanga mburu ata kər ni. Ka Hyel na Tədda, ka Kristi Yesu na Mdər mbantər mburu, hara ala giri ɓɗakkur, ka tsa na ala giri msərakur.

Kəthlər Ar Titus Ahar Krete

⁵ I təra kazhar nga ahar Krete, kamnyar ka gə namtə suayeri na akwa tur mna, ka putə mji na ol'ola akwa kəlara di, apatə I ku tsawa ala ga.

⁶ Tar ka mdə na akwa bara ndzi ola ata kəra ikələziya ndzi kula sur nggəla adzə ni, ka tsa ndzi mdə na ka mwala duku, tsuwa ka maɗa'ni ndzi mji na ku hamta jiri akwa Yesu, aɗi maɗangkyar tə mda ata kamnya thləma ɗa akwa shambarkur wala nggyarɗəkur wa.

⁷ Kamnyar tar ka mdə na ola ata kəra ikələziya, na akwa wul kəthlər na ar Hyel, ndzi kula sur nggəla. Tsa aɗiya ndzi mdə na ka kər olkur wa, wala mdə tə ɗəffari ana ɓzi taktar wa, wala mdər wikə wa, wala mdə na mwavər wa, wala mdər hara mbulamkur kamnyar riɓa wa.

⁸ Amma tar ka tsa ndzi mdə na ana dlu mətəpi, ka mdə na hir hara su na ɓɗaku, mdə na ngkahəngkahari, na ka jirkur, mdə na ɓɗakkarkara, ka tsuwa mdə na ana mzhi mbwi ɗəffari.

⁹ Tar ka mdə na ola ata kəra ikələziya kəsi ndərər Hyel na ka jirkur ni ɓəɓal apatə mdə thlipa alari. Kamnyar atar apani antə tsa ata mzhi dunautə mji damwa ka surthlipə na jirari ni, ka ncaɓəla aka mji na akwa nggəlarari ni vəi shar ɗa.

¹⁰ Kamnyar mji aɗi hang na nggyarɗu, mji na ana gari kula kər, ka mjir pwaktə mda, apa mjir thla kaciya ma wa.

¹¹ Dwali ka gə mpa ala ɗa ka da hartə mnya ɗa, təng tə da akwa thlentə hangkala mjir kutakəyayeri atar thlipə suayeri na kalkal wa kamnyar bara gənar dlərpəkur, su tə aɗi kalkal ka da thlipə wa.

¹² Wala pal akwa nca mjir ɗa Krete na naɓi, ku pəla, “Parang mjir Krete ana thlandər, mwaɓi na ɗimi, harwayeri na hir səm hang.”

¹³ Gari ngəni ni jiri. Antə tar ka gə mpa ala ɗa swaiswai, kamnyar ka da ndzi ka hamta jiri na jirari,

¹⁴ ka da zhar ngga makumdlar mjir Yahudi ni, kəga tsawayeri na thlata akəla mjir nggəlar jirkur.

¹⁵ Aka mji na kəcəkəcari, shanga su kəcəkəcari. Amma aka mji na dlərpu, mji na kula hamta jiri, su aɗi na kəcəkəcari wa, kamnyar dzamər ɗa ka hangkala ɗa shang diɓərdiɓərari.

¹⁶ Da ana pəla abbər da asəndə Hyel, amma da ku nggəlar ni atar surharar ɗa. Antə da ku ndzi sur cika, mji na nggyarɗu, su aɗi na ɓɗaku tə da amzhi kuriyari wa.