Ruth 1 - KAKAƊU NA ƁƊAKKARKARA

Elimelek Ka Mjir Kutakəyirni Ku Mwari Ahar Mowab

¹ Waci waci akwabə Israila abaɗitə ndzi ka kuthlir ɗa alkaliyayeri an mjir pwar ɗa. Mi ku təri akwa tsəɗi nda, antə mdə laga akwa Bethlelehem ar Yahuda ka mwalankiɗa ka maɗashilər ɗa suɗa, ku mwari ra ndzi akwa tsəɗi Mowab.

² Thləma mdə ni an Elimelek, mwalankiɗa an Naomi. Antə thləma maɗa' ɗa ni an Mahlon ka Kiliyon. Da an mjir Efrath.

³ Sakatə da andzəndzi anda ni antə Elimelek ku sə mtə kazhar Naomi ka maɗa'ni suɗa.

⁴ Aghəla nda antə maɗashilər Naomi ni ku kəl maɗangkwiyir mjir Mowab, thləma ɗa an Orpa ka Ruth. Da ndzi anda mnyar məva kuma.

⁵ Aghəla nda antə Mahlon ka Kiliyon tsuwa ku mti kazhar Naomi shini kula sal, kula ɓzər.

Naomi Ka Ruth Ku Ngka Ahar Bethlelehem

⁶ Aghəla nda antə Naomi ku nggata abbər MTHLAKU ku hamta sur fakə hang aka mjirni. Antə tsa ka mwankir maɗa'ni ku ɗəmhədzi, ka zhar Mowab ka ngka avəi.

⁷ Antə da ləkwa laku ata kəma duku ka da ngka akwa Yahuda.

⁸ Amma tsu ata laku ni antə Naomi pəla ala ɗa, “Ngka giri avəi adzə mama' giri. Ka Hyel hara ala giri ɓɗakkur apatə giri ku hara ali, ka aka salərna ka maɗa' yeru.

⁹ Ka MTHLAKU hara ka giri wutə sal ka nggatə msərakur akwa kəyir giri.” Antə Naomi ku vədzə mnyari aka mnya ɗa, ka salamtə ɗa. Antə da pthli tuwa,

¹⁰ ka pəla alari, “Awa, mburu ata mwari kəga ga adzə mjir nga.”

¹¹ Naomi pəla, “Ngka giri maɗa'na. Kamnyar mə tə giri ata bara ka mburu mwari ri? Giri tamatə I ata jaktə wutə maɗashili ala giri ka giri kəl ya?

¹² Awa, ngka giri avəi, maɗa'na, kamnyar I ku hali ta I ajaktə kəl sal. Wala ma I an kəl sal ashina tahaku ni ka ya maɗashili,

¹³ giri ata zhar kəl sal ka səktə ɗa ka da kəl ya? Awa maɗa'na wa, giri asənda abbər ngəni amzhi hara wa. MTHLAKU ku nggəlar ra, antə giri akwa hara kətadzə ra.”

¹⁴ Antə da pthli tuwa ka damwa. Antə Orpa vədzə mnyari aka mnya mama' salngkiɗa ka salamtə ni, ka ngka avəi, amma Ruth ku nggəla adzə ni.

¹⁵ Antə Naomi pəla aka Ruth, “Marhwamdlər nga ku ngka ka ləha adzə mjirni ka haptər ɗa. Ngka giri ka tsa.”

¹⁶ Amma Ruth pəla, “Usa, ga aɗiya kiɗə kəri ka mwa ndəkə wa, wala kəi zhar ta nu ngə wa! Kəlara vəi tə ga ata mwari ata, I ata mwari. Kəlara vəi tə ga ata ndzəndzi ata, I ata ndzəndzi. Durər nga ata ndzi durərna, antə Hyelər nga ata ndzi Hyelərna tsuwa.

¹⁷ Kəlara vəi tə ga ata mta ata, I ata mta anda, ka mdə harəmta ra adzə nga. Ka Hyel ɗi ra ka ɗi na mwavər ma I ku zhar ka su damwa ndəkəmta mwa, ma aɗi mtə wa.”

¹⁸ Sakatə Naomi wuta abbər Ruth ku ndzangkir ka da mwari ka tsa, tsa aɗi ndər kəra wa.

¹⁹ Antə da ku ləkəma har tə da mzhitə Bethlelehem. Sakatə da mzhita antə shanga kutadi ku ndatədzi. Antə mwanki na ka ndzi anda yu nvwa ɗa abbər, “Ngəni wa ri apa Naomi ni?”

²⁰ Tsa pəla ala ɗa, “Giri aɗiya kəga ra Naomi wa. Kəga giri ra Mara, kamnyar Hyel na ka Duna ta Shang ku vu ra akwa bwani na mwavər kamta.

²¹ Sakatə I ku zhar vəi ngəni, I ka su hang, amma MTHLAKU ku ngka ka iya kula su. Kamnyar mə tə giri ata jaktə kəga ra Naomi ri təng tə MTHLAKU na Hyel ku nggəlar ra ka vu ra akwa bwani ni?”

²² Apani antə Naomi ka mwalaɓzərni Ruth na ngkwar tsəɗi Mowab ku ngka ahar Bethlelehem. Da mzhita akwa sakar thla barli.