Obadiya 1 - KAKAƊU NA ƁƊAKKARKARA

¹ Ngəni an labar ar MTHLAKU na ka Duna ta Shang, natə Obadiya ku wuta akwa wulsu arni ata kəra Edom. Mdə ku thlentə mdə laga ka ndər aka mji, antə yeru ku nggatə labarərni ni abbər, “Thlatə giri, ka mburu ra dlər Edom!”

Naɓikur Ata Kəra Ndlar Edom

² Kamnyar MTHLAKU ku pəla aka Edom, “I ata namtə nga ka gə ndzi raka ta shang akwa nca mambila durayeri, tə kəlara mda ata sə rutə nga kamta.

³ Hirkərkur ar ngə ni ku pwaktəmta nga, gə na ana ndzi akwa gular gagəma gə na ana ndzi miu amta ata kəra gar. Ga ana pəla akwa ɗəffa ga abbər, ‘Wan ata mzhi ndəkərghəi ra ata di ri?’

⁴ Wala ma ga an ləmta ahar hyel miu apa duku, wala ma ga an namtə mbwar nga akwa nca sasəlkayeri, tsu I ata kəlghəi nga ata di. I na MTHLAKU an pəla.”

⁵ “Ma həlayeri si avəyarngkiri, ma dəkalayeri ləvəi ata kəra ga aviri, ai da ana fatə suayeri tə da akwa barari daci. Ma mji akwa ɗəm yar anap, da ana zhar bwaduku ata kamnyar mjir hwilkəmahwilka. Amma Edom, ar nga sha an wutə nga!

⁶ Amma mjir Edom, giri na nyarmbwar Isuwa, dawayeri ar giri ku tsarɓəla sur giri shang, da ku pakɓəla gənar giri tə giri ɗuwamta ni.

⁷ Shanga mji tə giri ana paktə kər kəga da, ku pwaktəmta giri ka kədləɓəla giri akwa tsəɗiyir giri, mji tə giri ana mbərsa ka da ku pwaktəmta giri ka mula ala giri. Pazhayeri tə giri ana səm susəma ata kəma duku ku nggəi ala giri dərku ka pəla, ‘Ɗəɗukurər ɗa ni ama shang ri?’ ”

⁸ MTHLAKU akwa pəla, “Ma vir tə I ata ɗi mjir Edom, I ata kurəmta shilər ɗa na ɗəɗu ɗəɗu ka duna ni, kəi shamta shanga nggaɓəla sur ɗa.

⁹ Bərni Teman, sojayeri ar nga ata thlivəra, antə mda ata kurəmta shanga sojayeri na akwa Edom.”

Bikər Edom

¹⁰ “Kamnyar mpa tə gə hara aka kəkayeri ar Yakub, antə ga ata ləkwa səli, tsuwa mda ata shamta nga har ba saka madi.

¹¹ Vir nda ga ku thləthlatə catu, sakatə dawayeri ɓələmta nyarfayeri arni, ka ləvəi ka famnya gənar mjir Urushalima, ka ndəkəi akwa daɓwa ɗa, apani ga ku ndzi apa dukwa dawayeri arni.

¹² Ai aɗi kalkal tə gə thləthlatə catu akwa wul maɗama' nga, sakatə mda akwa mwantə ɗa akwa tsəɗi mafakur ni wa. Aɗi kalkal tə gə hara kucali akwa sakatə mda akwa shamta mjir Yahuda ni wa. Aɗi kalkal tə gə kumshi ɗa akwa sakatə asar wutə ɗa ni wa.

¹³ Aɗi kalkal tə gə ləkwa tsəɗi mjirna ka famnya sur ɗa, akwa sakatə asar wutə ɗa ni wa. Jiri, aɗi ɓɗaku tə gə hara kucali, akwa sakatə asar wutə ɗa ni wa. Aɗi kalkal tə gə famnya gənar ɗa akwa sakatə asar wutə ɗa ni wa.

¹⁴ Aɗi kalkal tə gə thləthlata akwa matəngndla, ka tsəgəi mji na akwa hwi mpika ɗa ni wa. Aɗi kalkal tə gə ngkəi mji na msərəmta mta ka hamta ɗa akwa tsiya dawar ɗa sakatə asar wutə ɗa ni wa.”

Hyel Ata Hara shariya Aka Shanga Mji

¹⁵ Vir ku hara kudzəha natə I na MTHLAKU ata sə hara shariya aka shanga mji. Edom, su tə gə hara aka Israila antə mda ata sə hara ala ga, shanga ɗimikurər nga ata ngka ata kəra ga.

¹⁶ Apatə mjirna ku ɗar bwani ata garərna na ɓɗakkarkara, antə shanga tsəɗiyayeri na kalaktə ɗa ni ata sə ɗar bwani, da ata sə ɗar bwani har ka da sha ata kəra duniya.

Israila Ata Sə Səma Akwa Tsikərari

¹⁷ “Amma ata Gar Sihiyona mji laga ata sə msəra antə gar ni ata sə ndzi Vəi na Ɓɗakkarkara. Nyarmbwar Yakub ata sə dlutsə tsəɗiyir ɗa, ka da jaktə ndzi mthlakər sur ɗa.

¹⁸ Sakanda Yahuda ata sə ndzi apa u'u ka Israila ndzi apa kyanggyara u'u Amma ar Edom tsa ata ndzi apa kusar ul'ula antə u'u ata mbamta ɗa shang tuktukku. Dur Isuwa aɗi ata mbil ka mpikə wa. I na MTHLAKU an pəla,”

¹⁹ “Mjir Yahuda na təbwar anəm ata mbultsə Gar Edom, mji na təbwar ramta ata kusar garayeri ata sə mbultsə Filistiya. Mjir Israila ata sə mbultsa bwa na ar Ifrayim ka Samariya, mjir Benjamin ata sə mbultsə Gileyad.

²⁰ Sojayeri ar Israila tə mdə mwanta akwa mafakur, ata sə ngka ka mbultsə tsəɗi Kanana japu ka Zarefath. Mjir Urushalima na akwa mafakur ahar Sardis ata mbultsə diyayeri na akwa anəmər Yahuda.

²¹ Mji natə Hyel ku msərantə mpika ɗa, ata sə lətə Gar Sihiyona, ka hara kuthlikur ata kəra mjir Edom. Antə MTHLAKU surni an ata ndzi kuthli.”