Jona 1 - KAKAƊU NA ƁƊAKKARKARA

Jona Ku Hwi Ta MTHLAKU

¹ Vir laga MTHLAKU ku gari aka Jona na ɓzər Amittai abbər,

² “Thlatə kara mwari ahar Nineva akwa bərni na ol ni, kara mpa ala ɗa ata kəra ɗimikurər ɗa, kamnyar ɗimikurər ɗa ku si akəmi.”

³ Amma Jona ku nggəlari, tə tsa thlatə ka təra kamnyar hwiyimta MTHLAKU, ka təra ləhar Tarshish. Tsa ləghəi ahar Yoppa, ka wutə shar yimi na akwa bara mwari ahar Tarshish. Antə tsa ntəmta liyar shar ni ka ləkwa, antə da təra ata kəma duku ka ləhar Tarshish, kamnyar ka tsa hwiyimta MTHLAKU.

⁴ Amma MTHLAKU ku thlentə shambar na ka duna ata kəra manda ni, antə shambar na mwavər ni ku hara apa tsa ata pukthləmta shar ni.

⁵ Antə shanga mjir nggur shar ni ku yakata tə kəlara mda akwa nca ɗa ku baɗitə kiɗə hyelər ni. Antə da fwaɓəla kəlayeri na akwa shar ni ka pumta ɗa akwa yimi kamnyar ka da kəmta kəgəɓkur aka shar ni. Amma shang tə su ngəni akwa hara ni, ar Jona tsa apəpəi ciju aghəi akwa kuta shar akwa dlaɓu henər ni.

⁶ Antə olər mjir nggur shar ni ku mwari adzə ni ka pəla alari, “Apa madi tə ga ata mzhi heni akwa saka ngəni ri? Thlatə kara kiɗə hyelər nga! Nuhum tsa akətadzə mburu ka tsa mbantə mburu.”

⁷ Antə mjir nggur shar ni pəla aka nvwa ɗa abbər, “Asər giri ka mburu ndzəl su, ka mburu nggaɓəla mdə natə asar ngəni ni thlata atar ni.” Antə da ku hara, antə su ni ndla ata kəra Jona.

⁸ Antə da pəla, “Pəla ala yeru su na hara tə asar ngəni si ata kəra mburu ni. Man kəthlərər ngə ri? Gə thlata ahar mə ri? Man tsəɗiyir ngə ri? Gə durər mji madə ri?”

⁹ Antə Jona pəla, “I mdər Ibrani. I ana vəngkər səli aka MTHLAKU na Hyel na amtazi, na namtə manda ka di na ul'ulari.”

¹⁰ Jona ləkəma ka pəla ala ɗa abbər tsa akwa hwi ta MTHLAKU. Antə mjir nggur shar ni ku thlivər ka duna, tə da pəla alari, “Kamnyar mə tə gə hara su apani ri!”

¹¹ Shambar ni ku vərvər hara mwavər. Antə mjir nggur shar ni yu ni abbər, “Man su tə ka yeru hara ala gə ka hangkala yimi ni pwi ri?”

¹² Antə Jona pəla, “Kəɓəla giri ra ka giri ndzəhəuwa ra akwa manda ni, antə mpar yimi ni ata thləthlata. Kamnyar I ku sənda abbər shambar na mwavər na si ata kəra giri ni kamnyar na.”

¹³ Wala apani mjir nggur shar ni ku kəɗar nggur shar ni abbər ka da mzhitə mnya maghəm, amma da aɗi mzhi wa kamnyar tə shambar ni ku vərvər hara mwavər ala ɗa.

¹⁴ Antə da tuwa ka kuraku aka MTHLAKU abbər, “MTHLAKU, yeru akwa kiɗə ngə, MTHLAKU, usa ga aɗiya hir ka yeru mtəgəmtadzi kamnyar mpika mdə ngəni wa. Ga aɗiya hir ka watsəɓər biku ar tsi mdə ngəni ndzi ata kəra yeru wa. Kamnyar ga ku hara su na kəskəra ga MTHLAKU.”

¹⁵ Antə da ku kətə Jona ka ndzəhəu ni akwa manda, antə mpar yimi ni ku pəpəi təkəma.

¹⁶ Antə mjir nggur shar ni ku thlivər MTHLAKU ka duna, antə da hamta saɗaka aka MTHLAKU, ka hara alkawal alari.

¹⁷ Antə MTHLAKU vu tə kəlfa laga na ola ku ndasəmnya Jona. Antə tsa ndzi akwa kuta kəlfa ni mnyar vir makər, pci ka viri.