Fəlimon 1 - KAKAƊU NA ƁƊAKKARKARA

Thlawardzi

¹ I na Bulus na akwa pərsəna kamnyar Kristi Yesu, ka ɓzərma' mburu Timothli an akwa rəbutə wasika ngəni. Yeru akwa rəbuta ala gə Fəlimon, gə na mdər kəthlər nvwa yeru na hirhirari,

² ka ngkwarma' mburu Afiya, ka Arkippus na soja nvwa mburu, ka aka mjir ikələziya na ana tsaptədzi akwa kəyir ngə ni.

³ Ka Hyel na Təddar mburu, ka Yesu Kristi na Mthlaku, hara ala giri ɓɗakkur, ka tsa na ala giri msərakur.

Hirkur Ka Hamta Jirər Fəlimon

⁴ Fəlimon, I ana usar Hyelərna parang sakatə I ku ɗangtə nga akwa adduwarna.

⁵ Kamnyar I ana nggata ata kəra hamta jirər nga akwa Mthlaku Yesu ka ata kəra hirkurər nga aka shanga mjir Hyel.

⁶ I akwa hara adduwa abbər atar paktə kər kəga mji damwa ata kəra hamta jirər ngə ni, da ata sə nggaɓəla shanga suayeri na ɓɗakɓɗaku tə mburu kəgari akwa Kristi ni, ka nggatə msərakurari.

⁷ Kamnyar hirkurər ngə ni, ɓzərma'na, ku hara tə I ku ndzi ka kucali hang ka duna, ka shiktədzi, kamnyar ga ku dunautə ɗəffa mjir Hyel.

Kiɗər Bulus Kamnyar Onisimus

⁸ An su na hara tə I ata mzhi yu dlara akəla ga kula thlivər ni. I ata mzhi tsawa ala ga abbər ka gə hara su ngəni akwa thləma Kristi kamnyar tsa an su tə kalkal ka gə hara.

⁹ Amma kamnyar hirkur na akwa daɓwa mburu, I wuta abbər kuji kəi kiɗə kəra ga. Antə ka gə namtə ngəni apa kiɗərna, I na Bulus, na ku hali, ka tsuwa na pərsəna kulini kamnyar Kristi Yesu.

¹⁰ I akwa kiɗə kəra ga ata vəya ɓzərna Onisimus, natə I ndzi apa baba'ni sakatə I akwa pərsəna ni. Tsa ndzi ali apa ɓzərna, kamnyar I an vu tə tsa dlu Kristi azi akwa pərsəna ni.

¹¹ Akwa saka na təramta tsa aɗi ka ampani ala gə wa, amma kulini tsa ka ampani ala mwa japu.

¹² Antə I akwa thlentə ni ala gə ka damwa, tsa tə I hir ni ka ɗəffi shang ni.

¹³ I hir kəi kəsi ni adzə ra akwa pərsəna ni kamnyar ka tsa dlar ra akwa ngkər labar na msəra ni ata vəya ga.

¹⁴ Amma I aɗi akwa bara hara su kula tsəkwitə nga ata kər wa, kamnyar I aɗi akwa bara ka ɓɗakkur tə ga ata sə hara ali ni ndzi apa ar dwalikurari wa, amma ka tsa ndzi ar hirər ɗəffa ga.

¹⁵ Ata mzhi ndzi abbər Onisimus zhar ngə mnyar saka laga raka ni kamnyar ka tsa sə ngka adzə nga ka giri ndzi ka tsa ba saka madi.

¹⁶ Aɗi abbər ka gə dlu ni ata kəra abbər tsa mafa daci wa, amma ka təramta ar mafakur, watau ka gə dlu ni ata kəra kulini tsa ɓzərma mburu na hirhirari. Kamnyar I hir ni swaiswai, antə ma gə shang ga ata hir ni təramta ra, kamnyar tsa mafar nga ka tsuwa ɓzərma' nga atar hamta jiri akwa Mthlaku.

¹⁷ Antə apani ma ga an ku kətə ra abbər I mdər kəthlər nvwa nga, to ka gə dlu ni kalkal apatə ga ata dlu ra.

¹⁸ Ma tsa ku ɓzamtə ala gə su, wala ma ga akwa nu ni təmbəl su laga, ka gə yu akəli.

¹⁹ I na Bulus an akwa rəbutə wasika ngəni ka tsi surna abbər I ata ntəmtari ala ga. I aɗi akwa bara pəla abbər gə wutə mpikə na akur wa ni atar na wa.

²⁰ Antə ɓzərma'na, usa ka gə hara ali ɓɗakkur ngəni kamnyar Mthlaku. Dunautə ra ata kəra su ngəni akwa Kristi!

²¹ I ku mbərsa abbər ga ata kələngkər ali. An su na hara tə I akwa rəbutə wasika ngəni ni, kamnyar I ka hamta jiri abbər ga ata harari har təramta su tə I pəla ala gə ni.

²² Tsuwa, ka gə namta ali mbwar mətəpi, kamnyar I ka hamta jiri abbər ma Hyel hira atar adduwar giri, I ata jaktə ngka adzə giri.

Thlawardzi Na Akwa Tsikərari

²³ Ipafras, na ata kəma duku ka iya akwa pərsəna ni akwa thlawar giri.

²⁴ Tsuwa Markus na mdər kəthlərərna, ka Aristarkus, ka Demas, ka Luka, natə shanga ɗa mjir kəthlər nvwa ra ni, akwa thlawar giri.

²⁵ Ka Mthlaku Yesu Kristi hara ala giri ɓɗakkur, ka tsa ndzi adzə giri.