Ezra 1 - KAKAƊU NA ƁƊAKKARKARA

Sairus Ku Zhar Mjir Yahudi Ka Da Təra

¹ Akwa məva na ntangkəma ar Sairus na kuthlir Parsiya, antə MTHLAKU tsəkwar ɗəffa Kuthli Sairus abbər ka tsa psəmnya labar akwa shanga kuthlikurərni abbər ka mjir Yahudi ngka akwa tsəɗiyir ɗa. Su ngəni ku hara kamnyar nghyaɓəla su tə MTHLAKU pəla atar naɓi Irmiya. Tsuwa akwa kakaɗə ni kuthli ku rəbuta abbər,

² “I na Sairus na kuthlir Parsiya akwa pəla, ‘MTHLAKU na Hyel na amtazi, ku hamta ali shanga kuthlikurayeri na akwa duniya. Tsuwa tsa ku tsawa ali kəi hənta alari mbwa ahar Urushalima akwa tsəɗi Yahuda.

³ Antə kulini kəlara mda akwa nca giri na mjirni ata mzhi ngka ahar Urushalima akwa tsəɗi Yahuda, ka tsa jaktə həntə mbwar MTHLAKU na Hyelər Israila ni. Tsa an Hyel na akwa Urushalima. Antə ka Hyel arni ndzi ata vəi duku ka tsa.

⁴ Tsuwa kəlara di natə mjir Yahuda ku mbil ka mpika akwa, ka mjir di ni hamta dlarər ɗa aka kəlara mdər Yahuda na akwa nca ɗa ni. Ka ntəwulayeri arni hamta alari adzərfa, ka dinar, kəga kari, kəga mwaɓiyayeri, ka shanga sur hamta na ar hirər ɗəffu, kamnyar jaktə həntə mbwar vəngkər səli aka Hyel na ahar Urushalima ni.’ ”

⁵ Antə pristayeri, ka mjir Lawi, ka mji ol'olər kutakəyayeri ar Yahuda ka Benjamin, ka shanga mji natə mambələr Hyel ku tsəkwar ɗəffa ɗa, ku thlatə kamnyar mwari ra jaktə həntə mbwar vəngkər səli aka MTHLAKU na akwa Urushalima ni.

⁶ Antə shanga ntəwulayeri arɗa ku dlar ɗa ka suayeri tə mdə nam ka adzərfa kəga dinar, kəga kari, kəga mwaɓiyayeri, ka cautayeri damwa na ɓɗakɓɗaku, ata kəra sur hamta ar hirər ɗəffu ni.

⁷ Antə Kuthli Sairus fwaɓəla kariyayeri na akwa kutambwar MTHLAKU, natə akwa saka na təramta Kuthli Nebukadnezzar fwaɓəla akwa mbwar vəngkər səli na ahar Urushalima ka pwi akwa mbwar haptərni ni.

⁸ Antə Sairus na kuthlir Parsiya səntə suayeri ngəni ka pwi akwa tsiya Mithredath na an mdər kəsi alari gənarni. Antə Mithredath ku jikaɓəla shanga suayeri ni ka hamta aka Sheshbazzar na olər mjir Yahuda.

⁹ Ngəni an hangkurər suayeri tə Kuthli Sairus hamta ni. Tsa hamta tasayeri na ol'ola tə mdə nam ka dinar, makkumari, ka tasayeri na ol'ola tə mdə nam ka adzərfa dəpu pal, ka tasayeri damwa sərkumari ka əmdla,

¹⁰ ka tasayeri ar dinar makkumari, ka tasayeri ar adzərfa aru nfwar ka kuma, ka kariyayeri damwa dəpu pal.

¹¹ Antə shanga tasayeri na ar dinar kəga na ar adzərfa ni ku hara dəpu ntəfu ka aru nfwar. Antə Sheshbazzar fatə shanga suayeri ngəni ka sənta, akwa sakatə tsa ka mjir Israila na akwa mafakur akwa Babila ni akwa ngka akwa Urushalima.