Esta 1 - KAKAƊU NA ƁƊAKKARKARA

Kuthli Ahasuwerus Ku Ɗəmhə Vir Kucali

¹ Nggədza suayeri na ku hara akwa sakatə Kuthli Ahasuwerus akwa kuthlikur. Ahasuwerus ku hara kuthlikur ata kəra lardayeri aru ka sərkumari ka murfa, baɗita ahar Indiya har ka mwanta ahar Ithliyopiya.

² Akwa saka nayeri ni shang Kuthli Ahasuwerus akwa hara kuthlikur ni ahar Shushan na an di kuthlikur ar tsəɗi ni.

³ Akwa məva na makərkur ni, antə tsa na Ahasuwerus ku ɗəmhə susəmər kucali na ola kamnyar kwakunayeri ka mjirni na ol'ola. Tsuwa tsa ku kəgatə shanga mji na ol'olər mpa na ahar Parsiya ka na ahar Mediya, ka gwamnayeri ka mji na ol'ola akwa lardayeri ndaga, ka da si akəmari.

⁴ Antə tsa ku ncantə gənar kuthlikurərni, ka olkurərni, ka darajarni ar virayeri hang, vir pal pal aru pal ka nciskumari.

⁵ Aghəla sakatə virayeri ngəni ku təramta, antə kuthli ku ɗəmhə susəmər kucali na ola aka shanga mji, ol ka ntsaha na akwa bərni Shushan. Antə da ku hara vir murfa akwa kucali ni. Tsuwa da hara kucali ni akwa bəbal nyarfur kuthli na kalakkalakari ka nfur pukdlayeri tə mdə ncimta.

⁶ Mdə ku dəɓatə tenga bəbal ni ka lapəli na ɓɗaku tə mdə mbwamta. Yimər lapəli ni an gwargwarari mwapu ka zarkina zarkina. Tsuwa mdə hahəi lapəliyayeri ni ata səwur puwa ar lilin na ka kalari ɓɗaku, mwapu ka mamza, ata lenduwar adzərfa tə mdə hahəi ata zhimbwalayeri ar pelar dəɓa tə mdə marəmta ɓɗaku. Tsuwa mdə ku pwi kujarayeri na ol'ola tə mdə nam ka dinar ka adzərfa ata vəi ni. Mdə thlirtə bəbal ni ka pelar dəɓa zumzum tə mdə magarəmta ɓɗakɓɗaku.

⁷ Mdə ku hamta sur sa akwa kapayeri ar dinar na ka ɗahər ɗa zumzum. Tsuwa mdə ku hamta yimər anap ni zumzum hang aka mji apatə waskəi akwa barari kamnyar kuthli ni ka gəna hang.

⁸ Mda aɗi thlamta hangkur su tə ka waskəi sa wa kamnyar kuthli ku pəla aka mjir kəthlər arni ka da hamta aka waskəi apatə tsa akwa barari.

⁹ Tsu akwa saka ngəni tsuwa antə Vashti na Kuthli Mwala ku ɗəmhə susəmər kucali na ola arni aka mwankir kutakəyir Kuthli Ahasuwerus.

Mdə Ku Kəli Vashti Ata Kuthli Mwalakur

¹⁰ Akwa vir na murfəkur ar susəmər kucali ni, sakatə kuthli akwa nggatə msərakur kamnyar yimər anap tə tsa sa, antə tsa kəga kulaɓayeri laga murfa na akwa kəthlər alari. Mji ngəni murfə ni an Mehuman, ka Bizthla, ka Harbona, ka Bigthla, ka Abagthla, ka Zethlar, ka Karkas.

¹¹ Antə tsa tsawa ala ɗa ka da kəga Vashti na mwalankiɗa, ka tsa si akəmari ka dzakwar kuthlikur ni ata kərari. Tsa bara ka tsa ncantə dakwikur mwalankiɗa ni aka kwakunayeri ka mətəpiyayeri arni, kamnyar mwala ni dakwi jiri.

¹² Amma sakatə kulaɓayeri ni ku mwari kamnyar ka da si ka tsa, tsa aɗi hir si wa. Antə su ngəni ku ɓzamtə ɗəffa kuthli ni, har tə ɗəffari ku thlatə ka duna.

¹³ Antə Kuthli Ahasuwerus ku yu sauri akəla mji na ɗəɗu, mji na ka səndə su ata kəra tsawayeri ka shariya. Tsa hara apani apatə tsa ku tsəli ka harari.

¹⁴ Thləma mji tə tsa yu sauri akəla ɗa ni an Karshena, ka Shethlar, ka Admathla, ka Tarshish, ka Meres, ka Marsena, ka Memukan. Da an mji ol'ola murfa na ahar Parsiya ka Mediya, mji na ka lakur wutə kuthli akwa kəlara sakatə da ata barari, kamnyar da ka kujarar ɗa. Da mji na ka vəi olkur ta shang akwa kuthlikurərni.

¹⁵ Antə kuthli ni pəla, “I na Kuthli Ahasuwerus I ku thlentə buɗayeri arna adzə Kuthli Mwala Vashti abbər ka tsa si, amma tsa nggəlar ta si. Antə man su tə tsawa pəla ka mdə hara ka tsa ri?”

¹⁶ Antə Memukan pəla aka kuthli ka kwakunayeri arni abbər, “Ka barkar dəkəl! Ai aɗi kuthli shini antə Vashti ɓzamtə ɗəffari ni wa, amma shanga kwakunayeri ka shanga mji na akwa kuthlikurər nga.

¹⁷ Kamnyar jiri shanga mwanki na akwa tsəɗi ni ata nggata abbər Kuthli Vashti ku nggəlar ta mwari akəma kuthli sakatə tsa kəga ni. Antə su ngəni ata vu ka mwanki sə rutə shilər ɗa.

¹⁸ Kamnyar tsu ashina ngəni ma har mwankir kwakunayeri ar Parsiya ka Mediya ku nggatə hal natə Kuthli Mwala Vashti hara aka kuthli ni, da ata hara hal ngəni aka shilər ɗa. Antə su ngəni ata səntə rutə ka mpa.

¹⁹ Antə ma ahara aka Barkarni, ka tsa səɓəla ka tsawa, tsuwa ka mdə rəbutə ni ka tsa ndzi pal akwa nca tsawayeri ar mjir Parsiya ka Mediya natə mda amzhi paliyari wa, abbər Vashti aɗiya jaktə si akəma Kuthli Ahasuwerus kəra wa. Antə ka Barkarni bara mwala damwa na ata kəɓa ka vəi ndzəndziyir olkur ngəni, mwala na ku təramta ni ka hangkal, ka mdə bartə kərari.

²⁰ Tsuwa ka mdə psəmnya tsawu ngəni akwa shanga tsəɗiyayeri na akwa kuthlikurər nga. Antə apani shanga mwanki ata sə nar olkur aka shilər ɗa, na ol'ola ka na raka raka.”

²¹ Antə kuthli ka mjirni na ol'ola ku nggatə msərakur sauri ngəni. Antə kuthli ku hara tsu apatə Memukan ku pəla alari.

²² Antə tsa ku thlentə kakaɗayeri akwa shanga bwayeri na akwa tsəɗiyirni. Kəlara bwar tsəɗi ni mdə ku thlenta ala ɗa ndər ni akwa mnyar ɗa ka rəbutər ɗa, abbər ka kəlara mdə sal ndzi mthlakər kutakəyirni, ka tsa an thlamta su tə ka mdə hara.