Ayuba 1 - KAKAƊU NA ƁƊAKKARKARA

Shatan Ku Ngkərtə Ayuba

¹ Waci waci mdə laga aɗi akwa tsəɗi Uz ka thləmari Ayuba. Mda aɗi ana kathləmari akwa su na ɗimi wa, kamnyar tsa ana hara su kalkal parang saka. Tsa ana thlivər Hyel antə tsa aɗi ana hara su na ɗimi wa.

² Ayuba ka maɗashili murfa ka maɗangkwi makər.

³ Tsa ka təma ka kwi dəpu murfa, ka dləkəmauwayeri dəpu makər, ka thla kukula dəpu pal, ka mwala kwara aru ntəfu, ka mjir kəthlər alari hang ka duna. Tsa an mdə na ka gəna ta shang akwa bwar raghəi.

⁴ Maɗashilər Ayuba ana pal hara kucali avəyar nvwa ɗa, antə da ana pal kəgatə maɗama' ɗa ka da sə səm susəmər kucali avəyar ɗa. Tsuwa da ana kəgatə maɗama' ɗa na maɗangkwi makər ni ka da səm ka sa ata kəma duku.

⁵ Aghəla kəlara vir səm susəmər kucali ni, Ayuba ana dli thlatə ɗəɗəpə mbing ka hamta saɗakar kəcə biku ata vəya maɗa'ni. Tsa ana hara apani kamnyar thlivər abbər nuhum pal akwa nca maɗa'ni ni akar ka hara su na ata ɓzamtə ɗəffa Hyel.

Ngkərtədzi Na Ntangkəma Ar Ayuba

⁶ Vir laga, sakatə mjirthlentərhyel akwa tsaptədzi akəma MTHLAKU, antə Shatan si akwa nca ɗa.

⁷ Antə MTHLAKU yu Shatan ni abbər, “Ar ngə gə thlata ama tsu ri?” Antə Shatan ni pəla alari abbər, “I akwa ləghəi ka ləmta, akwa kadla akwa dlarhə shanga duniya ni.”

⁸ Antə MTHLAKU pəla aka Shatan, “Ga ku wutə Ayuba na buɗarna ya? Ai mda aɗi na ana hara su kalkal ka jirkur apa tsa akwa duniya ni wa. Tsa ana thlivər ɗəffa Hyel, antə tsa aɗi ana hara su na ɗimi wa.”

⁹ Antə Shatan shinau aka MTHLAKU abbər, “Ga ana wuta apa Ayuba ana vəngkər səli ala gə ni gapan ya?

¹⁰ I ana wuta apa parang ga akwa ɓəlatə ni ta asar, ka tsəlpita alari kutakəyirni, ka shanga su tə tsa kəgari akwa kəlara bwa. Ga ku vədza alari barka, antə shanga su tə tsa kəgari akwa tsəɗi ni akwa jakjaka. Ga wul jili gəna tə tsa kəgar əng!

¹¹ Amma ar nga ngkərtə ja apa ga ata tsəkwar shanga su nayeri ni, ma ga aɗi wuta abbər tsa ata nggəl ngə wa!”

¹² Antə MTHLAKU pəla aka Shatan, “To kalkal, hara su tə gə hira aka shanga su tə tsa kəgari, amma ga aɗiya tsəkwar dzari wa.” Antə Shatan ku psi laku ka təra.

Ayuba Ku Ni Ka Maɗa'ni Ka Gənarni

¹³ Vir laga sakatə maɗa' Ayuba akwa səm susəmər kucali akwa kəyir ɓzər olər ɗa,

¹⁴ antə mdərthlentə laga səvəyar Ayuba ka hwi, ka pəla, “Yeru akwa kukul fakayeri ka thlayeri, ka kwarayeri tsuwa akwa ɓəla adzə yeru.

¹⁵ Təng təkəma təng mjir Sabiya si ka pungkərdzi ala yeru, ka fatə thlayeri kəga kwarayeri ni, ka kurəmta shanga buɗayeri ar nga ka katsakar. Təng I duku an msəra kamnyar kəi sə jikata ala ga.”

¹⁶ Kwabə tsa akuri gari ni, mdə damwa ku si ka hwi ka pəla, “Wurkər Hyel ku pthləmta təmayeri ni kəga mjir ɓəla ɗa, ka mbamta ɗa shang. Təng I duku an msəra kamnyar kəi sə jikata ala ga.”

¹⁷ Kwabə tsa akuri gari ni, mdə damwa ku si ka hwi ka pəla, “Mjir Kaldiya laga ka bwa makər ku si ka pungkərdzi aka dləkəmauwayeri ni ka təra ka da, ka kurəmta shanga buɗayeri ar nga. Təng I duku an msəra kamnyar kəi sə jikata ala ga.”

¹⁸ Kwabə tsa akuri gari ni, mdə damwa ku si ka hwi ka pəla, “Maɗa' nga shili ka mwanki akwa səm susəmər kucali akwa kəyir ɓzəra olər ɗa,

¹⁹ təkəma təng shambar laga ka duna thlata akwa mtakəu ka huzamta mbwa ni ka kurəmta ɗa shang. Təng I duku an msəra kamnyar kəi sə jikata ala ga.”

²⁰ Sakatə Ayuba nggatə su ngəni, antə tsa mbuta ka kukwahəmta ləptərni kamnyar ɗəffə ɓzəɓza, ka shimta kərari ka ndla ata di, ka nar səli aka Hyel.

²¹ Tsa pəla, “I aɗi səɓəla akwa kuta mama'na ka su wa, antə I aɗi ata mta ka su wa. MTHLAKU andər hamta su aka mda, tsuwa tsu tsa andər dlu surni. Ka mdə hu thləma MTHLAKU!”

²² Akwa shanga su na hara ni, Ayuba aɗi hara biku wa, wala wuta abbər Hyel ku ɓzamtə su wa.