2 Timothli 1 - KAKAƊU NA ƁƊAKKARKARA

Thlawardzi

¹ I na Bulus natə Hyel carɓəla abbər kəi ndzi aposələr Kristi Yesu, ka thlentə ra kəi ra ngkər labar tə Hyel hara ala mburu alkawalari atar hamta jiri akwa Kristi Yesu,

² an akwa rəbutə wasika ngəni ala gə, Timothli, gə na ɓzərna tə I hirhira. Ka Hyel na Tədda, ka Kristi Yesu na Mthlakər mburu, hara ala giri ɓɗakkur, ka tsa kətadzə giri, ka na ala giri msərakur.

Gwaɗita Ka Dunautədzi Ata Kəra Ndzi Ka Jirkur

³ I akwa usar Hyel, natə I akwa kəthlər alari ka hangkali pwipwiyari, apatə kəkayeri arna ku hara, akwa kəlara sakatə I ku ɗangtə nga akwa adduwarna tə I ana hara ka pci ka viri ni.

⁴ Kəlara sakatə I ɗangtə shimwiyir nga, I ana mwaɓər wutə nga, kamnyar kəi ndzi nghyinghyari ka kucali.

⁵ I ana ɗangta abbər gə ka hamta jiri na jirari, jili hamta jiri natə kəkar nga Loyis ka mama' nga Yunis kəgari ni. Kamnyar I ku mbərsa abbər tsu an jili hamta jiri tə gə kəgari ni.

⁶ Kamnyar an su na hara tə I akwa ɗangta ala ga abbər ka gə dunautə cautə ngəni tə Hyel vu dza ga akwa sakatə I pungkər tsi ata kəra gə nda.

⁷ Kamnyar Hyel aɗi hamta ala mburu Mambələr thlivər wa, amma Mambələr duna ka hirkur, ka ar mzhi ngkahə kər mburu.

⁸ Antə ga aɗiya ngga səliyir ngkər ndərər Mthlakər mburu wa, wala ngga səliyirna tə mdə hambwa ra akwa pərsəna kamnyar ni ni wa. Amma wala gə ma kalkal ka gə ɗar bwani apatə I akwa ɗarari kamnyar labar na msəra ni, təng tə Hyel ku na gə dunar harari ni.

⁹ Kamnyar tsa an mbantə mburu, ka kəgaɓəla mburu ka mburu ndzi mjirni na ɓɗakkarkara. Tsuwa kəga ngəni aɗi abbər kamnyar ɓɗakkurər kəthlərayeri tə mburu hara wa, amma kamnyar an su tə tsa ɗəmhə təng ɗəm abbər ka tsa sə hara ala mburu ɓɗakkur atar Kristi Yesu.

¹⁰ Antə kulini tsa ku ncaɓəla shanga suayeri ngəni ata bəbal ala mburu, atar səyir Mdər mbantər mburu Kristi Yesu. Tsa ku ɓələmta dunar mta, ka ncaɓəla ala mburu lakur mwari akwa mpikə na akurkur wa, atar labar ngəni msəra ni.

¹¹ Antə Hyel carɓəla ra kəi ndzi mdər ngkər labar, ka mdərthlentərni, ka maləm ar labar ngəni msəra ni.

¹² An su na hara tə I akwa ɗar bwani azi apatə I akwa ɗarari kulini ni. Amma wala apani I aɗi akwa ngga səli wa, kamnyar I asəndə mdə tə I mbərsa ka tsa ni, tsuwa I ku mbərsa abbər tsa ata ɓəlatə su tə tsa hamta ali ni lapiya abbər kəi kəsi ni, har ka vədza aka vir ndaga.

¹³ Ka gə nu surthlipayeri na kalkal tə I hamta ala gə ni, ka gə thlipta. Ka gə hara ka hamta jiri ka hirkur na ar Kristi Yesu ndzi surharar nga tədəku.

¹⁴ Ka gə ɓəlatə surthlipə ngəni ɓɗaku tə mdə hamta ala ga atar Mambəl na Ɓɗakkarkara, na ka ndzi akwa dza mburu ni.

¹⁵ Gə ka səndari abbər shanga mji na akwa tsəɗi Asiya ku shinadzə bwahili ali, har kəga Figelus, ka Harmogenes.

¹⁶ Ka Mthlaku kətadzə kutakəyir Onesiforus, kamnyar tsa ku dunautə ra akwa sakayeri hang. Tsuwa tsa aɗi ngga səliyirna tə I akwa kəi pərsəna ni wa.

¹⁷ Kamnyar təkəma tə tsa si ahar Rom antə tsa baɗitə pakə ra har tar tə tsa wutə ra.

¹⁸ Ma vir tə Kristi ku ngka, ka Mthlaku kətadzə Onesiforus. Ai wala gə ma ga asəndə laku tə tsa dlar mji akwa ahar Afisa ni