2 Lab 1 - KAKAƊU NA ƁƊAKKARKARA

Solaman Ku Hara Adduwar Bara Ɗəɗukur

¹ Kuthli Solaman na ɓzər Dauda ku wutə duna swaiswai tə shanga kuthlikur ar Israila ku ndzi akwa tsiyari, kamnyar MTHLAKU na Hyelərni ku ndzi ata vəi duku ka tsa, ka hara tə tsa ku wutə olkur ka duna.

² Antə Solaman ku tsaptə shanga mjir Israila ka gari ala ɗa, watau mji na ol'olər sojayeri na dəpu dəpu, ka na aru aru, ka mjir hara shariya, ka shanga mji na ol'ola akwa Israila, kəga mji na ol'olər kutakəyir kəkayeri ar Israila.

³ Antə Solaman ka shanga mji na tsaptədzi adzə ni ni ku mwari akwa vəi vəngkər səli na ata gar ahar Gibeyon ni. Kamnyar Tentər Kəɓa ka Hyel ni anda, tent natə Musa na mafar MTHLAKU namta akwa mtaku ni.

⁴ Amma akwa saka ndaga Dauda ku kurtə kətə Akwati Alkawal ar Hyel na ahar Kiriyath Yeyarim ni ka sənta akwa vəi tə tsa ɗəmhə kamnyar ni, watau akwa tent na zum tə tsa namtə kamnyar ni akwa Urushalima ni.

⁵ Amma bagaɗi ar əmza natə Bezalel na ɓzər Uri, na ɓzər Hur, namtə ni tsu akwa Gibeyon akəma Tentər MTHLAKU. Antə Solaman ka shanga mji na tsaptədzi ni ku bara kəma MTHLAKU.

⁶ Antə Solaman ləmta adzə bagaɗi ar əmza na akəma MTHLAKU akwa Tentər Kəɓa ni, ka hamta saɗaka mbamba dəpu pal ata.

⁷ Tsu vir nda aviri, antə Hyel ncantədzi aka Solaman ka pəla alari, “Yu kəlara su tə ga ata bara kəi na ala ga.”

⁸ Solaman shinau aka Hyel ka pəla, “Ga ku ncantə hirkur na ola na ana palidzi wa aka baba'na Dauda, tsuwa ga ku namtə ra kuthli ata vəyari.

⁹ Antə MTHLAKU na Hyel, nghyaɓəla alkawal natə gə kəta aka babana Dauda ni kulini bu! Kamnyar ga ku namtə ra kuthlir mji na hang apa bərbər tə mda amzhi jikatari wa.

¹⁰ I akwa kiɗa abbər ka gə na ali ɗəɗukur ka səndərsu kamnyar kəi mzhi pwar mji ngəni, kamnyar mda aɗi na ata mzhi hara kuthlikur ata kəra mjir nga na dlama dlama ni wa.”

¹¹ Antə Hyel pəla aka Solaman, “Təng tə an su tə ɗəffa gə mwaɓta, tsuwa ga aɗi kiɗə gəna, wala sur duniya, wala olkur, wala mtər dawar ngə wa, tsuwa ga aɗi kiɗə saɓəlkur fa wa, amma ɗəɗukur ka səndərsu, kamnyar hara kuthlikur ata kəra mjirna natə I vəi nga kuthlir ɗa,

¹² to, I ata hamta ala gə ɗəɗukur ka səndərsu. Tsuwa I ata hamta ala gə gəna, ka su, ka olkur, natə kuthli aɗi na akəma ga na ku ɗar wutari wa, wala aghəla ga na ata wutari wa.”

Gənar Kuthli Solaman

¹³ Antə Solaman ku thlata akwa vəi vəngkər səli na ata kəra gar ni, watau akəma Tentər Kəɓa na ahar Gibeyon ni, ka ngka akwa Urushalima. Antə tsa ku ləkəma ka hara kuthlikur ata kəra shanga Israila.

¹⁴ Antə Solaman tsaptə wagənayeri ar taku dəpu pal ka aru nfwar, ka takwayeri dəpu kumnya suɗa. Antə tsa pwi bwadukwa ɗa akwa kauyayeri laga natə mdə ɗəmhə kamnyar pwi wagənər taku, ka pwi bwaduku adzə ni akwa Urushalima.

¹⁵ Antə kuthli ku namta adzərfa ka dinar hang apa su gapani akwa Urushalima apa pela, ka namtə nfur seda hang apa nfur kwataɓəla na ana ptsa akwa dzər garayeri ar Yahuda.

¹⁶ Tsuwa tsa vu tə mdə ku mwari ahar Masar ka Kuye ka səntə takwayeri, mjir fəli taku ni ana ra mastari ahar Kuye.

¹⁷ Tsuwa da ana mastə kəlara wagənər taku pal ata kəra liyar adzərfa aru ngkwa, ka kəlara taku pal ata kəra liyar adzərfa aru pal ka ntəfkumari. Tsuwa da ana ɗələmta ɗa aka kuthlyayeri ar Hitti ka na ar Siriya.