1Thlassalonika 1 - KAKAƊU NA ƁƊAKKARKARA

Thlawardzi

¹ I na Bulus, ka Sila, ka Timothli an akwa thlentə thlawardzi ngəni ala giri na mjir ikələziya na ahar Thlassalonika, ala giri na ikələziyar Hyel na Tədda ka Mthlaku Yesu Kristi. Ka Hyel hara ala giri ɓɗakkur ka tsa na giri msərakur.

Hamta Jirər Mjir Thlassalonika Ka Laku Tə Da Akwa

² Tədəku yeru ana usar Hyel kamnyar shanga giri, parang yeru akwa kamnya giri akwa adduwar yeru.

³ Yeru akwa ɗangtə kəthlərər hamta jirər giri akəma Hyelər mburu ka Təddar mburu, ka laku tə giri akwa ghər tə giri akwa harari kamnyar hirkur, ka jili vəkər na ka duna tə giri kəgari akwa Mthlaku mburu Yesu Kristi.

⁴ Kamnyar yeru ku sənda, maɗaməma, abbər Hyel ku hir giri, ka carɓəla giri ka giri ndzi mjirni.

⁵ Kamnyar labar na msəra tə yeru sənta ala giri ni, yeru aɗi səntə ni akwa ndər daci wa, amma ka kuthlikur, ka Mambəl na Ɓɗakkarkara, tsuwa ka hamta jiri na nghyinghyari. Tsuwa giri asənda abbər yeru ku damitədzi kamnyar giri atar laku tə yeru ndzəndzi akwa nca giri sakanda ni.

⁶ Antə giri ku thliptə yeru ka Mthlaku tsuwa, kamnyar giri ku dlu ndər ni ka kucali akəla Mambəl na Ɓɗakkarkara, wala tə giri ku ɗar bwani ka duna ata kəra ndər ni.

⁷ Antə apani giri ku ndzi surthlipa aka shanga mjir nuwa na ahar Makidoniya ka Akaya.

⁸ Kamnyar aɗi abbər ndərər Mthlaku tə giri ngkər ni ndlətə shanga Makidoniya ka Akaya daci wa, amma labar ar hamta jirər giri akwa Hyel ni ku mwari akwa kəlara bwa, aɗi tar ma yeru pəla ma wa.

⁹ Kamnyar shanga mji na anda akwa ngkər laku tə giri ku dlu yeru sakatə yeru mwari adzə giri ni, ka apatə giri ku pumta haptayeri, ka ngka adzə Hyel, kamnyar ka giri vəngkər səli aka Hyel na jirari na ka mpikə ni.

¹⁰ Tsuwa da ka kəra ɗa an akwa ngkər laku tə giri akwa sək səyir Ɓzərni na ata thlata amtazi ni, Ɓzərni tə tsa thlenta akwa mtəmtə ni, tsa na Yesu na msərantə mburu ta ɗəffə bwarbwarkurər Hyel na akwa si ni.