Zudə 1 - Kawvun mə Mbrew kə Nyeme

Ta' zə tu kə kaw jeɓe

¹ Na Zudə, bə sin Zezu Kris, na njər Zakə, na wây' ɗerwa məni nə hay' sôwâ məni Ifray ɗe nday, sôwâ məni Ifray Bəba bə nday, məni Zezu Kris wə nday ji.

² Na wə wa' i Ifray nə ne we ca um, kə heɓ um, ɓay bə um ne ni ɓayrumu.

Sum ta' kwa mə hay dana

³ Bây man kwa, na ke keɓ vari kə ɓayrum kədan na wây' ɗerwa wa dan siɗ məni namba ɓa wə han nə hay' ri, ama kəri rum, dan məsin gi nan kədan na wây' ɗerwa məni nə hay' ri kədan na jeŋ vunduk mi ne kədan hi zi zə kwa məni Ifray ne kə sôwâ um daŋ' sem ɗaw də hâ.

⁴ Zə sôwâ məni cu ne wəlok Ifray mi məni, cok mbə du mba 'yeŋ, handay wə faŋwa dan mə ɓay Ifray mba kədan handay gi sin mə kə zur məni handay wə gi dan zur nə faŋ ce' ndə sin mə njeŋ, ɓay handay wə vaɗ Zezu Kris Jwə mba mə ɗaw kə Bârî mba. Daka ɓa' si, Ɗerwa Ifray in dan wa dan məni wə də nday kawa.

⁵ Hi we dan məni nə si daŋ'ŋ. Ama kə ndi nə daŋ', na wə wa' i i dla' wa dan vari məni Bârî mba siɗ sôwâ Israyel mbə nya Egip, ama kəki rum, mum ci sôwâ məni cu ve dan um mi.

⁶ I dla' wa dan sum sin Ifray mə wafray məni cu tuk kəɗam kə gbəgboŋ məni Ifray ne nday nə mi, ama handay ar ri suk nday, Ifray gay' nday wə ri mə ura' zə nya kə cururu hâ Bəka mə mbri məni mum wə də ɓok dan wa nday nə də mba.

⁷ I dla' wa dan so Sodomə kə so Gomorə ɓay so məni gay' gan wa ndaya. Sôwâ so rum gi ce' ndə sum sin Ifray mə wafray kuni, handay ar tu nday gi kwa mə ghəghay, ɓay handay cu bar kə nji kə vari məni sôwâ wə bar kə nji mi, handay wə ce boni wə du ku mə də hâ, ɓay kwa məni wə gi wa nday nə faŋ kwa mə har sôwâ daŋ'ŋ.

⁸ Sôwâ məni kuni wə gi ndəna' ta', məsin nday wə nday ɓu gi kwa mə bro' wə tu ndaya. Handay wə jeɗ gbəgboŋ Ifray, ɓay handay wə i sôwâ mə kə mbra' mə wafraya.

⁹ Ko toŋ sum sin Ifray mə wafray mə ɗe kə Misel cu gi ndəna' kəri məni mum dle vun kə Satan wa mar Moyizə mi, mum cu tum sem Satan ko i num mi, ama mum la' ne numu: «Bârî nə gi boni ne nu sara!»

¹⁰ Ama sôwâ məni kuni wə i kwa məni handay cu mun zu rum mi, ɓay kwa məni handay wə we kə kpak məni handay vra' kə ndi ce' ndə kwa gop, kwa rum wə nday gi vi'i.

¹¹ Kəcik zə nday, handay tle vari məni Kayin tle. Zə handay wə səna' səlay, handay ar tu nday wə du dan mə bro' ce' ndə Balam, handay vi' zə handay car wa kə Ifray ce' ndə Kore.

¹² Kəri məni handay wə ɓa kə ri wə ri ti kwati, ɓay wə gi kwa mə kə zur dan zur, kwa rum wə gi zur mi ne. Handay ce' ndə dləmbur buŋô məni simbeɗ wə sa' dle kə ndi dan buŋô se. Handay ce' ndə gu məni cu vra' mi, ko kəri məni ri vra' rum kəta', handay ce' ndə gu məni sôwâ par kə tlor rum, ɓay co' si.

¹³ Kəri məni handay wə gi sin mə kə zur dan zur, handay ce' ndə mbi məni wə jo səta kə kukup dukduku. Handay ce' ndə ciciw məni vi' vari, ɓay Ifray gila' ri zə nday wə ri mə ura' tindiŋndiŋi.

¹⁴ Enok, buwa seɗa' daw rawti Adam, mum ka' dan wa nday kə dan məni na: «I mun ri'i! Bârî wə də mbə kə sum sin um mə kəleŋ raw dle tu si,

¹⁵ kədan mum ɓok dan wa sôwâ daŋ' məni handay gi kəri məni handay car wa kə rum, ɓay kə ta' dan mə bro' daŋ' məni handay ge wa rumu.»

¹⁶ Sôwâ məni kuni cu tuk kəɗam kpe mi, ɓay handay wə ci' tu bəka daŋ'ŋ. Handay wə ta zə kwa səna' tu nday mə bro', handay wə ge dan mə mbra' tu nday, ɓay handay wə ge dan mə kəɗam tu sôwâ məsin kədan handay fe kwa ɓa nday kə ndi.

Har kwa kə dlay cem ceme

¹⁷ Ama mə hi, bây man kwa, i dla' wa dan məni sum sin Bârî mba Zezu Kris ka' ne ni ɓa' si.

¹⁸ Handay in dan məni nə ne ni: «Wə du bəka ndo' nya, sôwâ məni wə mi mây, ɓay wə ta zə kwa səna' tu nday mə bro' wə də mba.»

¹⁹ Handay kə məni wə mbə kə dan məni wə gi sôwâ ɓul nji, handay wə ta zə kpak tu nday, handay cu kə Simbeɗ mə Kəleŋ vunduk nday mi.

²⁰ Ama mə hi, bây man kwa, zə hi ve Kris, i də kofo wə du dan rumu. I in dan kə Ifray kə gbəgboŋ məni Simbeɗ mə Kəleŋ wə mi ne,

²¹ ɓay i gay' ŋgəɗiŋ' wə du bə Ifray kəri məni hi wə ji ri məni Bârî mba Zezu Kris, wə du ɓay um, də mi ne nyî mə də hâ.

²² I we ca wa sôwâ məni kə vunduk mə hoɓ hoɓo.

²³ I siɗ nday kə ra' nday mbə du ku. Kə bə i we ca wa sôwâ məni wə ta zə kwa səna' tu nday mə bro' ta', ama kəri rum, i sî kwa mə bro' məni handay wə gi.

Ndo' vun bur Ifraya

²⁴ I gi mbra', semɗe, gbəgboŋ, ɓay toŋ ne kə Bârî mba Ifray məni gak mi ji kədan hi njay də du kwa mə bro' mi, ɓay də mi gi car kor rum dan dan mə bro',

²⁵ ɓay namba gi mbra' ne kə Ifray mə kə gbəgboŋ, kə vunduk məni nyen peɗ kə kəɗam zə Bə Siɗ mba Zezu Kris, daka təŋ zu nya, mgbaŋ ni nə, ɓay hâ də hâ. Amen.