Markə 15 - Kawvun mə Mbrew kə Nyeme

Zezu kor Pilatə

¹ Kə bəka ceɗ, sum rôwâ mə du sum po' fur ɓa nji kə sum rôwâ mə du sôwâ Zuwif, kə sum pay zu dan dlay, ɓay sum rôwâ Fada mə Mbri daŋ' kədan handay kar kwa məni handay də gi kə Zezu. Handay baŋ Zezu ɓay ta ar num ne kə toŋ nya Zude mə ɗe kə Pilatə.

² Pilatə ci vun Zezu: «Ha nə jwə sôwâ Zuwif su?» Zezu ɗam vun rumu: «Ha kə məni wə ini.»

³ Sum rôwâ mə du sum po' fur mbə tum sem Zezu kə dan cem ceme.

⁴ Pilatə ci vun rum kəreme: «Ha cu ɗam dan mi su? Ha cu mun məni handay wə tum sem ru kə dan cem cem nə mi su?»

⁵ Ama Zezu cu ɗam dan vun Pilatə za' mi. Dan rum jin' wa ne kə Pilatə.

Sôwâ ɓok dan mar wa Zezu

⁶ Kə cer Pakə daŋ', Pilatə wə ar daŋgay' məni sôwâ ci vun rum kə ndi ɗaw nday ne.

⁷ Kəri rum, swə mə ɗe kə Barabas wə so daŋgay' kə sôwâ məni wə car dan, zə handay ci swə məsin kəri məni handay wə car dana.

⁸ Raw sôwâ ɓa mbə so Pilatə, ɓay handay təŋ kə um la' ne i nə gi kwa məni mum wə gi ɓa' kə cer nə zə ndaya.

⁹ Pilatə ɗam ci vun ndaya: «Hi wa' i a ar jwə sôwâ Zuwif ne ni su?»

¹⁰ Zə mum we si njeŋ sum rôwâ mə du sum po' fur ar Zezu ta ɓa rum zə handay kə sây' kə rumu.

¹¹ Ama sum rôwâ mə du sum po' fur ɓu zu raw sôwâ kədan handay ci vun Pilatə kədan mum ar Barabas nday ne zawa.

¹² Pilatə ci vun raw sôwâ kəreme: «Hi wa' i a gi mi kə swə məni hi um ɗe kə jwə sôwâ Zuwif nə su?»

¹³ Handay faŋ ɗam vun rum kə do dana: «Gay' num də wa gu!»

¹⁴ Pilatə faŋ ci vun nday kəreme: «Mum gi kwa mə bro' mi su?» Ama handay do dan kə gbəgboŋ pâ mə vun kofo: «Gay' num də wa gu gay'i!»

¹⁵ Pilatə wa' gi kwa mə kəɗam tu raw sôwâ, ɓay mum ar Barabas ne nday, ɓay kəki məni handay pe Zezu kə ləva, mum ar num ta ɓa soje kədan handay um gay' də wa gu.

Soje kuni ru Zezu

¹⁶ Soje kuni mbə kə Zezu du cava toŋ nya Zude, ɓay handay faŋ ɗe kam kul soje mə raw daŋ'ŋ.

¹⁷ Handay ge mbraw mə mbri mə tlew ne numu. Handay ci pəlay wa kə ŋây' ɓay no' ta ne num wa.

¹⁸ Handay faŋ təŋ kə kaw jeɓ rum kə ini: «Heɓ ke kə ru, jwə sôwâ Zuwif!»

¹⁹ Handay pum wa ne num kə dliw, ɓay handay tup mê' ta wa rum, ɓay handay faŋ kuduk nya kə vun cingit kor rum kədan handay um buru.

²⁰ Kəri məni handay ndo' vun um ru si, handay kərut mbraw mə tlew nə mbə tu rum ɓay faŋ ge mbraw mə mum ne numu. Kəki rum, handay pâ ta rəka kə rum kədan handay um gay' də wa gu gay'i.

Sôwâ gay' Zezu ta wa gu gay'i

²¹ Swə nya Siren mə ɗe kə Simoŋ car sine mbə pâ wə han, mum nə ba Alezaŋdrə kə Rufus. Soje kuni kaw num kə bak tle gu gay' Zezu.

²² Handay 'ya kə Zezu ta wə ri mə ɗe kə Golgata, məni wa' dan in kə vun mba: «Ri so wa».

²³ Handay ne num mbi vra' gu mə ɗe kə «viŋə» məni tlum kə mbir gu mə ɗe kə «mirə», ama Zezu cu ve mi.

²⁴ Kəki rum, handay gay' num ta wa gu, handay faŋ ɓul mbraw um mbok nday kə pum parwa kədan handay kar sa də fe mbraw mə ka kə ndi su na.

²⁵ Handay gay' num ta wa gu kə fəta bəka.

²⁶ Handay wây' dan mə bro' məni handay ɓok wa rum mə ni na: «Jwə sôwâ Zuwif» wa kwa wây' kwa.

²⁷ Handay gay' hura hoɓ wa gu hay' rum, ɗaw ɓa fun, ɓay məsin ɓa guru. [

²⁸ Kwa məni nə mbə gi kədan nyen mbi dan məni Ɗerwa Ifray ini: «Handay in num wə du sum gi kwa mə bro'o.»]

²⁹ Sôwâ məni wə pâ han tumwa ɓay um i kə ini: «Ahâ! Ha swə məni in i ha də bru so po' fur sôwâ Zuwif ɓay ɗam məsin du bəka hinji',

³⁰ a siɗ tu ru kə dam mbə wa gu nə ye!»

³¹ Ndəna' ta' sum rôwâ mə du sum po' fur kə sum pay zu dan dlay ru kuni Zezu, ɓay in dan kə nji mbok nji: «Mum siɗ sôwâ məsin si, ama mum cu gak siɗ tu rum mi.

³² Namba la' we Kris, jwə sôwâ Israyel, dam mbə wa gu mgbaŋ ni nə si, namba də um ve!» Hura hoɓ məni sôwâ gay' nday hay' Zezu i num ta'a.

Mat Zezu

³³ Kə fəta du wa, ri mə ura' mbə kəmbo' nya daŋ' hâ fəta riya.

³⁴ Kə fəta riya, Zezu ka' dan kə gbəgboŋo: «Eloy, Eloy, lema sabaktani?» Məni wa' dan ini: «Ifray man, Ifray man, zə mi ha ar nan su?»

³⁵ Sôwâ məsin du sôwâ məni gay' wə han mun dan rum ɓay ini: «I mun ri'i! Mum wə ɗe Eliya.»

³⁶ Swə ɗaw du nday ne ta tle kwa məni ra' nji kə soso ɓay no' ta wə mbi kwa cumok, mum jew ta vun dliw ɓay sa ne kə Zezu kədan mum soɓo. Swə nə ini: «I ar 'yeŋ ri', namba də kar ke məsin Eliya də mbə kədan mum um tle mbə wa gu nə su na.»

³⁷ Ama Zezu ka' dan kə gbəgboŋ, ɓay mum mara.

³⁸ Zim məni hay tak i so po' fur sôwâ Zuwif ŋgâr du hoɓ daka fray hâ nya.

³⁹ Toŋ kul soje mə nya Romə məni car kor Zezu we num mar ndəna', ɓay mum ini: «Swə məni nə Vay Ifray kəzini!»

⁴⁰ Rawkwa məni gay' kə hay' ca' wə kar ri də han ɓay wə du nday: Mari mə so Magdala, kə Salome, ɓay Mari mə ya Zakə mə nyêw kə Zoze.

⁴¹ Handay ke ta zə Zezu kə gi sin zə rum kə ri məni mum ke wə nya Galile. Rawkwa məsin juk məni mbə kə rum wə so Jeruzalem gay' wə han ta'a.

Zozef mo' Zezu

⁴² Riya gi si ɓay fəta rum, fəta gila' tu zə fəta pemây sôwâ Zuwif məni wə də mbə siw rumu.

⁴³ Zozef mə so Arimate mbə day, mum nə swə mə kə mbra' mə du sum rôwâ Fada mə Mbri, ɓay mum swə məni wə ji ri məni Ifray wə də suk jwə wa sôwâ um ta'a. Mum jeŋ vunduk ŋgəɗiŋ' ɓay ta so Pilatə kədan mum o mar Zezu ɓa rumu.

⁴⁴ Ama kəri məni Pilatə mun i Zezu mar si, dan rum jin' wa ne numu. Mum faŋ ɗe toŋ kul soje ɓay ci vun rum i Zezu mar suk si su?

⁴⁵ Kəki məni toŋ kul soje nə ɗam vun rum, Pilatə ne vari kə Zozef kədan nə tle mar Zezu.

⁴⁶ Zozef faŋ coɓ zim siliki mə ɓu ɓay mum ulay' mar Zezu mbə wa gu, ku' kə zim na. Mum no' num ta zra məni handay dla wə pra ɓay kəki rum mum ɓuru gway' mə toŋ ta' vun zra rum kə ndi.

⁴⁷ Mari mə so Magdala kə Mari mə ya Zoze kar ri məni handay no' num hana.