Markə 1 - Kawvun mə Mbrew kə Nyeme

Dan ka' Zaŋ-Baptistə

¹ Dan mə Kəɗam məni in dan wa Zezu Kris, Vay Ifray, nə təŋ ndəni na'a:

² Ce' ndə məni bə ka' dan mə ɗe kə Esaya wây' wə du ɗerwa umu: «A kar ri'i! Na sin vay sin man kofo ru kədan mum gila' vari zə ru.

³ Wor wə ka' dan du igopo: I gila' vari zə Bârî. I gi vari rum səreŋ ne numu!»

⁴ Ndəna', Zaŋ-Baptistə mbə du igop, mum wə ka' dan ne kə sôwâ: «I faŋ vunduk ri, ɓay i ve baptem kədan Ifray də vrum kwa mə bro' mi.»

⁵ Sôwâ məni gay' wə nya Zude kə sôwâ so Jeruzalem daŋ' mbə kuni hay' rumu. Handay in dan kwa mə bro' nday, ɓay Zaŋ gi baptem ne nday wə ze Zurdeŋ.

⁶ Zaŋ ge mbraw mə mbri mə ci kə sâ njoŋnjoŋ ɓay mum ɓok fir kə zew ɗike, mum ti cumo' kə mur ɗimi.

⁷ Wə du dan ka' um, mum ini: «Swə məni wə də mbə kəki rin pâ nan kə mbra' si, na cu nde i goɓ kədan na ulay' zew tərak um mi.

⁸ Na gi baptem ne ni kə mbi, ama mum də gi baptem mi ne kə Simbeɗ mə Kəleŋe.»

Zaŋ gi baptem ne kə Zezu

⁹ Kəri rum, Zezu car mbə so Nazaret, wə nya Galile, ɓay Zaŋ gi baptem ne num wə ze Zurdeŋ.

¹⁰ Kəri məni Zezu pâ mbə wə mbi, kəri rum sar, mum we wafray ar vun ɓay Simbeɗ Ifray dam mbə wa rum ce' ndə kuruku.

¹¹ Ɓay mum mun wor car mbə wafray ini: «Ha Vay man məni na bə, na tuk kəɗam kə ru.»

Satan ɓu Zezu

¹² Kəkor sar, Simbeɗ mə Kəleŋ pla' num ta du gopo.

¹³ Mum suk du gop bəka gufəɗi', ɓay Satan mbə ɓu num wə hana. Zezu suk du tlew gop, ɓay sum sin Ifray mə wafray mbə gi sin zə rumu.

Zezu ɗe sum lam mbi fəɗi'i

¹⁴ Kəki məni soje kaw Zaŋ ge ta so daŋgay', Zezu 'ya ta nya Galile kə ka' Dan mə Kəɗam məni car mbə hay' Ifraya.

¹⁵ Mum ini: «Ri rum mbə si, ri məni Ifray wə də suk jwə wa ri nə həre'e! I faŋ vunduk ri ɓay i ve Dan mə Kəɗama!»

¹⁶ Kəri məni Zezu wə ta vun ya mbi Galile, mum we Simoŋ kə njər rum Andre. Handay wə ɗâ ziw də mbi, zə handay sum lam mbi.

¹⁷ Zezu la' ne ndaya: «I mbə ta zə rin, ɓay na də mi gi faŋ sum keɓ sumra'a.»

¹⁸ Kəkor sar, handay ar ziw nday njay ɓay ta zə Zezu.

¹⁹ Mum ta ta kofo kî, ɓay mum we Zakə, vay Zebede, kə njər rum Zaŋ. Handay gay' wə rawti da nday, ɓay handay wə gila' ziw ndaya.

²⁰ Kəkor sar, Zezu ɗe ndaya. Handay ar ba nday, Zebede, wə rawti da kə sum sin um ɓay ta zə Zezu.

Swə mə kə gam wa

²¹ Zezu kə sum ta zə rum ta day kuni so Kapernawum. Kəri məni fəta pemây sôwâ Zuwif mbə day, Zezu ze ta rawti so Ifray sôwâ Zuwif ɓay təŋ kə ta' kwa wə hana.

²² Vari kwata' um jin' wa ne kə sôwâ məni mun dan rum, zə mum cu ta' kwa ce' ndə məni sum pay zu dan dlay wə ta' kwa nə mi, ama mum wə ta' kwa nday ne kə gbəgboŋo.

²³ Kəri rum, swə məsin kə gam wa rum mbə wə rawti so Ifray sôwâ Zuwif. Mum ka' dana:

²⁴ «Ha wa' mi hay' mba su, Zezu mə so Nazaret? Ha mbə kədan ha mba 'way su? Na we nu si: Ha Vay Sin mə Kəleŋ məni Ifray sini!»

²⁵ Zezu dlay gam nə kə gbəgboŋo: «A seŋ vun ɓay a pâ mbə wa swə nə si!»

²⁶ Gam tle swə nə kə gbəgboŋ ɓay pâ mbə wa rum kə ka' dana.

²⁷ Kwa rum jin' wa ne kə sôwâ daŋ' məni gay' wə han, ɓay handay təŋ kə ci vun nji mbok nji: «Kwa mi mə ni nə su? Mə ni nə vari kwata' mə mbrew na! Mum wə dlay gam kə gbəgboŋ, ɓay handay wə mun vun rumu!»

²⁸ Zə rum, semɗe Zezu ci' ndap nya Galile daŋ' ga'ri.

Zezu car sum gaɓ juku

²⁹ Kəri rum, handay wur mbə rawti so Ifray sôwâ Zuwif, ɓay Zezu kə Zakə ɓay Zaŋ 'ya kuni ta so Simoŋ kə Andre.

³⁰ Inja Simoŋ bar wə la' kə gaɓ wa. Kəri məni Zezu mbə day, handay in dan gaɓ sə ne numu.

³¹ Mun 'ya dle ta hay' sa. Mum kaw sə ɓay tle sə car fraya. Gaɓ wa nə so' sə ɓay ta təŋ kə gi sin zə ndaya.

³² Kə ɓel, kəki fəta no' wa si, sôwâ ra' sum gaɓ kə sôwâ məni kə gam wa nday mbə hay' Zezu kə ndaya.

³³ Sôwâ so rum daŋ' mbə ɓawa vun vari so məni Zezu wə hana.

³⁴ Mum car sôwâ juk məni wə ta' ca kə gaɓ cem cem, ɓay mum 'way gam juk wa sôwâ ta'a. Ama mum cu ne vari ne kə gam kədan kuni ge dan mi, zə handay we num si.

Zezu wə gaŋ nya Galile

³⁵ Kə vun bəka, ka ri ura' ɓo, Zezu car pâ mbə so rumu. Mum 'ya ta rəka wə ri mə cukuɗ kədan mum in dan kə Ifray wə hana.

³⁶ Simoŋ kə sôwâ məni wə hay' rum 'ya kuni kə keɓ tan umu.

³⁷ Kəri məni handay za' num, handay la' ne numu: «Sôwâ daŋ' wə wû keɓe.»

³⁸ Ama Zezu ɗam vun ndaya: «Mə də so məsin kədan a də ka' dan wə han ta', zə na mbə zə rumu.»

³⁹ Ndəna', mum ta gaŋ wə nya Galile daŋ'ŋ. Mum ka' dan wə rawti so Ifray sôwâ Zuwif, ɓay mum 'way gam wa sôwâ ta'a.

Zezu gi mgbo' faŋ kəleŋe

⁴⁰ Mgbo' ɗaw mbə hay' Zezu. Mum kuduk nya kor rum ɓay o num kə ini: «Ha la' bə si, ha gak man gi faŋ fele.»

⁴¹ Zezu we ca wa rumu. Mum sa ɓa, ɗak num kə ndi ɓay la' ne numu: «Na bə si, a faŋ həraŋ ye!»

⁴² Kəkor sar, mgbo' 'ya mbə tu rum, ɓay mum faŋ həraŋa.

⁴³ Zezu dlay num kə gbəgboŋ ɓay ar vari ne num kəkor sara.

⁴⁴ Zezu la' ne numu: «A mun ri'i! A in dan rum ne kə swə ɗaw mi. Ama a də ta' tu ru ne kə bə po' fur, ɓay kəki rum, a də po' fur ce' ndə məni Moyizə ne vari rum, kədan a ta' ne kə sôwâ daŋ' i ha faŋ fel si.»

⁴⁵ Ama swə nə 'ya dle kə pla' dan rum ne kə sôwâ daŋ' məni ndewa kə rumu. Zə dan rum, Zezu cu gak ta' tu rum wə mbok so za' mi, ama mum suk rəka wə ri mə cukuɗ, ɓay sôwâ car wə ri cem cem mbə hay' rumu.