Kwawe 1 - Kawvun mə Mbrew kə Nyeme

Ze dan rumu

¹ Kwata' Zezu Kris məni mum ta' ne kə Zaŋ: Ifray ta' kwa məni wə də mbə ne kə Kris kədan mum ta' ne kə sum sin umu. Kris sin bə sin um mə wafray mbə hay' bə sin um mə ɗe kə Zaŋ kədan mum ta' kwa rum um ne.

² Zaŋ in dan wa kwa daŋ' məni mum we. Mum wây' dan məni car mbə hay' Ifray kə dan mə kəzin' məni Zezu Kris ta' ne num wə du ɗerwa məni na.

³ Kəɗam zə swə məni wə in ɗerwa məni nə, zə sôwâ məni wə mun dan ka' məni nə, ɓay wə ta zə dan rum, zə ri məni kwa rum daŋ' wə də gi nə həre'e.

Zaŋ kaw jeɓ kul sôwâ Kris seɗa' mə nya Azi

⁴ Na Zaŋ, na wây' ɗerwa məni nə hay' kul sôwâ Kris seɗa' mə nya Azi: Na wə wa' i ɓay kə heɓ Ifray məni kəta' tam, məni kəta' ɓa', ɓay məni wə də mbə, kə simbeɗ seɗa' məni kəta' kor kwasuk jwə um,

⁵ ɓay Zezu Kris, bə in njeŋ dan mə njeŋ, vay mə mbri məni car mbə mar cop ɓay ar num suk toŋ wa sum jwə mə wa nya, kuni ne ɓay kə heɓ ne ni. Mum wə mba bə, ɓay mum ne vəswə tu rum kədan mum mba siɗ mbə du kwa mə bro' mba,

⁶ ɓay mum gi mba faŋ won um ɓay sum po' fur kədan namba gi sin zə Ba um Ifray, mbra' kə gbəgboŋ kuni ke kə Zezu Kris hâ də hâ! Amen.

⁷ I kar ri', mum wə mbə du dləmbur, sôwâ daŋ' də um we, ko sôwâ məni kap num, sôwâ nya daŋ' də way' ɓa zə rum, awo, kwa rum də ke ndəna'a! Amen.

⁸ Bârî mba Ifray mə kə gbəgboŋ daŋ', məni kəta' tam, məni kəta' ɓa', ɓay məni wə də mbə nə ini: Na nə Alfa ɓay Omega.

Simbeɗ Ifray ta' Kris ne kə Zaŋ

⁹ Na Zaŋ, vay ba mi wə du ɓa mba kə Zezu, na wə ɓa kə ri wə du boni, wə Jwə Ifray, ɓay kə cin vunduk wa Zezu. Sôwâ kaw nan cin wə ɗol mə du mbi mə ɗe kə Patmos, zə na ka' dan Ifray ɓay dan mə kəzin' məni Zezu ta' ne nana.

¹⁰ Kə Bəka Bârî, Simbeɗ mə Kəleŋ mbə wa rin, ɓay na mun wor kə gbəgboŋ kəki rin məni ci' ce' ndə duɓu.

¹¹ Wor rum ini: A wây' kwa məni ha we nə də du ɗerwa, ɓay a sin ɗerwa rum də hay' kul sôwâ Kris seɗa' məni kuni: Efezə, Smirnə, Pergamə, Tiyatir, Sardes, Filadelfi, ɓay Lawdise.

¹² Na faŋ i kədan na kar swə məni wə in dan man ne, kəri rum, na we baŋgay seɗa' məni ri kə njike mə bondo.

¹³ Ɓay kwa ra' nji kə sumra' car wə du ndaya. Mum ge mbraw mə mbri məni jərak hâ njay ki sem, ɓay mum baŋ vunduk rum kə zew baŋ tu məni gi kə njike mə bondo.

¹⁴ Sâ wa rum mə ɓu ce' ndə sâ cime mə ɓu ko fut mbraw, ɓay i rum wə ɗeri ce' ndə ku.

¹⁵ Sem rum wə wəɗi ce' ndə njike mə tlew məni sôwâ hâ kə ku ɓay faŋ kolko', wor um wə ci' ce' ndə tlər mbi mə mbri məni wə ne rawti ze.

¹⁶ Mum kaw ciciw seɗa' wə ɓa fun um, ɓay masəlam mə kə se' hoɓ məni tise' juk pâ mbə vun rum, vuk rum wə wəɗi ce' ndə fəta məni car du wa.

¹⁷ Kəri məni na we num, na nde ta nya hay' sem rum ce' ndə mar, mum cin ɓa fun rum wa rin, ɓay ini: A ne wəlok mi, na swə mə vun kofo, ɓay na swə mə kəki,

¹⁸ na swə məni kə i. Na ke mar, ama mgbaŋ ni nə, na kə i də hâ, na kə kwa ar vun vari so mar ɓay ri məni sôwâ məni mar gay' wə hana.

¹⁹ Zə rum, a wây' kwa məni ha we, kə kwa məni wə gi mgbaŋ ni nə, ɓay kwa məni wə də mba.

²⁰ Pay zu dan məni pe' wa ciciw seɗa' məni ha we wə ɓa fun rin kə baŋgay seɗa' məni ri kə njike mə bondo nə ni na: Ciciw mə seɗa' wə ta' sum sin Ifray mə wafray məni wə ji kul sôwâ Kris mə seɗa', ɓay baŋgay mə seɗa' wə ta' kul sôwâ Kris mə seɗa'a.