Hebre 1 - Kawvun mə Mbrew kə Nyeme

Ifray in dan ne mba kə Vay umu

¹ Ɓa' si, Ifray in dan ne kə ba mbri ramba kə vun sum ka' dan um sem raw kə vari cem cem,

² ama wə du bəka mə tam məni kuni, mum in dan ne mba kə vun Vay um məni mum gi kwa daŋ' kə rum, ɓay mum par num kədan mum ke bə za' kwa rum daŋ'ŋ.

³ Mum wə ta' mbra' Ifray də rəka takram, mum nə foto Ifray rek rek, ɓay mum wə ji kwa daŋ' kə gbəgboŋ dan vun rumu. Kəki məni mum kol kwa mə bro' məni wə vunduk sôwâ ta rəka, mum faŋ ta suk wafray ɓa fun Ifray mə kə gbəgboŋ daŋ'ŋ.

Vay kə mbra' pâ sum sin Ifray mə wafray si

⁴ Vay nə faŋ swə mə kə mbra' pâ sum sin Ifray mə wafray, ɓay Ifray ne sem mə kə mbra' ne num pâ semɗe mə handay si.

⁵ Zə Ifray cu in ne kə vay sin mə wafray ko ɗaw wə du sum sin um mə wafraya: «Ha nə Vay man, tam na faŋ Ba wû» si mi. Ɓay mum cu in dan wa vay sin mə wafray ko ɗaw wə du sum sin um mə wafraya: «Na də faŋ Ba um, ɓay mum də faŋ Vay man» na mi.

⁶ Ama kəri məni Ifray wə də sin Vay mə mbri um mbə wa nya kərem, mum ini: «Daw sin Ifray mə wafray daŋ' də um mbra'a.»

⁷ Dan məni Ifray in wa sum sin um mə wafray nə ni na: «Ifray gi sum sin um mə wafray faŋ simbeɗ, ɓay mum gi sum sin um faŋ se'le ku.»

⁸ Ama dan məni mum in wa vay nə ni na: Ri suk jwə wû, Ifray zə də hâ, dliw ti jwə wû nə dliw mə njeŋe: Ha wə suk jwə kə vari mə njeŋe.

⁹ Ha wə wa' njeŋ, ama ha wə sî dan mə bro', zə rum, Ifray, Ifray wû, par nu, ɓay wu' mur ne nu wa, zə rum, ha wə tuk kəɗam zə mum ne ri mə kə mbra' ne nu pâ məni mum ne kə sôwâ mə kə ru kuni si.

¹⁰ Mum faŋ in kəreme: «Ha Bârî, ha kə məni gi nya daka təŋ zu rum, ɓay ha kə məni gi wafray kə ɓa ru.

¹¹ Handay daŋ' də ndo' cet, ama mə ha, ha də ke də hâ. Handay daŋ' də kəmbar ce' ndə mbrawa.

¹² ɓay ha də nday ɗəlak ce' ndə mbraw mə mbri, ɓay handay də samwa ce' ndə sôwâ wə samwa mbrawa. Ama mə ha, ha cu samwa mi ɓay ha cu də kəsa' kpe mi.»

¹³ Ifray cu in ne kə vay sin mə wafray ko ɗaw wə du sum sin um mə wafraya: «A suk ti, ɓa fun rin, hâ na njay sum sî ru də nya zə sem ru ce' ndə kwa njay sem» mi.

¹⁴ La' ndəna' si, sum sin Ifray mə wafray kuni sa su? Handay simbeɗ məni wə gi sin Ifray, ɓay Ifray sin nday kədan handay kawɓa sôwâ məni wə də fe siɗ ce' ndə bayɗa.