ᒍᐟ 1 - Kanāci Kihci Masinahikan

¹ cotas, o atoskēyākāna cisas Christ mina ociwāma cēmis, ē masinahamawakik aniki kā natomihcik, sākihākanak kisēmanitohk wēyotāwihk, mina kā kanawēyitamāht cisas Christ;

² kisēwātotākowin mina pēyatakēyimowin mina sākihiwēwin ki ka wi yakitwākawināwāw.

³ siyākihitakok, ē mēkwa ākamēyimoyān kita masinahamātakok oma māmawi ki pimācihowininaw ohci, ni ki sīkiskākowisin kita masinahamātakok ē ayākwāmimitakok kita ākami notinikēstamēk anima tāpwēyēyitamowin pēyakwāw māmawi kā ki pakitinamāhcik okanātisiwak.

⁴ cikēmā ihtāwak ātiht ayisiyiniwak kimoc ē ki pihtokētācimocik, aniki oti kayās ohci kā ki itasowātihcik oma nānipomiwēwin, ēkā ē manitowātisicik ayisiyiniwak, kiskwēyātisiwinihk ē isi kwēskinahkik o kisēwātisiwiniyiw ki kisēmanitominawa, mina ē ānwētawācik kā pēyakoyit kokimāminawa mina kā tipēyimikoyahk cisas Christ.

⁵ ēkwa māka ki wi miskawāsomitināwāw, ātawiya ē kiskēyitamēk kahkiyaw kēkway pēyakwāw māmawi tānisi isi kā tipēyihcikēt, ē ki pimācihāt ayisiyiniwa icipt askihk ohci, mwēstas iyikohk kā ki nisiwanācihāt anihi ēkā kā tāpwētamiyit.

⁶ mina okisikowak ēkā kā ki kanawēyihtahkik wiyawāw o kihcāyiwiniwāw, māka kā ki nakatahkik ita kwayask ē ot itāwinicik, ki kanawēyimēw kākikē mamāhcikwahpisowinihk wanitipiskāhk piyis oyasowēwinihk anima kihci kisikāki.

⁷ tāpiskoc sātam mina kamāra mina otēnawa ēkota kisiwāk kā ki ayāki ēkosi isi wistawāw asici ohi ē ki pakitinisocik pisikwātisiwinihk, mina ē ki pimitisahahkik pitosi wiyāsiwiwin, oyastēwa kita miskawāsomikoyahk ē kotakitācik kakēskimohikowinihk kākikē iskotēhk.

⁸ ēyiwēhk ēkosi isi oki mina o pawāmowiniwāhk wiyipitāwak wiyāsiwiwin mina māyēyitamwak tipēyihcikēwin, mina piwikiswātamwak kihcāyiwiwina.

⁹ māka māikēl ana kihci okisiko, ē nakāskawāt macāya kā ki ohcinētocik mosisa wiyawiyiw, namawiya ki oyasowātēw piwikiswāsiwēwinihk māka ki itēw, kā tipēyihcikēt ki ka kitotik.

¹⁰ māka oki piwikiswātamwak piko kēkway ēkā ē kiskēyitahkik; mina anihi kā nisitohtahkik ē isiikowisicik tāpiskoc osihcikanak ēkā kā o mitonēyicikanēcik, ēwakoni ita kā nisiwanācihocik.

¹¹ kotakihikowisiwak! cikēmā ki pimohtēwak o mēskanāyihk kēna, mina kāsakātisiwinihk ki pimitisahamwak o wanisinowiniyiw pēlama kita ohtisicik, ēkosi ki nisiwanācihowak ot ānwētamowiniyihk kārawa.

¹² ēwakonik oki ēkā ē nokosicik asiniyak ki sākihitowi wihkohtowiniwāhk ispi wiyici wihkohtomikoyēkwāwi, okanawimāyatihkwēwak ēkā ē astāsicik ē asamisocik; wasko ēkā nipi ē ayāki, ē pimi wēpastaki, takwākinowi minisātikwak ēkā ē minisiwicik, niswāw ē nipowātikosicik, ē manicēpikipiticik;

¹³ ē kostāmikwaki māmakāanwa kihcikamihk, ē pakitatāmototahkik wiyawāw o nanēpēwisiwiniwāw; ē papāmipayicik acahkosak, aniki ē kaskitēwak wanitipiskāw kā ki astwāhcik kākikē.

¹⁴ oki māka ināk mina, ēwako tēpakop āniskē ē askowāt ātama, ki kiskiwēhikēw ē itwēt, cist, kā tipēyihcikēt pē itohtēw kiki mitātatwāw kihci mitātahtomitanaw o kanātisima,

¹⁵ kita oyasowātāt kahkiyaw mina kita tāpwēmāt kahkiyaw ēkā kā manitowātisiyit kahkiyaw ēkā kā manitowātisiwaniyiki ot isihcikēwiniwāwa kā ki atoskātahkik ēkā ē manitowātisicik, mina kahkiyaw kā āyimaniyiki o pikiskwēwiniyiwa ēkā kā manitowātisiyit omacātisiwa kā ki māyi itikot.

¹⁶ ēwakonik oki onayētāwipikiskwēwak, omitawētākosiwak, ē pimotātotakik tipiyaw o maci mostawēyitamowiniwāwa (mina otoniwāhk ohci pikiskwēwak misi kakihcimowina), ē kakēkinācik ayisiyiniwa kita ohtisicik.

¹⁷ māka kiyawāw siyākihitakok, kanokiskisik itwēwina kā ki wihtamiyit niyāk ot apāstilima kā tipēyimikoyahk cisas Christ;

¹⁸ tānisi kā ki itikoyēkok, iskwāyāc ati kākisikāki opāpinotākēskak kita ihtāwak ē pimotātotakik wiyawāw ēkā ē manitowātaniyiki o mostawēyitamowiniwāwa.

¹⁹ ēwakonik oki kā pāpakānihiwēcik, otisiikowisiwak, ēkā ē ayāwācik ahcāhkwa.

²⁰ māka kiyawāw siyākihitakok, ē yakisihisoyēk ayiwāk kā kanātahk ki tāpwēyēyitamowiniwāhk, ē ayamihāyēk kā kanātisit ahcāhkohk,

²¹ kanawēyimisok o sākihiwēwinihk kisēmanito, ē asawāpahtamēk o kisēwātisiwin kā tipēyimikoyahk cisas Christ kākikē pimātisiwinihk.

²² ātiht māka kitimākināhkok ē wawānēyitahkik;

²³ ēkosi ātiht pimācihihkok, ē nawacipitāyēkok iskotēhk ohci; ātiht mina kitimākināhkok ē astāsiyēk; ē pakwātamēk ahpo kikiskācikan wiyāsiwiwinihk ē ohci wiyipinākwahk.

²⁴ ēkwa māka ana kā kaskitāt kita kanawēyimikoyēk ēkā kita pahkisiniyēk mina kita oyahyikoyēk ita ē nokwaniyik o kistēyitākosiwin ēkā kita atāmēyitākosiyēk kihci mamahtākosiwinihk,

²⁵ ana piko kisēmanito kopimācihiwēminaw wiya ohci cisas Christ kā tipēyimikoyahk, kita ayāw kistēyitākosiwin, kihcāyiwiwin, tipēyihcikēwin mina kaskihēwisiwin, mwayēs kēkway ayāk, mina anohc mēkwāc, mina kākikē. āmēn.