Yésaya 1 - Kitab Jawa Suriname

Pérangan Kaping pisan Bab 1—39 Medar Wahyu 1—12 Yéhuda Lan Yérusalèm Isiné 1:1

¹ Weweruh sing Yésaya weruh, anaké Amos bab Yéhuda lan Yérusalèm waktu jamané Uzia, Yotam, Akas lan Hiskia, para ratu ing Yéhuda.

Nggresulané bab bangsa sing ora setia 1:2-9

² Rungokna, hé langit, lan gatèkna, hé bumi, awit GUSTI ngetokké tembung: “Aku wis nggedèkké anak-anak lan kuwi wis Tak gulawentah nanging pada mbruntak marang Aku.

³ Sapi kenal marang sing nduwé nanging Israèl ora; kimar weruh marang wadah pakané sing dityepakké karo bendarané, nanging umat-Ku ora ngerti.”

⁴ Tyilaka bangsa sing dosa, golongan sing kabotan duraka turunané wong ala, botyah-botyah sing nandangi ora betyik! Kuwi pada ninggal GUSTI, pada ngèlèk-èlèk marang sing Maha Sutyi, Gusti Allahé Israèl, lan nyingkur Panjenengané.

⁵ Kowé kepéngin disabeti ing ngendi menèh, kowé sing pada nambahi bruntakmu? Sirahé wis lara kabèh, lan atiné wis dadi lemes kabèh.

⁶ Wiwit ing tlapakané tekan ing sirah ora ana sing waras, abuh lan babak-belur lan tatu anyar, ora dipijeti lan ora diblebeti, lan ora dilengani.

⁷ Negaramu dadi sepi mamring, kuta-kutamu pada kobong nganti entèk; pametuné bumimu dipangan karo bangsa liyané ing ngarepmu. Sepi mamring negara kuwi kaya diwolak-walik karo bangsa liyané.

⁸ Putri Sion kèri ijèn, kaya gubuk ing kebon anggur kaya tyakruk ing kebon timun lan kaya kuta sing dikepung.

⁹ Yèn GUSTI sing ngwasani langit lan bumi ora ngèrèkké setitik kanggo kita wong sing pada utyul, kita wis pada kaya Sodom lan pada kaya Gomora.

Mratobat luwih betyik tenimbang pasrah kurban 1:10-20

¹⁰ Rungokna tembungé GUSTI, hé para penggedéné Sodom! Gatèkna piwulangé Gusti Allah kita, hé rayat Gomora!

¹¹ “Kanggo apa kurbanmu sing okèh kuwi?” Mengkono tembungé GUSTI: “Aku wis jelèh marang kurban obongan sing rupa wedus gèmbèl lanang lan marang gajihé pedèt lemu; getihé sapi lanang lan wedus gèmbèl lan wedus lanang ora Tak senengi.

¹² Yèn kowé pada nemoni ing ngarep-Ku sapa sing njaluk marang kowé, kowé pada ngidak-idak platarané Griya sutyi-Ku?

¹³ Kowé aja pada masrahaké menèh pisungsungmu sing lamis awit ambuné nggawé ora seneng-Ku. Yèn kowé pada ngramèkaké sasi anyar lan sabat utawa nganakké kumpulan-kumpulan, Aku ora tahan ngewaské, awit perayakanmu kuwi kebak sing ala.

¹⁴ Perayakan-perayakanmu sasi anyar lan kumpulan-kumpulanmu sing ajek kuwi Aku sengit ngewaské; kabèh kuwi dadi momotan kanggo Aku, Aku wis kesel enggon-Ku nyangga.

¹⁵ Yèn kowé pada megarké tanganmu perlu ndedonga, Aku bakal nutupi mripat-Ku, malah senajan kowé ndedonga bola-bali Aku ora bakal ngrungokké awit tanganmu kebak getih.

¹⁶ Pada wisuha, resikana awakmu, adohna penggawému sing ala sangka ngarepé mripat-Ku. Mandeka enggonmu nggawé sing ala,

¹⁷ pada blajara nggawé betyik ngupayaa marang keadilan, kwasanana wong sing seneng nggawé kereng; mbélanana wewenangé para botyah lola, réwangana perkarané para randa!

¹⁸ Hayuk, kita pada nganakké perkaran! tembungé GUSTI: Senajan dosamu abang kaya bolah abang, bakal dadi putih kaya salju; senajan rupané abang kaya sumba bakal pada dadi putih kaya wulu wedus gèmbèl.

¹⁹ Yèn kowé pada mbangun turut lan gelem ngrungokké, kowé bakal pada mangan pametuné negara kuwi sing betyik.

²⁰ Nanging yèn kowé pada nglawan lan mbruntak kowé bakal pada dipangan karo pedang.” Tenan iki tembungé GUSTI.

Paukuman kanggo Yérusalèm 1:21-31

²¹ Kepriyé iki, nanging kuta sing mbiyèn setia saiki dadi wong wadon lonté! Mbiyèn kebak keadilan lan tansah kanggonan kabeneran, nanging saiki kebak wong nggawé pepatèn.

²² Sak mlakamu wis ora tulèn kaya slaka menèh, lan anggurmu wis ketyampuran banyu.

²³ Para penggedému kuwi pada wong mbruntak, lan pada komplotan karo maling. Kabèh pada seneng nampa beselan lan nguber beselan. Ora pada mbélani wewenangé para botyah lola lan perkarané para randa ora ngladèni marang wong-wong mau.

²⁴ Mulané mengkéné tembungé Gusti, GUSTI sing ngwasani langit lan bumi, sing Mahakwasa, Pangayomané Israèl: “Lah, Aku bakal nindakké pewales-Ku marang para wong sing nglawan marang Aku lan nindakké balesan marang para mungsuh-Ku.

²⁵ Aku bakal nglawan marang kowé. Aku bakal murnèkké kowe kaya slaka, lan bakal nyingkirké kabèh regetanmu.

²⁶ Aku bakal mbalèkké para rèktermu kaya mbiyèn lan para juru pituduhmu kaya ing wiwitan. Sakwisé mengkono kowé bakal disebut kuta keadilan, kuta sing setia.”

²⁷ Kowé bakal Tak luwari karo pengadilan lan para wong sing mratobat bakal Tak luwari karo tyara sing bener.

²⁸ Nanging para wong sing mbruntak lan para wong sing nglakoni dosa bakal dientèkké bebarengan lan para wong sing ninggal GUSTI bakal pada dientèkké.

²⁹ Tenan, kowé bakal pada kewirangan awit sangka wit-witan terbantin sing pada kok senengi, lan kowé bakal pada kewirangan awit sangka taman-tamané retya sing pada kok pilih.

³⁰ Awit kowé bakal pada kaya wit terbantin sing alum godongé, lan kaya kebon sing kekurangan banyu.

³¹ Wong sing rosa terus dadi kaya kapuk lan penggawéné dadi kaya geni sak pelik; loro-loroné bakal pada kobong bareng lan ora ana wong sing bisa nyirep.