Ezra 1 - Kitab Jawa Suriname

Korèsy nglilani para wong buwangan mulih 1:1-11

¹ Waktu taun kaping pisan jamané Korèsy, ratu ing negara Pèrsia, supaya kelakon tembungé sing diomongké karo Yérémia, GUSTI ngrogoh atiné Korèsy, ratu ing Pèrsia mau, sak nalika piyambaké terus préntah ing sak kabèhé kratoné Korèsy karo tembung lan uga ketulis:

² “Mengkéné préntahé Korèsy, ratu ing Pèrsia: GUSTI, Gusti Allahé sak ubengé langit wis ngekèkké kabèh kraton ing bumi marang aku; Panjenengané wis ngongkon marang aku nggawé griya kanggo Panjenengané ing Yérusalèm ing negara Yéhuda.

³ Sapa wong sak panunggalmu sing ijik umaté, kuwi didadèkké siji karo Gusti Allahé! Kuwi budala mulih menyang Yérusalèm ing negara Yéhuda lan nggawéa griyané GUSTI, Gusti Allahé Israèl, ya kuwi Gusti Allah sing manggon ing Yérusalèm.

⁴ Nanging sapa-sapa sing ijik kèri, ing ngendi-endi waé enggoné neneka, kuwi réwangana karo wong sing manggon tunggal sak panggonan karo slaka lan emas lan dandanan uga kéwan, karo menèh sing rupa pisungsung kebungahan kanggo griyané Gusti Allah sing manggon ing Yérusalèm.”

⁵ Ing kono para penggedéné taler Yéhuda lan Bényamin lan para imam lan para wong Lèwi, ya kuwi saben wong sing kerogoh atiné karo Gusti Allah, supaya budal, terus pada budal, arep mbangun griyané GUSTI sing manggon ing Yérusalèm.

⁶ Nanging kabèh tangga-teparoné pada ngréwangi piranti slaka lan emas lan banda lan kéwan, uga werna-werna, kejaba kuwi apa sing dipasrahké karo kebungahan.

⁷ Korèsy uga ngongkon ngetokké pirantiné omahé GUSTI sing wis dirayah karo Nebukadnésar sangka Yérusalèm lan disèlèhké ing omah allahé.

⁸ Korèsy ratu ing Pèrsia mau enggoné ngetokké kuwi dipimpin karo Mitredat, juru bandané gedong kraton, sing ngitungi kuwi kabèh ing ngarepé Sèsbasar, penggedéné bangsa Yéhuda.

⁹ Iki daftaré: bokor emas telung puluh, bokor slaka 1000, péso sangalikur,

¹⁰ tuwung emas telung puluh, tuwung slaka 410, piranti liyané 1000.

¹¹ Kabèh piranti emas lan slaka kuwi gunggungé 5.400. Kuwi kabèh digawa Sèsbasar, waktu para wong buwangan pada dituntun mulih sangka negara Babèl menyang Yérusalèm.