Luka 1 - Northern Zazaki (Kirmancki) Dersim-Hozat Scripture Portions

¹ Mordemo rınd Teofilos, Xeylê mordeman wast kı çiyê kı mabênê ma de bi bi, inan bınusnê.

² Ma ki xebera ni meselan, kamo kı verdı ra nat ni çiyan rê sayidinı kerda, inan ra, jü ki kamo kı xızmeta qesa Heqi dero, inan ra gırotı.

³ Mın ni çiyê kı biyê, ni pêro rınd kı pers kerdê, mın wast kı ninan têdıma to rê bınusni.

⁴ Mın nia kerd kı tı bızanerê, çiyê kı tı eşiyay pê, i rastê.

Cebrail xebera Yahyay dano

⁵ Waxto kı Hirodesi Welatê Yahudiyan de hukumdarinı kerdenê, i waxtan de ezbeta Aviya ra jü rayib esti bi, namê niy Zekeriya bi. Cinıka iy Elizabetı ki ezbeta Rayib Haruni ra biye.

⁶ Ni dı teni ki qatê Heqi de mordemê rasti bi. Emrê u qanunê Heqi zaf rınd ardenê hurindi.

⁷ Elizabetı qısır biye, ay ra domanê Zekeriyay bı ê Elizabet'a çini bi. Ê ni dı tenan ki xeylê serrê xo esti bi.

⁸ Mabed de waxtê xızmetı, ezbeta Aviya de biye. Zekeriyay ki Heqi rê xızmetı kerdenê.

⁹ Rayiban zê her waxti ancia mabênê xo de qura antê kı kam Mabeda Heqi de bıxur bıvêsno. Qura na rey, Zekeriyay rê veciya.

¹⁰ Key kı bıxur vêsenê, teber de sılxetiya de gırsı amay bi pêser, düay kerdenê.

¹¹ A sırı de, melekanê Heqi ra Cebrail Zekeriyay rê aşiya. Cebrail, cao kı ser de bıxur amenê vesnayenı, rastê ucay de fındeti bi.

¹² Zekeriyay kı Cebrail di, sas bi, xof kut zerrı.

¹³ Cebraili cı rê nia vat: “Zekeriya, metersı, Heq düanê to eşiya pê. Cinıka to Elizabetı to rê jü lacek ana dina, namê iy Yahya nanay pıra.

¹⁴ Tiyo kêf bıkerê, sa bıberê u xeylê mılet ki saba biyayena Yahyay kêf keno.

¹⁵ Domano kı bêro dina, çımê Heqi de beno berc. Owo şerab u qe jü içki meno fekê xo ra. Hona kı pizê may dero, bı Rowo Bımbarek'a beno pırr.

¹⁶ No doman lacanê İsraili ra zafinan peyser ano raya Heqi ser.

¹⁷ Owo bı roê u qeweta Pêxember İlyasi'a vırniya Heqi de sêro, zerria piyan saba domanan nerm kero. İyê kı Heqi say nêkenê, fıkrê inan vurneno ya, inan çarneno raya rastı ser. Mıleti saba amayena Wayiri keno hazır.”

¹⁸ Zekeriyay Cebraili rê vat: “Ez koti ra bızaneri kı na vatena to bena? Ez mêrıko de kokıman, ciniya mın ki zaf kokıma.”

¹⁹ Cebraili iy rê nia vat: “Ez Cebrailan. Ez her waxt lê Heqi deran. Heqi ez rusnan kı to de qeşi keri, na mijdani bıderi to.

²⁰ Qay nıka, hata kı niyê kı mın to rê qeşi kerdê mêrê hurindi, tı nêşkinay qeşi bıkerê. Tı bı qesanê mın'a inam nêbiyay, ay ra zianê to beno lal. Feqet iyê kı mın to rê qeşi kerdê, i waxtê xo de ênê hurindi.”

²¹ Mıleto kı teber ra bi, Zekeriya pitenê, inan merex kerdenê, çay hente waxt wertê Mabed de mandi bi.

²² Zekeriya kı wertê Mabed ra veciya, nêşkiyenê qeşi bıkero. Mıleti zana kı Zekeriyay zerrı de çiyo de bımbarek di bi. Zekeriya bi lal, ay ra iy bı destanê xo'a kerd kı çiyê vaco.

²³ Rocê xızmeta Zekeriyay kı qediyay, şi kê xo.

²⁴ Ni rocan ra tepia, ciniya xo Elizabetı dıcani mandı, phanc asmi kê ra qe nêveciyê.

²⁵ Elizabetı nia vat: “Heqi na saba mın kerdı, rüyê mı ro sêr kerd, sermo kı mın mıleti ver de antenê, ez ni sermi ra xelesnan ra.”

Cebrail xebera İsay dano

^26-27 Key kı Elizabetı dıcania xo de kuti bi asma şeşenı, Heqi melekanê xo ra Cebrail rusna lê jü kêneka azebı. Na kênekı hetê Celile de suka Nasıra ra biye. Ezbeta Qıral Dawudi ra amenê, waştiya Usıvi biye. Namê na kênekı Meyremı bi.

²⁸ Cebrail, Meyremı rê aşiya, vat: “Ma bı xêr di, Meyrem! Tı restay kerema Heqi. Heq lê to dero.”

²⁹ Verê ni qesan de, Meyremı sas biye, xo xo de vat, mana ni sılami çıka?

³⁰ Meleki cı rê vat: “Metersı, Meyrem, tı restay kerema Heqi.

³¹ Tiyo dıcani bımanê, jü lacek biyarê dina, namê iy İsa nanay pıra.

³² O beno mordemo de gırs. İy rê vanê, no lac, Heqo kı her çi ra berco, lacê İyo. Heq text dano iy, no text, textê khalıkê iy, ê Qıral Dawudio.

³³ Owo her waxt ezbeta Yaqubi sero hukım bıkero, hukumdariya iy qe nêqedina.”

³⁴ Meyremı meleki ra pers kerd: “No senên beno? Ez hona jü camerdi'a pia nêbiyan.”

³⁵ Meleki vat: “Rowo Bımbarek êno lê to, Heqo kı her çi ra berco, qeweta iy to sero şiyê bena. Domano kı tı biyarê, o bımbarek beno, iy rê vanê Lacê Heqi.

³⁶ Qay, saba mordema to Elizabetı ki vatenê qısıra, ê nay xeylê serrê xo ki esti bi, feqet nıka şeş asmio kı dıcaniya, awa jü lacek biyaro.

³⁷ Çiyo kı Heq meşkiyo bıkero, çino.”

³⁸ Ni qesan ser, Meyremı meleki rê vat: “Ez qula Heqian. Tı senên vanay, va hini bo.” Nay dıma, melek lêwı ra şi.

Meyremı sona kê Elizabetı

³⁹ Meyremı i rocan de xo hazır kerd, bı lez'a şiye koyanê Welatê Yahudiyan de jü sukı.

⁴⁰ Meyremı kutı kê Zekeriyay, sılam da Elizabetı.

⁴¹ Key kı Elizabetı sılamê Meyremı eşiyê pê, domano kı pizê Elizabetı de lewiya. A deqa Elizabetı bı Rowo Bımbarek'a biye pırr.

⁴² Ay kêf ra vengê xo kerd berc, Meyremı rê nia vat: “Tı mabênê cinıkan de bımbarekay. Domano kı tı biyarê rüyê dina, o ki bımbarek beno.

⁴³ Senên bi kı mua Wayirê mın ame lê mın?

⁴⁴ Ez se kı sılamê to eşiyan pê, domano kı pizê mın de kêf ra lewiya.

⁴⁵ Ğeji bê to kı, tı owo kı Heq saba to bıkero, bı iy'a inam biyay.”

⁴⁶ Meyremı ki nia vat: “Ez zerri ra, Heqi rê şukır kenan.

⁴⁷ Owo kı mın bıxelesno ra Heqo, Ay ra roê mın kêf ra perreno.

⁴⁸ İy qimet da zê mın qula de bêqimetı. Nay ra tepia neslê her waxti saba mın vanê: Ğeji bê ay.

⁴⁹ Çıkı Heqê qudretıni, saba mın çiyê gırsi kerdi. Namê iy bımbareko.

⁵⁰ Kam kı iy ra bıterso, Rama iy serê tornanê u tornanê inan de bena.

⁵¹ Heqi bı qudreta xoa gırs'a, karê gırsi kerdi. İyê kı xo gırs vênenê, i kerdi têser têbını ra.

⁵² Text ra hukumdari nay ro, Mordemê kı cêr derê, i berc kerdi.

⁵³ Vêsani, bı çiyanê rından'a mırd kerdi, Variyetıni ki dest thal çarnay ya.

⁵⁴ O rest yardımê qulê xo İsraili, Rama xo inan sero kêmi nêkerdı.

⁵⁵ Senên kı khalıkê ma İbrahimi rê u ezbeta iy rê wad kerdi bi, O her waxt ni wadi rê sadıqo.”

⁵⁶ Meyremı kı lê Elizabetı de nejdiyê hirê asmi mandı, peyser gêrê ya kê xo.

Biyayena Yahyay

⁵⁷ Waxtê rakutena Elizabetı ama, Elizabetı jü layık ard dina.

⁵⁸ Key kı ciranê xo bı mordemê xo eşiyay pê, Heqi rama xoa gırsı senên muskıti bi Elizabetı, i ki bı Elizabet'a pia sa bi.

⁵⁹ Roca heştını de amay sunetê domani. Namê pi Zekeriya bi, inan wast kı ni nami domani ra nê.

⁶⁰ Elizabetı vat: “Nê, namê iy Yahya beno.”

⁶¹ İnan nia vat: “Mabênê mordemanê sıma de, keso kı namê xo Yahyawo çino.”

⁶² Ni qesan dıma, inan bı destan'a pi ra pers kerd, kamci namı wazeno cı dero layıki.

⁶³ Zekeriyay jü textı wast, sero nia nusna: “Namê xo Yahya bo.” İyê kı uca de bi, pêro sas bi mandi.

⁶⁴ A deqa zianê Zekeriyay bi ya, ancia qeşi kerd, Heqi rê şukır kerd.

⁶⁵ Ciranê xo pêro tersay, her cayê koyanê Welatê Yahudiyan de, na mesela amenê qeşi kerdenı.

⁶⁶ Kam kı na mesela eşiya pê, zerria xo de nia pers kerd: “Eceb, no doman, se beno?” Heq lê iy de bi; inan ay ra hini pers kerd.

Zekeriya Heqi rê şukır keno

⁶⁷ Piyê Yahyay Zekeriya bı Rowo Bımbarek'a bi pırr, pêxemberinı kerdı, nia vat:

⁶⁸ “Wayirê ma, Heqê İsraili rê şukır bo! İy sarê xo rê yardım kerd, İ bındestiye ra xelesnay ra.

^69-70 İy senên kı waxtanê verênan ra nat Bı fekanê pêxemberanê bımbarekan'a xeberı day bi ma, Ma rê ezbeta qulê xo Dawudi ra Jü xelesnoğo de qudretın rusna.

⁷¹ Destê dısmenanê ma ra, İyê kı ma ra hez nêkenê, Destê inan ra ma xelesnayım ra.

⁷² İy rama xo muskıtı pi u khalıkanê ma. Sondê xowo bımbarek ard xo viri.

⁷³ İy khalıkê ma İbrahimi rê wad kerdi bi,

^74-75 Owo ma destê dısmenanê ma ra bıxelesno ra, Hata kı wesım, ma şikinım verê iy de, Bêters, wertê pakinı u rastinı de, İy rê qulini bıkım.

⁷⁶ Lacê mın Yahya, tı ki benay pêxemberê Heqi, Owo kı her çi ra berco. Tı vırniya Wayiri ra sonay kı rayanê iy hazır kerê.

⁷⁷ Tı na xeberı danay sarê Heqi: Gunê inan ef benê kı i bıxeleşiyê ra.

⁷⁸ Heq ramaniyo, Ay ra o cor ra jü Xelesnoğ rusneno ma rê. No Xelesnoğ zê tici berc beno.

⁷⁹ Na tici, kamo kı wertê tari bı tersê merdenı de weşiya xo ramıno, İnan sero bereqina. Na tici ma bena raya sılametiye.”

⁸⁰ Yahya biyenê gırs, roê xo biyenê qewetın. Hata roca kı bıveciyo wertê mıletê İsraili, hata a waxt Yahya yaban yaji de mand.