Yuuda 1 - UTESITAMENTI UMPYA

¹ Nene Juta ndili nkivaga va Jesu Kilisiti, ndili nunave va Jakobu. Ndikuvavigila ńi vilangwa, ńi avaganile Unguluve udadajińo, ńi avuvatye UJesu Kilisiti.

² Ndikuvapembetsa ndita: Ikisa nulunotsehetso nulugano lwongosu luve nune.

³ Ńi vajyango ńi vagane vwu ndinogilwe ukuvavigila itsa vupoki vupamato vwene twivoni, pwu ndivwene isinge sikuńumilitsa ukuta ndivavigile ilya kuvahusanya ndulwilage ulwidiko ulwu vapevilwe ṅani kapamato kene avavalatse.

⁴ Mańa kwuvale avange avanu avajyejye ukwijingitsa mwańe umu, vagendile mumbale. Uvwu inongwa tsa vene tsidumulilwe ṅani katale, vatsovilwe ukuva vwu vila-Nguluve. Avene uluhungu lwa Nguluve vitu valukilivwe vatye lwu lutupye uvupumu. Numwenesyoni unkuludeva vitu UJesu Kilisiti vikibela kumwene vita nakuli.

⁵ Mańa ndita ndivakumbuhitse itsu mwatsimańile katale itsakuta unkuludeva avahumitse avanu va mwene nkilunga kya mu-Egipiti, ulwambele pwu akavajatsa avatsilakwidika.

⁶ Ndikuvakumbuhitsa navasuṅwa uvwu navapalolili vunnonu pavuvombelo vwa vene, avakasileka nisijumba sya vene. Vwu avavikile kunzi kuṅisi, avakungile nimińololo imitsilakusila lusiku. Avavikile ukuta vahigwagwe palitsuva ilivaha lilya.

⁷ Ndikuvakumbuhitsa ava mu-Sotomu nava mu-Gomola nava mbutsenge vwoni uvubadiṅine navwo, avali ndava nuvuligu uvuluti. Mańa vakanogwa ukuligupa nimihana iginge. Lino pwu vipelile ukuva va kutolelamwo aka kutolela. Mańa vikuvilwa ukuvungwa umwoto gwa sikutsoni.

⁸ Vwu vagahile navagonamagonasivi ava. Navene vali ndavalya ukulamya imihana gya vene. Vikuvugilila vwoni uvutwa. Vikuvaduka amadusi avavaha.

⁹ UMikaeli umbaha va vasunwa upwu alwitsaga nu-Setano, upwu vakaniṅanaga unsimba gwa Mose, pwu akadwada ukuntsovela ṅani uvuvivi nukunduka amadusi. Bako akatsovela vuvule ilyakuta: Untwa akuvunge.

¹⁰ Avene ava vwu vikutsiduka amadusi tsoni itsu navatsimańili Isyene isyu vasiliṅinye isyu vilya nummana gwa vene, isyu vilya ndiṅanu inzilaluhala, syu vivejangila sisyo avene.

¹¹ Vwu twita muliviki, mańa vagendile inzila jya Kaini, vitsagiliṅinye mbuteki vwa Bilyamu upwu vinogwa isya kuvahomba. Vajatsivwe ndwiho lwa Kola.

¹² Avene mitilisa gya mwiko. Upwu ndundamine pakulya isya vumańane pwu naviva nisoni. Bako pwu visyota isya pavuvalatse kitadwada. Mivingo imitsilasula igikujisa amakuluguta. Mibiki igilagitse amani. Gyu mitsilakuhupa iseke. Gyu miswakavili ukuswa, igikupwike nimilela.

¹³ Gyu mijiga gya muńanza igihambwike igitutuma imbivi tsa gyene. Gyu mitondwe imijatsavanu. Unguluve avavikye iṅisi imbaha inzilakusila lusiku.

¹⁴ Vwu avatsovelaga ṅani mumalago ga mwene Enoka, uva lekelakupamato ukuhuma pa-Adamu ukuvala, upwu atetsaga: Lola itsile untwa, itsile nisipuga sya mwene sya vavalatse syongosu.

¹⁵ Itsile kukuvahiga voni nukuvalema imbombo tsoni itsu vikumwila voni avila-Nguluve, namameńu goni amavivi ugwu vantsovile voni avatulanongwa avila-Nguluve.

¹⁶ Avene vwu venekusisa, vwu venekwilusa. Vikonga mbunogwe vwa vene ulugendo. Undomo gwa vene gwitsova amameńu amadutu. Kumiho kwave viva nda vikukudega humbe vuvasuṅile vwu vulyasinu.

¹⁷ Une ńi vajyango ńi vagane nkumbuhitse itsu vatsovye ṅani avapositili va nkuludeva vitu UJesu Kilisiti,

¹⁸ upwu vavavulaga vakata: Mmyaka gya kunepo pwu valavoneka avańańovelo avalakonga mbunogwe vwa vene vwa kwila-Unguluve upwu vigenda ulugendo lwa vene.

¹⁹ Vwu avipela imatukano ulwakuva vita tukonga umwu tupelilwe. Navali nu-Mepo.

²⁰ Une ńi vajyango ńi vagane mwitsenge palwalo lwa lwidiko lwińo ululuti uvuvalatse, mwisajile mwa Mepo umbalatse ulwisajo.

²¹ Mwivike ndugano lwa Nguluve lwu luvuvatile. Amiho gwu gave kukisa kya nkuludeva vitu UJesu Kilisiti ikilavagega kuvwumi vwa sikutsoni.

²² Avange vwu mbalilile ikisa, avikwinana mmbapoke, mmbańage mmwoto.

²³ Avange vwu mmbalilile ikisa nndudwado. Nune nngudwade unsabwa ugulamile ummana gwa mbivi.

²⁴ Umwene uvi alumańile ukuvuvatila ukuta ndadepanikaga, uvi alumańile ukutsikuvavika kumiho kuvuvaha vwa mwene ńi vavalatse amatilisa ńi vandugaluko,

²⁵ ndita Unguluve uvi ali mpamato mwene, uvi atupokile mwa Jesu Kilistii untwa vitu, vi tumpetsage uvuvaha nuvudwadwa namaka ningusu nalino nakuvutsilakusila lusiku. Ameni.