Yohana 1 - UTESITAMENTI UMPYA

¹ Kuvutengulilo kwu alikwo ULimeńu. ULimeńu uju akava nu-Nguluve, ULimeńu uju ale vi Nguluve.

² Umwene kuvutengulilo akava nu-Nguluve.

³ Syoni isipelwa syu sipelilwe mmwene jujwa. Ale angajage jujwa pwu ndali nasipelilwi isinge isipelwa.

⁴ Navwene uvwumi vukava mumwene jujwa. Uvwene uvwumi vukava lumuli lwa vanu.

⁵ Ulwene ulumuli lukamulika muṅisi. Ijyene iṅisi lweli najikaluvona ulumuli.

⁶ Pwu akavoneka umunu uvi Unguluve ansuṅile, vi ale vi Johani ilitavwa.

⁷ Vi akitsa kukutsitsova itsa kusimilitsa, akitsa kukulusimilitsa lu lumuli voni avanu ukuta avagege kulwidiko.

⁸ Umwene ukuva lumuli kwanave lumuli, bako umwene ale va kulutsova vuvule ulumuli, ale va kulusimilitsa.

⁹ Umwene lumuli uva jilweli uvi ikuvamulika voni avanu vi ali pakwitsa nkilunga umu.

¹⁰ Ukuvamwo kwu alimwo nkilunga umu, mańa nakyene ikilunga kyipelye mumwene jujwa upwu kikapelwa, lola ikilunga nakyammańe.

¹¹ Umwene akitsa mumwene jujwa mańa avene avanu va mwene vakabela ukumwupilila.

¹² Avene voni avamwupililaga vwu akavapa amaka aga kuvela ukuva vana va Nguluve vwu avalyidikaga ilitavwa lya mwene.

¹³ Vwu ava nukuholwa navaholilwi namunkisa namumwa gunogwa umana, namumwa anogilwe umunu ungosi, bako avene avaholile jyu Nguluve.

¹⁴ Pwu ULimeńu akipela ukuva mmana gwa vanu, akatsenga ihema mwavwe umu, tukavuvona uvuvaha vwa mwene, uvuvaha uvwavonekaga ukuva vwa ju nswambe uvi ali mpamato mwene ludiga mwa dadaje, uvi nuluhungu nuvwajilweli sidigile mumwene.

¹⁵ Umwene UJohani akatsova akasimilitsa akilanga akata: Vi uvi ndantsovaga uvi ndatetsaga ikuṅonga mumbele, vi ipelile ukuva mbaha nakwane ulwakuva umwene akavakwo vwu ndikanale une.

¹⁶ Mańa twivoni tukatola uluhungu mbukwile vwa mwene umwu vuvelye, tukavuja tukatolela lu luhungu.

¹⁷ Mańa itsene isimilitso tsu Unguluve atusuṅye nu-Mose, lola uluhungu nuvwajilwelii syu atupye ju Jesu Kilisiti.

¹⁸ Nakuli ujyunge uvi ambwene mmiho Unguluve. Unswambe mpamato ludiga uvi udadaje ampagite vi atuvulile atye mańa ali nde.

¹⁹ Apene upwu ava-Juta va mu-Jelulsalemu vwu vavasuṅile kwa Johani avateketsi navańa-Levi upwu vatetsage: Nkambutsage nkatetsage: Veve veni uve? Pwu UJohani akasimilitsa,

²⁰ akaleka nukusiha akabela akata: Sinene Kilisiti.

²¹ Pwu vakambutsa vakata: Veve veni, veve Elija? Umwene akabela akata: Mańa sinene Elija. Pwu avene vakongeletsa vakata: Veve namalago? Umwene akanda akata: Bako.

²² Pwu avene vakavutsa vakata: Veve veni? Utuvulage itsa kuvavula avatusuṅile. Vwitsova liliku?

²³ Umwene akavavula akata: Une ndililimeńu lya mwilangi uvi ikwilanga ndukungu ita: Mugolose unsevo gwa nkuludeva vwu atsovaga uńamalago UJesaja.

²⁴ Avene avanu avagegaga itsa kuvutsa ili vwu vahumile kuvapalisai.

²⁵ Pwu vakammiga vakata: Vukuvotsa kiki avanu vwu siveve Kilisiti, siveve Elija, siveve ńamalago?

²⁶ Umwene UJohani akavanda akata: Une ndikuvotsehetsa namagasi vuvule avanu. Lola umwene ali pagati pańye uvi namummańili.

²⁷ Vi aṅongile une, uvi nandinogili ukuvopola utukova twa nsikato sya mwene.

²⁸ Tsitsitsi tsu tsikavonekela mbutsenge uvunge uvwale mwambo gulya gwa Jolitani uvwu vita mu-Betanija mulya UJohani akavotsa avanu.

²⁹ Nda kilavo pwu UJohani akavona UJesu ikwitsa upwu ale, pwu akavavula avanu akata: Lola vi Kakolo ka Nguluve akitwikile uvutulanongwa vwa kilunga kyoni.

³⁰ Vi uvi ndantsovaga ndatetsaga: Ikuṅongaga mumbele umunu, vi ipelile ukuva mbaha nakwane ulwakuva umwene akavakwo vwu ndikanale une.

³¹ Nune nandimmańili, bako upwu nditsile, upwu avanu ndikuvotsa namagasi pwu tsu nditsile ukuta apulikikage jujwa mbańa-Isilaeli umu.

³² Pwu UJohani akatsova akasimilitsa sitso akata: ndimbwene UMepo vwu ikumwikila ihuma kukyańa ukuta ngundya, Ndikavona itama pamwene.

³³ Nune nandimmańili, bako jujwa uvi asuṅile uvi atye ukavotse namagasi avanu vi ambulile atye: Uvi ungave umbwene UMepo ikumwikila itama pamwene, vwu vi jujwa uvi ikuvotsehetsaga nu-Mepo umbalatse avanu.

³⁴ Tsu ndikalola nune pwu ndikatsova ndikasimilitsa ndikata: Uju vi vi nswambe va Nguluve.

³⁵ Nda kilavo vwu imile baho UJohani navakongi va mwene vavili,

³⁶ pwu akavona UJesu igenda pwu akavavula akata: Kalya AKakolo ka Nguluve.

³⁷ Avene avakongi va mwene vavili vakapulika vwu itsova ili, pwu vakankonga UJesu.

³⁸ Umwene UJesu akakilivuka akavona vikunkonga mumbele pwu akavavutsa akata: Mubihaku? Avene vakanda vakata: Labi (kwukuta vi mańisi) uli ndapi?

³⁹ Umwene akata: Tuvuke nkapamańe, Pwu vakabiha nave vakatsikundola upwu alipwo. Pwu vakatama nave ilitsuva ili. Apene pale pwu pakavalilo ka kitsigo upwu vakambona.

⁴⁰ Avene avapulikaga itsu atsovaga UJohani vakankonga UJesu, ujyunge ale vi Andileja ununave va Simoni Petele.

⁴¹ Vi akatengula ukumbona umamaje USimoni akambula akata: Tumbwene UMesija (kwukuta Kilisiti),

⁴² akangega kwa Jesu, Umwene UJesu akandola akata: Vi Simoni vi ńa-jona uve lino vutsovwagwa ilya Kepa (kwukuta Petele).

⁴³ Nda kilavo UJesu vwu ibiha mu-Galilai pwu akaganila nu-Pilipo akambula akata: Uṅongage,

⁴⁴ Umwene UPilipo ahumile mu-Betisaita, vale mbutsenge vupamato nu-Andileja nu-Petele.

⁴⁵ Umwene UPilipo akaganila nu-Natanaeli akambula akata: Tumbwene uvi antsovaga nu-Mose musimilitso tsa mwene, uvi vantsovaga navańamalago, vi Jesu uńa-Josepu uva mu-Nasaleti.

⁴⁶ Umwene UNatanaeli akanda akata: Mu-Nasaleti siki sihumilemwo lusiku isinnonu? Umwene UPilipo akata: Tuvuke ukalole.

⁴⁷ Umwene UJesu vwu ambwene UNatanaeli ikwitsa kumwene pwu akantsovela ṅani akata: Ndegage uńa-Isilaeli jilweli uvi nali nuvuteki uvunge mwitumbu mmwene.

⁴⁸ Pwu nu-Natanaeli akambutsa akata: Ummańile ndaku? Akanda UJesu akata: Ndakuvwene vwu akanale nukukwilanga UPilipo vwu uli pankuju palya.

⁴⁹ Pwu akanda UNatanaeli akata: Vi mańisi vi nswambe va Nguluve uve, vi nkuludeva va vańa-Isilaeli.

⁵⁰ Pwu UJesu akanda akata: Uve utsivwene vuvule ulwakuva ndikuvulile nditye: Ndakuvwene pankuju. Uladega imbaha naku itsi.

⁵¹ Pwu akatsova nave akata: Jilweli-lweli ndikukuvula ndita: Mutengula lino mwivona kukyańa kudinduka, mwivona navasuṅwa va Nguluve vita nukutoga kukyańa vita nukumwikila Uńamunu.