Vapositili 1 - UTESITAMENTI UMPYA

¹ Mundongotsi tsilya ndakuvigilaga vi Tyopile, mwu ndakuvigye tsoni itsu UJesu atengulaga ukuvomba nukuvavula inongwa avanu,

² ndikatsisika natso palitsuva ilyu atogelaga kukyańa vwu ahumile pakuvalagila mwa Mepo umbalatse avakongi va mwene uvwu avahalile katale.

³ Nditsova uvwu ivonehetsagamwo umwumi vuvule vwu ahumile pakukuvilwa upwu avavonekelaga papongosu. Vwu vakalolana nave amatsuva imilevulo gini, akavavula nitsa ludeva lwa Nguluve.

⁴ Vwu valundamine nave pwu akavalagila akata: Ndahumaga mu-Jelusalemu umu. Bako mwu mwitse mutsipulikilage mumu itsu udada mwidiṅine nuńe itsu mupulike nakwane.

⁵ Mańa UJohani vi avotsaga namagasi avanu, lola uńe pasigye padebe pwu ndotsivwagwa mwa Mepo umbalatse.

⁶ Avene vwu valundamine baho vwu vakambutsa vakata: Nkuludeva nda pwu ulamwimikilaga uludeva lwa mwene Isilaeli palitsuva lilyo?

⁷ Umwene akanda akata: Nannogili uńe ukugumańa umwaka nukukamańa nakavalilo ukwu udada atye kwu ka maka gango ndimwene.

⁸ Lola uńe ndupililaga amaka vwu avitsye UMepo umbalatse, pwu ndava vatsovanongwa tsango namu-Jelusalemu namu-Jutai namu-Samalija ndatsisikaga nabaho kisilye ikilunga.

⁹ Vwu ahumile pakutsova ili, pwu akańagwa vwu vilola, ilivingo likatoga nave kumiho kuvene.

¹⁰ Vwu vandungamye avene vwu ibiha kukyańa, pwu vakakeńemuka avanu vavili vimile upwu vale, vaswalile imisabwa imivalasu

¹¹ vita: Ńi vajitu, ńi va-Galilai uńe mwimile kiki, mulungamye kiki kukyańa? UJesu uju vi muvwene ińagwa kwańe, uvi itoga kukyańa lino vi alitsa lulwu mumbwene ukutoga kukyańa.

¹² Pwu vakasisimuka upwu vale pakidugala ikyu vatetsaga kya mono, vakakilivuka ukubiha mu-Jelusalemu. Ikyene ikidugala iki kyu kili mbwipi nu-Jelusalemu, kili pakajila ka kugendela pasabati.

¹³ Vwu vavye pakusika pwu vakatoga kuńumba jya kukano umwu vavetsaga sikutsoni nu-Petele nu-Jakobu nu-Johani nu-Andileja nu-Pilipo nu-Toma nu-Balitolomai nu-Matai nu-Jakobu uńa-Alipai nu-Simoni umwipukulani nu-Juta uńa-Jakobu.

¹⁴ Voni ava vakalundamana sikutsoni, vakava numbula mamato jyene pakwisaja. Navene navadala vakava baho nu-Malija uvańina va Jesu navalukololwe va Jesu.

¹⁵ Pwu palitsuva ilinge akasisimuka UPetele akima pagati pavakongi avanine. Avene avanu avalundamine umwu vale pamilevulo kitsigo nimilevulo givili pakyańa (120).

¹⁶ Pwu akatsova navo UPetele akata: Ńi vagosi, ńi vajitu uńe natsene tsale tsa kwitsa itsavigilwe itsu UMepo atsitsovelage nndomo mwa Ndaviti itsu antsovage UJuta uvi avalongolelaga mbulongolo avamwibataga UJesu.

¹⁷ Mańa namwene ale njitu, namwene upilye iligavo lya mbombo tsitsitsi.

¹⁸ Vi akavile akalunga nisihombivwa isyu vamombile pavugalagala vwa mwene, abye kubiluka kukyańa akabatsuka pagati napagati umana, vukadudika vwoni uvutumbu vwa mwene.

¹⁹ Tsu tsikapulikika tsitsitsi mańa vatsimańile voni avatsengile mu-Jelusalemu umu, pwu akalunga kalya vakakapa ilya Hakelidama munzovele jya vene. Kwukuta: Kilunga kya nkisa.

²⁰ Mańa mwa kalata va ńimbo livigilwe ilyakuta: Uvutsenge vwa mwene upita vwipelage ukuva nsitu vuvule, nujyunge alatsengaga umu, ni lyakuta: Namumwa nambuloleli vwa mwene upita apyanilage ujyunge.

²¹ Pwu avanu uvwu twavetsaga navo sikutsoni imyaka gyoni igyu UJesu unkuludeva atsungutilaga mwavwe umu,

²² avatengwe upwu amwotsage UJohani avitsile ukusika palitsuva ilyu atogelage kukyańa vwu twilola twivoni, vwu upita tuhalage ujyunge vi ipelage ukuva njitu namwene ave va kuntsova UJesu ukuta atsukile jilweli.

²³ Pwu vakavahala vavili. Nu-Josepu uvi vatetsaga vi Balisaba uvi ale vi Jusiti ilitavwa ilinge nu-Matija.

²⁴ Pwu vakisaja vakata: Vi nkuludeva vi mańanumbula tsa voni, vwu vavili ava ulage uvi ummalile uve

²⁵ uva kupyanila pambombo tsitsitsi napavupositili uvwu ahumile UJuta upwu abihaga papakuva pa mwene jujwa.

²⁶ Pwu vakalagula, pwu uvwene uvulagutsi vukamwibata ju Matija. Pwu vakata va kuvalililwa luninye navakitsigo nampamato.