Pilipi 1 - UTESITAMENTI UMPYA

¹ Uvwe twi va-Pauli nu-Timoti twi vakivaga va Kilisiti Jesu tukuvavigila ńivoni ńi vavalatse ńi ndi mwa Kilisiti Jesu ńi ntsengile mu-Pilipi ṅani valoleli ṅani mukuguvombela umpelela.

² Tukuvapembetsa twita: Nu-Nguluve udadajitu twivoni nu-Jesu Kilisiti unkuludeva avasaje nuluhungu nulunotsehetso.

³ Sikutsoni upwu ndikuvakumbuhitsa pwu ndisana kwa Nguluve.

⁴ Mańa sikutsoni upwu ndikuvisajila ńivoni, pwu sikutsoni ndikisaja nuluhekelo,

⁵ ulwakuva ndivwene mwipelile ukuva vakulilanila mwivangili nhumile palitsuva ililongotsi lilya mutsisike kulino kunu.

⁶ Ulwakuva tsu nditotike une ukuta uvi atengwe imbombo innonu munumbula tsińo vi alamalisa alatsisika natso palitsuva lya Kilisiti Jesu.

⁷ Mańa tsu tsinogye une ukuvasajila ńivoni tsitsitsi ulwakuva ndi munumbula jyango ńivoni ńi vakulilanila vango napaluhungu namuńololo gwango umwu ndikulyidika ilivangili umwu ndikulisimilitsa.

⁸ Mańa nu-Nguluve ambwene une ukuvasukwa uńe upwu ńivoni ndikuvasukwa mbusukwa vwa mwitumbu mwa Kilisiti Jesu.

⁹ Mańa tsu ndikisaja ndita ulugano lwińo lungave lwongelaga vunnonu ukwoloka, lungave lwavapelelaga nukutsivona inongwa nukwijumilitsa natso.

¹⁰ Pwu ndita ngave mwatye nukumańa ukutsigava induti ukuta tsu itsi tsu itsi, pwu nte nukuvalala ndavetsaga natso ninye itsa kuvahiga palitsuva lya Kilisiti.

¹¹ Mańa pwu ndavona tsidigile niseke tsa vugolosu itsu apelile UJesu Kilisiti itsa kumwidikila Unguluve nitsa kunginihitsa.

¹² Lola ndita ndivavule ńi vajyango tsoni itsimbwene une ukuta tsyongelitse vunnonu ukutandatsa ilivangili.

¹³ Mudege nuńe nikipuga kyoni kya vasikali va Kesali navange voni ukutsivona indegehe tsane ukuta ndikungilwe mwa Kilisiti:

¹⁴ Pwu navange avakilisiti avajitu vongosu mundegehe tsane vavuvwene uvusindamasu ikutsitsova inongwa kitadwada.

¹⁵ Pwuvale avange uvwu tsikuvasuṅa itsakuta tupelage itsa kavini nitsa kulwa upwu vikunsimilitsa UKilisiti, mańa pwuvale navange avikunsimilitsa ulwakuva vanganile jilweli.

¹⁶ Avene vwu luvasuṅile lwu lugano ulwakuva vambwene une ukuta vi vakulolelela ilivangili.

¹⁷ Valya upwu vikunsimilitsa Ukilisiti vwu lukuvasuṅa lu lukani ulwakuva vita vańongeletse uvukuvilwa mundegehe tsane, naviva vavalatse.

¹⁸ Piki? Pene pwu vangave vikunsimilitsa vuvule UKilisiti syiki isikuvasuṅa. Napene nupwu visagye itsinge upwu vikunsimilitsa pwu ndihekela, napene nupwu vikunsimilitsa ulwa jilweli napene ndihekela. Bako ukuhekela kwu ndihekelaga sikutsoni vuvule.

¹⁹ Mańa ndilumanile tsitsitsi tsu tsyipelile ukuva tsa kumoka une ulwakuva nuńemukuńisagila nu-Mepo va Jesu Kilisiti ikunanga sitso.

²⁰ Vwu tsitso ndikaluka tsitso ndihuvila ukuta ndilajululaga kinu. Bako ukuta nalino namwoni-mwoni UKilisiti aginivwagwe sitso mummana gwango sikutsoni nupwu pwundili kuvwumi nupwu ndiswe.

²¹ Ulwakuva vwu vwumi une ndili mwumi ndingave ndili nu-Kilisiti. Ukuswa une kwu kukava vuvule.

²² Apene upwu ndivwene nuvwumi vwa mummana uvwu vwa kuhupa iseke tsa mbombo pwu kundemile ukwihalila.

²³ Tsinwegile tsu ivili tsitsitsi. Ukunogwa kwu ndinogilwe ukuluta ukutsiva nu-Kilisiti ulwakuva kwu kulutilye sitso jilweli uvunnonu.

²⁴ Mańa uńe mumelye ukuta kuvetsage kunnonu ukuva mummana tango uńe.

²⁵ Ulwakuva tsu ndihuvye tsitsitsi pwu ndilumańile ukuta tango ndilikwo, ndilumańile ukuta tango ndivetsaga nuńe ńivoni, ndili vakuvatanga ukukula nukuhekela ndwidiko uńe.

²⁶ Ndikuvapelelaga ukulesuka itsa kwiginya mwane uńe ńi vanu va Kilisiti Jesu vwu ndivujile nditsile kukwa.

²⁷ Kwu kunogela kwene kwu upita nnogelage vunnonu ukuva ńi venevutsenge mwivangili lya Kilisiti, pwu nuńe nupwu ndikuvalola vwu nditsile, nupwu ndipulika itsa kwańe vwu ndili kuvutale, pwu ndivamańage ukuta mwimile mwa Mepo mpamato mwene ńivoni, ndi numbula mamato jyene pakutangana ukulilwila iligoha ilya lwidiko ulwu mulyidikye ilivangili.

²⁸ Ndita uvwu twilwa navwo pwu ndikuvamańaga uńe ukuta namukuvadwada apange. Tsitsitsi tsu tsa kumańilamwo ukuta ndi vakupokwa. Tsitsitsi tsu tsihuma kwa Nguluve.

²⁹ Mańa uńe itsa kwa Kilisiti tsu namupevilwi lwene lu lwidiko lwa kumwidikila. Bako mupevilwe nuvukuvilwa uvwu mukuvilwa ulwakuva ndi va mwene.

³⁰ Nuńe mulwila iligoha ilyu mulivwene ndilwa nune, ilyu nalino mpulike ukuta ndili nalyo.