Mataayo 1 - UTESITAMENTI UMPYA

¹ Uju vi kalata va kivumbuko kya Jesu Kilisiti, uńa-Ndaviti uńa-Abulahamu.

² Umwene Abulahamu akammola Isikaka, umwene Isikaka akammola UJakobu, umwene UJakobu akammola nu-Juta navamyave,

³ umwene UJuta akavahola nu-Pelesi nu-Selaka, vwu vakavahola mundala va mwene mwa Tamali, umwene UPelesi akammola UHeseloni, umwene UHeseloni akammola Alamu,

⁴ umwene Alamu akammola Aminatabu, umwene Aminatabu akammola UNahasoni, umwene UNahasoni akammola USalimoni,

⁵ umwene USalimoni akammola UBoasi, vi akammola mundala va mwene mwa Lahabu, umwene UBoasi akammola Obeti, vi akammola mundala va mwene mwa Luti, umwene Obeti akammola Isai,

⁶ umwene Isai akammola UNdavidi unkuludeva, umwene UNdaviti akammola USelomoni, vi akammola mundala va Ulija,

⁷ umwene USelomoni akammola ULehabyamu, umwene ULehabyamu akammola Abija, umwene Abija akammola Asa,

⁸ umwene Asa akammola UJosapati, umwene UJosapati akammola UJolamu, umwene UJolamu akammola Usija,

⁹ umwene Usija akammola UJotamu, umwene UJotamu akammola Ahasi, umwene Ahasi akammola UHisikija

¹⁰ umwene UHiesekija akammola UManase, umwene UManase akammola Amoni, umwene Amoni akammola UJosija,

¹¹ umwene UJosija akammola nu-Jekonija navanunave pamwaka gulya vahamitsivwagwe mu-Babeli.

¹² Ulwambele vwu vahamitsivwe mu-Babeli pwu UJekonija akammola USalatyeli, umwene USalatyeli akammola USelubabeli,

¹³ umwene USelubabeli akammola Abihuti, umwene Abihuti akammola Elyakimu, umwene Elyakimu akammola Asoli,

¹⁴ umwene Asoli akammola USatoki, umwene USatoki akammola UJakini, umwene UJakini akammola Elihuti,

¹⁵ umwene Elihuti akammola Elyasali, umwene Elyasali akammola UMatani, umwene UMatani akammola UJakobu,

¹⁶ umwene UJakobu akammola UJosepu, ungosi va Malija uvi amolaga UJesu, uvi vatetsaga vi Kilisiti ilitavwa lya mwene.

¹⁷ Voni umwu vakonganye ntulahilo nkivumbuko kya vene ukuhuma pa-Abulahamu ukutsisika pa-Ndaviti vali kitsigo navani, ukuhuma pa-Ndaviti ukutsisika palya vahamitsivwagwe mu-Babeli vali kitsigo navani, ukuhuma palya vahamitsivwagwe mu-Babeli ukutsisika kwa Kilisiti vali kitsigo navani.

¹⁸ Ukwene ukuholwa ukwa Jesu Kilisiti vwu agahile vuvule-vule. Umwene uvańina UMalija vwu andavye UJosepu vwu vakanale ukutolana, pwu vakavona ali nulusembe lwa Mepo umbalatse.

¹⁹ Umwene UJesepu ungosi va mwene ulwakuva nuvugolosu ali ngolosu, ulwakuva ukunkotsa isoni akata ndilankotsaga pavuvalasu, pwu akisagila mwitumbu akata ndikundekaga mbutitu.

²⁰ Vwu ikisagila tsitsitsi vuvule-vule pwu akakeńemuka unsuṅwa va Nguluve uju! Ikumbonekela mmagona-sivi ita: Vi Josepu vi ńa-Ndaviti ulisagilaga uve ukutola UMalija undala vako, mańa ukwu ali nakwu mwitumbu ka ju Mepo Umbalatse.

²¹ Alahola umwana undume, vi vwitse umpe ilitavwa lya Jesu, mańa alavapoka avanu va mwene kunongwa tsa vene.

²² Tsoni tsitsitsi upwu tsikitsa pwu tsikitsa ukuta mwu tsitsililage mumwa tsitswu unkuludeva akatsovela kuńamalago akata:

²³ Lola uminza alahola umwana undume vi valampa ilitavwa ilya Imanweli, kwu kuta Unguluve ali nuvwe.

²⁴ Umwene UJosepu vwu asisimwike mutulu, pwu akakonga itswu andagilaga unsuṅwa va nkuludeva, akantola undala va mwene.

²⁵ Akaleka nukummańa tango. Tango akammola umwana va mwene umbele, vi akampa ilitavwa ili Jesu.