Maliko 1 - UTESITAMENTI UMPYA

¹ Vwu lyagahile vuvule-vule ukutengula ilivangeli ilikuntsova UJesu Kilisiti unswambe va Nguluve.

² Likongile avigage UJesaja uńamalago upwu atetsaga: Lola ndikukusuṅilaga unsuṅwa vango uva kulongola mbulongolo mwave, vi alagahaga inzila jya kugendamwo uve.

³ Ilimeńu lya mwilangi likwilanga ndukungu lita: Munotsage unsevo gwa ntwa, ndiṅanyage inzila tsa mwene.

⁴ Vwu akagaha vuvule-vule UJohani umwotsi ukuvoneka ndukungu, akavavula avanu akata: Mukilivukage pwu mulotsivwagwa pwu mukwupililaga uvusyikilo vwa nongwa tsińo.

⁵ Pwu vakahuma ukubiha kumwene avanu ikilunga kyoni kya mu-Jutai voni nava mu-Jelusalemu, voni akavotsa ndugasi ulwa Jolitani. Avene vakipala inongwa tsa vene.

⁶ Umwene UJohani aswalaga ugwańingilitsa gwa lwage lwa ngamila, ihudikaga ingwamba jya lukova nkivino, alitsaga namakivale nuvwuke vwa nzuke.

⁷ Akasimilitsa akata: Pambele pane pwu ikwitsaga uvi andutile amaka une, uvi nandinogili nukwinama pakuvopola utukova twa nsikato sya mwene.

⁸ Une ndivotsitse namagasi, umwene alavotsehetsaga ju Mepo umbalatse.

⁹ Mmatsuva aga pwu UJesu akahuma mu-Nasaleti nkilunga kya mu-Galilai akabiha kwa Johani. Vi akamwotsa mwa Jolitani.

¹⁰ Avwene vwu itoga mmagasi, pwu akavona kukyańa kudinduka, akavona UMepo ikumwikila uta ngundya.

¹¹ Akavona nilimeńu lihuma kukyańa lita: Vi nswambango uve, vi ngane kwane, vi uṅelye uve.

¹² Pwu nakahava UMepo ukutsikumbika ndukungo.

¹³ Mwu akatsilinda amatsuva imilevulo gini (40) ndukungo umu. USetano akangela. Akalinda niṅanu tsa ndukungo. Avasuṅwa va Nguluve vakangegela isinu.

¹⁴ Avwene vamwibite UJohani, pwu UJesu akabiha mu-Galilai akasimilitsa inongwa innonu tsa Nguluve

¹⁵ akata: Umwaka gwitsile, uludeva lwa Nguluve luhegelye, mukilivukage mutsidikage inongwa innonu itsi.

¹⁶ Ilitsuva ilinge vwu igenda pamwambo pańanza jya mu-Galilai, pwu akavavona nu-Simoni nu-Andileja unnuna va Simoni, akavona vilaha ulwelo lwa vene muńanza. Ulwakuva vale valovi.

¹⁷ Pwu UJesu akatsova navo akata: Tsukwi muṅongage, ndikuvapelaga ukuva valovi va vanu.

¹⁸ Pwu vakatsileka baho ṅani-ṅani vuvule ińelo tsa vene, vakankonga jujwa.

¹⁹ Vwu alutile padebe pwu akavona nu-Jakobu uńa-Sebetai nunnunave UJohani, akavona vihona ińelo tsa vene mwiboti.

²⁰ Navene akavilangila ṅani vuvule. Pwu vakandeka mwiboti udadajavo USebetai navavombi. Avene vakankonga jujwa.

²¹ Vakagenda vakatsisika mu-Kapelinaumu. Pasabati pwu vakingila nńumba jya vene jya kwisajilamwo akavavula inongwa.

²² Pwu vakadega vuvule itsu avavulaga, ulwakuva vwu ikuvavula inongwa avonekaga ukuva vi vi mwenenatso jujwa, natsovili ndavamańakalata.

²³ Pwu vakakeńemuka mwale nńumba jya kwisajilamwo umunu va mepo imbivi ikwilanga

²⁴ ita: Tuli viki nuvwe nuve vi Jesu va mu-Nasaleti. Vwitsile nkutujatsa vuvule. Tukumańile mańa veve mbalatse va Nguluve.

²⁵ Umwene UJesu akantanila akata: Nunala, uhume mmunu uju!

²⁶ Pwu imepo imbivi jikamusanihitsa kwoni-kwoni umunu jujwa, jikahuma vwu jikutile sitso.

²⁷ Pwu vakadega voni, vakavutsanya vakata: Kyu kinu kiki iki? Tsu nongwa imya tsitsitsi? Mańa imepo imbivi ikutsilagila, itsene pwu tsikumwidika.

²⁸ Pwu akapulikika ṅani-ṅani nsilunga syoni isibadiṅine nikya mu-Galilai.

²⁹ Pwu akahuma nńumba jya kwisajilamwo akabiha nńumba jya va Simoni nu-Andileja. Mwu akingila nava-Jakobu nu-Johani.

³⁰ Umwene unkwive va Simoni vakavona ali pavugono ali nimungu. Tsu vakambulila ṅani UJesu.

³¹ Pwu umwene akahegelela akamwibata ikivoko akamwimya. Pwu imungu jikandeka ṅani-ṅani, Pwu umwene akavagegela isinu baho.

³² Kumihe vwu lisemile ilitsuva, pwu vakavagega kumwene voni avatamu navali nimepo imbivi.

³³ Avambutsenge vwoni vakava pandyango.

³⁴ Umwene akavaponya voni avatamu uvutamu vwoni, akatsihumya nimepo imbivi ńongosu vuvule. Akabela vwu imepo imbivi tsita tutsove ulwakuva tsammańile.

³⁵ Pavusiku akalava ukuhuma UJesu vwu likanale nilitsuva ukuhuma, akabiha ndukungu mwu akatsikisaja.

³⁶ Avene va-Simoni navanine vakatsikundonda.

³⁷ Vwu vambwene pwu vakata: Mańa voni vali pakukulonda.

³⁸ Umwene akata: Tubihage mwoni nambutsenge uvunge mbwipi umu, namwene ndikavavulage inongwa avanu, mańa tsu tsitso nditsile.

³⁹ Pwu akamala kyoni ikilunga kya mu-Galilai, akata nukuvavula inongwa nńumba tsa vene tsa kwisajilamwo, akata nukutsihumya imepo imbivi.

⁴⁰ Ulunge pwu akahegelela kumwene umunu uńabuba, Vi akasugama pasi akatekelesa kumwene akata: Ungave unogilwe pwu ulumańile ukumonya.

⁴¹ Umwene UJesu ikisa kikambona mwitumbu, akagolosa ikivoko akamwabasa mumana akata: Ndinogilwe uponage.

⁴² Vwu umwene atsovile ili pwu ibuba jikajaga akapona.

⁴³ Pwu UJesu akansumusa ṅani-ṅani, akatanila sitso

⁴⁴ akata: Uve miho ulambulaga nujyunge umunu. Bihaga ukavoneke kunteketsi ukangegele isya kutekela isya pakuponela uve isyu alagye UMose. Syu sivetsage sya kumańilamwo avene.

⁴⁵ Umwene umunu uju vi akabiha, akatsitengula ukutsitsova sitso, akatsitsova mwoni-mwoni inongwa tsitsitsi. Pwu UJesu akalemwa ukwingila pavuvalasu mbutsenge uvwu angave atye ndigendemwo–tsu nongwa tsitsitsi–bako akava mumalavwa vuvule. Pwu avanu vakahuma mwoni-mwoni ukubiha upwu alepwo.