Lʉvonekelo 1 - UTESITAMENTI UMPYA

¹ Lwu luvonekelo lwa Jesu Kilisiti ulwu ampye Unguluve ulwa kuvavonya avakivaga va mwene itsiva pakwipela ṅani-ṅani. Lwu ulwu akansuṅa unsuṅwa va mwene uva kumbula UJohani unkivaga va mwene,

² uvi atsovaga asimilitsaga inongwa tsa Nguluve nitsa Jesu Kilisiti nitsoni itsu atsivwene.

³ Vwu vandugataluko avikwimba pakalata amameńu ga malago agavigilwe mwa kalata umu avikugapulika, avikugavika munumbula tsa vene. Mańa umwaka guhegelye.

⁴ Nene Johani ndikuvavigila ńi va mmipelela gyu lekelakupamato igili mu-Asija. Ndikuvapembetsa ndita: Avasaje nuluhungu nulunotsehetso uvi alikwo nalino, uvi alikwo sikutsoni nakatale, uvi nukwitsa alitsa. Vavasaje navamepo vwu lekelakupamato avilolana nikińalwangula kya Nguluve kya vutwa.

⁵ Avasaje nu-Jesu Kilisiti umwolelanongwa umuvili, umbele nakuvaswe, umbaha va vakuludeva voni va nkilunga umu,

⁶ uvi atuganile atuvangile nunkisa gwa mwene kumbivi tsitu, uvi atupelile ukuva ludeva lwa nkuludeva, uvi atupelile ukuva vateketsi va Nguluve udadaje. Vi tumpetsage nuvuvaha namaka tukasike nave nakuvutsilakusila lusiku. Ameni.

⁷ Lola ikwitsilaga mmavingo. Galambona amiho ga voni mpamato-mpamato. Valambona navamomile. Nisivumbuko syoni sya nkilunga umu silambona. Ena jilweli.

⁸ Nene Alipa, nene Omega vwu iva Unguluve untwa uvi alikwo nalino, uvi alikwo sikutsoni nakatale, uvi nukwitsa ikwitsa, vi Ńamaka goni.

⁹ Une ndi Johani ndi njińo, ndi tuli valilanila nuvukuvilwa nuludeva nukwigungumatsa kwa Jesu, ndita ndi Johani ndale palusungo ulwu vita vi Patimu ilitavwa. Mwu tsangegile inongwa tsa Nguluve nitsa kunsimilitsa UJesu.

¹⁰ Ilitsuva ilinge palitsuva lya ntwa pwu UMepo akanola, pwu ndikakeńemuka ilimeńu ilivaha kumbele. Lyu likava ndilya ngalape

¹¹ likata: Itsu vwilola lino tsu ivige mwa kalata, uvasuṅilage ava mmipelela lekelakupamato, nugwa mu Epesi nugwa mu-Similina nugwa mu-Peligamu nugwa mu-Tyatila nugwa mu-Saliti nugwa mu-Pilatelipija nugwa mu-Laotikija.

¹² Pwu ndikakilivuka ndikata ndilole ilimeńu ilitsova nune, vwu ndikilivwike pwu, ndikavona isibatilańale lekelakupamato sya sahabu.

¹³ Pagati pasibatilańale apa pwu ndikavona umunu imile, ali ndunswambe va munu. Ndikavona aswalile ugwańingilitsa untale gukasika mmalunde, pakipambaga pwu ihudikaga ingwamba jya sahabu.

¹⁴ Untwe gwa mwene ninzwili ndikavona swe vuvule ukuta lwage uluvalasu ukuta nala. Amiho ga mwene gwu gale ukuta ndimbo tsa mwoto.

¹⁵ Amalunde ga mwene gilengalenga gale ndikimanga ikivalasu ikikwenguka mwitende. Ilimeńu lya mwene likwujila ukuta limeńu lya ngasi ńongosu.

¹⁶ Ndikavona ibite inondwe lekelakupamato nkivoko kya mwene ikyandyo. Mundomo gwa mwene lwihuma ulwuvo lwa vwuge kwoni-kwoni. Kumiho imulika ukuta litsuva upwu limulika vwulili pantwe.

¹⁷ Vwu ndimbwene pwu ndikagwa kumalunde ga mwene, uta ndiswe. Pwu umwene akambika ikivoko kya mwene ikyandyo akata: Kwu bako ukudwada, mańa nene ndi Ndongotsi, nene ndi Vakunepo.

¹⁸ Nene ndi mwumi, nene ndi ndaswe, lola ndili mwumi nditsisikaga nakuvutsilakusila lusiku. Ndibite nisidindulilo sya kuvuswe nisya kuvutsuka mmavoko.

¹⁹ Vigaga itsu vwilola, itsilikwo nalino nitsilipakwitsa itsikutsikonga tsitsitsi.

²⁰ Uvige imbaha imya itsa nondwe lekelakupamato itsu utsivwene pakivoko kyane ikyandyo nitsa sibatilańale lekelakupamato sya sahabu. Mańa inondwe lekelakupamato itsi vwu vasunwa va mipelela lekelakupamato. Nisibatilańale lekelakupamato isi gyu mipelela lekelakupamato.