Hebuli 1 - UTESITAMENTI UMPYA

¹ Unguluve uvi katale atsovelaga mbańamalago, uvi akatsovela pa pongosu, uvi akatsovela namuńiho tsińongosu vwu ikuvavula avadadajitu inongwa, vi pamatsuva ga kunepo lino pwu itsile itsovela munswambe upwu ikutuvula inongwa.

² Uvi ambikile ukuta ave vi va pavuhale vwa syoni, uvi nikilunga apelile mumwene jujwa upwu akipelaga.

³ Umwene ndengalenga va vuvaha vwa Nguluve, kihwani kya mumwu avelye ukuva Nguluve. Syoni upwu pwusile syu apelile ukuvakwo jujwa nilimeńu lya mwene lya maka ga mwene. Umwene ipelile ukuvalatsivwa kumbivi tsitu, pwu intamitse kukivoko ikyandyo kya Mwenevuvaha uvudwadwa kukyańa.

⁴ Umwene alutye nava vasunwa uvuvaha, vugelye pitavwa ilyu ahalile ililutye kumatavwa ga vene.

⁵ Vi alikwo unsuṅwa uvi antsovye ponu ilyakuta: Uli nswambango, ndikuholile ilelo iji nilyakuta: Ndikipelaga ukuva dadajo, umwene ikipelaga ukuva vi nswambango?

⁶ Napene nupwu alavujaga alamwingitsaga umbele nkilunga pwu ita: Voni avasuṅwa va Nguluve valisaja kumwene.

⁷ Apene upwu ikuvatsova avasuṅwa pwu ita: Avasuṅwa va mwene ikuvapela mepo. Avakivaga va mwene ikuvapela ndimbo tsa mwoto.

⁸ Apene upwu ikuntsova unswambe pwu ita: Ikińalwangula kyako kya vutwa vi Nguluve kyu kya sikutsoni, ijyene ingoha jyako jya vutwa jyu ngoha jya kugolosa inongwa.

⁹ Uvuganile uvugolosu, usulile uwilasimilitso. Pwu vi Nguluve, Unguluve vako akubakile uluhekelo ukuta mono mbulongolo pavanino voni.

¹⁰ Ita: Pavutengulilo vi nkuludeva pwu ukyalye pavwimo ikilunga, nasyene isya kukyańa upelile namavoko gako.

¹¹ Isyene silajaga, uve ulavakwo sikutsoni. Syoni silalalapala ukuta gwańingilitsa.

¹² Ulasitandula ukuta kilundwa pwu syanduke. Mańa uve vi jujwa sikutsoni, nagyene imyaka gyako nagisila.

¹³ Vi alikwo unsuṅwa uvi ambulile poni atye: Tama kukivoko kyango ikyandyo kunu, tango avatavangwa vako ndivapelage katamilo kya kuvikapwo amalunde uve?

¹⁴ Nda voni tsu mepo ińivaga itsu ikutsisuṅa kukuvavombela aviva pakulwingila ulugataluko ukuta vuhale?