Filimoni 1 - UTESITAMENTI UMPYA

¹ Nene Pauli ndi nkunge va Kilisiti Jesu ndili nu-Timoti unkilisiti unjitu. Tukukuvigila vi Pilemoni vi mańani, vi mbombelanila vitu.

² Tukukuvigila nuve vi Apija vi matsa vitu, nuve vi Alikipu vi ndwilanila vitu paligoha. Tukukuvigila nuve numpelela gwoni ugulundamana nńumba jyako.

³ Tukuvapembetsa twita: Unguluve udadajitu nunkuludeva UJesu Kilisiti avasaje nuluhungu lwa mwene nulunotsehetso.

⁴ Sikutsoni ndikukusanila kwa Nguluve upwu ndikumbuhitsa mńisajo tsango itsu ndikisaja,

⁵ upwu ndipulike nulugano nulwidiko lwako ululotsitse kunkuludeva UJesu nakuvajitu avavalatse voni.

⁶ Ndikukusajila ndita kungave ukulilanila ukwu tuli valilanila ulwidiko nuvwe nuve, kungave kwavonekaga ukuvomba isinge, kungave kwakupelelaga ukutsimańa tsoni innonu itsu tuli natso itsilotsitse kwa Kilisiti.

⁷ Mańa ulugano lwako lutupelye ukuhekela sitso, lukututsesa. Mańa inumbula tsa vavalatse tsigatalwike mwave vi njitu.

⁸ Pwu ndingave ndatetsaga nditsove vuvule kitasiha, ndingave ndatetsaga nditsovele mwa Kilisiti, pwu napene ndili nditsova ndili ndilagila itsu unogye ukuvomba ndili ndita tsu itsi tsu itsi.

⁹ Lola upwu nditye nditsovelaga ndugano pwu nditekelesa kwave. Ena vwu ndigahile vuvule-vule ndi Pauli ndi ngogolo, ndi lino ndipelile ukuva ndi nkunge va Kilisiti Jesu

¹⁰ ndita: Vwu ndigahile nditekelesa kwave itsa mwana vango uvi ndimolile mundegehe tsango umu. Nditsova ju Onesimu.

¹¹ Katale pwu nakuvombili kinu, lino pwu ikutuvombela vunnonu twi vavili nuńe nuve. Vi uvi ndinkilivwe nditye: Bihaga kwa Pilemoni.

¹² Mańa uve umwupililage umwene, inumbula jyango ijyu nditetsaga.

¹³ Une ndatye ndinkilivule ambombelage une mundegehe tsango itsu limelye ilivangili. Ndikata pwu ndili kwukuva kwu kumbombela vukumbombela une.

¹⁴ Mańa nandinogilwi ukwitolela ndimwene kuvutitu vwu navwidiki uve. Ulwakuva ndikata ndilavetsaga nda ndikwumilitse akannonu kako ukwu vukuma pwu ndikata kaye ku unogilwe vimwene.

¹⁵ Mańa ndita pange tsu itsi akimbye pave padebe ulwakuva Unguluve atetsaga pwu ulava nave sikutsoni.

¹⁶ Mańa lino pwu niva ngulano vako vuvule. Bako ihuma vuvule pavugulano; iva nnino umańani. Ulwakuva alutilye ukuva njyango, pwu ipelaga ndaku ukuva nnino namummana namunkuludeva?

¹⁷ Ungave umbwene une ukuva ndili nnino jilweli, pwu umwupililage umwene nduvwu vukunupilila une.

¹⁸ Mańa angave avejangile itsinge kwave, angave atanile itsinge syu umbalilage une, jivetsage nongwa jyango.

¹⁹ Nene Pauli ndiviga nikivoko kyango ndita: Ndikukuhombaga, Tsu nandikukukumbuhitsa itsu uli ninongwa kwane ijya kwihomba kwane voni vuvule uve.

²⁰ Ena vi njitu nune ndikave utunge kwave, ndikavilage munkuludeva. Ukwa ugataluse inumbula mwa Kilisiti.

²¹ Upwu ndikukuvigila pwu ndihuvye mwave ukuta ulańidika, Ndilumańile ukuta ulongeletsa pitsu nditsovile.

²² Napene napavugono ungahilage ṅani, Mańa ndihuvila ukuta ińisajo tsińo tsilamelelaga ukuva ndili kikungilwa kya kuvakungila uńe.

²³ Ikukupembetsa nu-Epapula uvi tukungilwe luninye nave muńololo mwa Kilisiti Jesu,

²⁴ Vikukupembetsa va-Malika nu-Alisitalika nu-Ndema nu-Luka avikunanga imbombo.

²⁵ Uluhungu lwa nkuludeva UJesu Kilisiti luvetsage nimyuja gińo!